កម្មករបម្រើការងារនៅរោងចក្រ ហុង វ៉ា កម្ពុជាហ្គាមិន ម៉ាញូហ្វាក់ធឺរីង លីមីធីត (Hung Wah (Cambodia) Garment Mfg. Ltd.) សាខាទី១ ស្ថិតនៅភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បានប្ដឹងទៅក្រសួងការងារ ដោយចោទថា ថៅកែទូទាត់សំណងមិនត្រឹមត្រូវតាមផ្លូវច្បាប់។
ក្នុងបណ្ដឹងដាក់ទៅនាយកដ្ឋានវិវាទការងារ នៃក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី២២ ខែកញ្ញា ឆ្នាំ២០២២ បានឱ្យដឹងថា កាលពីថ្ងៃទី១៦ ខែកញ្ញានេះ ថៅកែរោងចក្រ ហុងវ៉ា សាខាទី១ បានចេញសេចក្ដីជូនដំណឹងមួយស្ដីពីការបិទទ្វារអាជីវកម្មចាប់ពីថ្ងៃទី១៦ ខែកញ្ញានេះតទៅ ក្រោមហេតុផលថា «គ្មានទំនិញគ្រប់គ្រាន់»។
បណ្ដឹងដដែលបន្តថា ក្រោយការប្រកាសបិទទ្វាររោងចក្រនេះ ក្រុមកម្មករបានស្នើដល់ថៅកែផ្ដល់ប្រាក់ជូនដំណឹងមុន និងប្រាក់ជំងឺចិត្ត ដែលក្រុមហ៊ុនគណនានិងទូទាត់ជូនកម្មករមិនបានត្រឹមត្រូវ។
បើតាមបណ្ដឹងនេះ ក្រុមកម្មករបានស្នើឱ្យមានតំណាងកម្មករចំនួន១០នាក់ធ្វើជាតំណាងក្នុងការចរចារកដំណោះស្រាយវិវាទការងារនេះទៅតាមលក្ខខណ្ឌការងារ និងគ្រប់នីតិវិធីច្បាប់ផងដែរ ក្នុងនោះមានសហព័ន្ធសហជីពកម្មករនិយោជិត សហព័ន្ធសហជីពលើកតម្កើងជីវភាពកម្មករនិយោជិត និងសហព័ន្ធសហជីពឯករាជ្យ។
កម្មករផ្នែកជាងម៉ាស៊ីនដេរប្រចាំរោងចក្រ ហុង វ៉ា សាខាទី១ លោក ស៊ិន កន ឱ្យដឹងនៅថ្ងៃសុក្រនេះថា រោងចក្រ ហុងវ៉ា សាខាទី១ ជារោងចក្រផលិតសម្លៀកបំពាក់ និងមានកម្មករចំនួន៧០២នាក់កំពុងតវ៉ាទាមទាឱ្យថៅកែដោះស្រាយឡើងវិញ ចំពោះការទូទាត់សំណងជូនដំណឹងជាមុន និងប្រាក់ជំងឺចិត្ត។
កម្មកររូបនេះអះអាងថា ពួកគាត់បានបម្រើការងារនៅរោងចក្រ ហុងវ៉ា នេះ ចន្លោះពី៥ឆ្នាំទៅ១៧ឆ្នាំ ខណៈរូបលោកធ្វើការងារនៅរោងចក្រចំនួន៩ឆ្នាំ ប៉ុន្តែថៅកែជូនដំណឹងត្រឹមតែ១ខែមុនប៉ុណ្ណោះ។ លោកថា ការទូទាត់សំណងរបស់រោងចក្រនេះបានធ្វើឱ្យកម្មករបាត់បង់ផលប្រយោជន៍ជាងពាក់កណ្ដាល។
លោកបន្ថែមថា៖ «ខ្ញុំធ្វើការ៩ឆ្នាំ ប៉ុន្តែជូនដំណឹងខ្ញុំបានតែមួយខែហ្នឹង ហើយភាគច្រើនកម្មករគឺគិតមិនត្រូវទាំងអស់! ធ្វើការ៩ឆ្នាំចុះក្រោម បានតែមួយខែទេ! បើ៥ឆ្នាំចុះក្រោម បានតែ១៥ថ្ងៃទេ! និយាយទៅ កម្មករបាត់បង់ផលប្រយោជន៍ច្រើនណាស់ លើស៨០ភាគរយហើយ»។
វីអូឌី មិនអាចរកការឆ្លើយតបពីតំណាងភាគីរោងចក្រ ហុង វ៉ា សាខាទី១ បានទេ នៅថ្ងៃសុក្រនេះ។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ប្រាប់វីអូឌីតាមប្រព័ន្ធតេឡេក្រាមថា នាយកដ្ឋានវិវាទការងារ និងមន្ត្រីពាក់ព័ន្ធបានទទួលបណ្ដឹងពីក្រុមកម្មករ និងកំពុងជួបដោះស្រាយជាមួយកម្មករហើយ ប៉ុន្តែលទ្ធផលយ៉ាងណានោះមិនទាន់ដឹងនៅឡើយ។
ប្រធានសហព័ន្ធសហជីពឯករាជ្យ លោក រី សិទ្ធីណែត ដែលក្រុមកម្មករស្នើធ្វើជាតំណាងក្នុងការចរចាដោះស្រាយរឿងនេះ មានប្រសាសន៍ថា ករណីរោងចក្រ ហុង វ៉ា ប្រកាសបិទទ្វារអាជីវកម្មនេះ គឺមិនបានជូនដំណឹងត្រឹមត្រូវតាមផ្លូវច្បាប់ជូនកម្មករឡើយ ហើយការទូទាត់ប្រាក់ជូនដំណឹងនោះក៏មិនត្រឹមត្រូវសម្រាប់កម្មករដែរ។
លោក រី សិទ្ធីណែត បញ្ជាក់ថា ច្បាប់ស្ដីពីការងារ ត្រង់មាត្រា៧៥ គឺនៅពេលដែលរោងចក្របិទទ្វារ ត្រូវជូនដំណឹងមុន៧ថ្ងៃ សម្រាប់កម្មករបម្រើការងារតិចជាង៦ខែ ឬ ១៥ថ្ងៃសម្រាប់កម្មករបម្រើការងារពី៦ខែទៅ២ឆ្នាំ និងជូនដំណឹងមុន២ខែសម្រាប់កម្មករដែលបម្រើការងារពី២ឆ្នាំទៅ១០ឆ្នាំ។ លោកថា ការជូនដំណឹងដល់កម្មករមិនត្រូវតាមផ្លូវច្បាប់ពីថៅកែរោងចក្រ បានធ្វើឱ្យកម្មករខាតបង់ផលប្រយោជន៍ច្រើន ទើបកម្មករមិនពេញចិត្ត ហើយនាំគ្នាប្ដឹងទៅក្រសួងការងារឱ្យជួយរកដំណោះស្រាយ។
លោកបន្ថែមថា៖ «ធ្វើឱ្យកម្មករមួយបាត់បង់ផលប្រយោជន៍១៥ថ្ងៃ អ្នកខ្លះបាត់១ខែ អ្នកខ្លះបាត់២ខែ ដោយសារអត់បានជូនដំណឹងមុនត្រឹមត្រូវ។ អ៊ីចឹងបើយើងគិតជាលុយទៅ ហើយយើងចែកជាសមាមាត្រប្រាក់ខែកម្មករ មិនក្រោម២៥០ដុល្លារទេក្នុង១ខែ។ បើគាត់បាត់ការជូនដំណឹង២ខែ អ៊ីចឹងកម្មករស្មើការបាត់លុយជាង៥០០ដុល្លារអ៊ីចឹងទៅ»៕