លោកនាយករដ្ឋមន្ត្រី ហ៊ុន សែន បានអំពាវនាវដល់ម្ចាស់ក្រុមហ៊ុន និងម្ចាស់រយថយន្តដឹកជញ្ជូនអ្នកដំណើរឯកជនទាំងអស់ រក្សាតម្លៃដឹកជញ្ជូននៅដដែលក្នុងឱកាសពិធីបុណ្យភ្ជុំបិណ្ឌ ខណៈរដ្ឋាភិបាលបានបញ្ចេញរថយន្តក្រុង១៧៥គ្រឿងសម្រាប់ដឹកជញ្ជូនពលរដ្ឋនៅរាជធានីភ្នំពេញ និងទៅតាមបណ្តាខេត្តនានាដោយឥតគិតថ្លៃ។
តាមរយៈទំព័រហ្វេសប៊ុកផ្លូវការរបស់លោក នៅថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានលើកឡើងថា រដ្ឋបាលរាជធានីភ្នំពេញបានរៀបចំរថយន្តក្រុងចំនួន១៧៥គ្រឿងសម្រាប់បម្រើសេវាដឹកជញ្ជូនសាធារណៈរយៈពេល០៥ថ្ងៃ ចាប់ពីថ្ងៃទី២៣ ដល់ថ្ងៃទី២៧ ខែកញ្ញា ឆ្នាំ២០២២ ដោយមិនបង់ប្រាក់ ក្នុងនោះ សម្រាប់ប្រជាពលរដ្ឋនៅរាជធានីភ្នំពេញបានប្រើប្រាស់រថយន្តក្រុង៥៥គ្រឿង និងសម្រាប់ប្រជាពលរដ្ឋដែលធ្វើដំណើរទៅតាមបណ្ដាខេត្ត និងត្រលប់មករាជធានីភ្នំពេញវិញ មានរថយន្តក្រុងចំនួន១២០គ្រឿង។
លោកបន្តថា នៅថ្ងៃទី២៣ ខែកញ្ញា ឆ្នាំ២០២២នេះ គឺជាថ្ងៃទី១ហើយនៃការចាប់ផ្ដើមដំណើរការសេវារថយន្តក្រុងសាធារណៈដែលរៀបចំឡើងដើម្បីជួយសម្រួលបន្ទុកចំណាយរបស់ប្រជាពលរដ្ឋ។
ជាមួយគ្នានេះដែរ លោកក៏បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរឯកជនទាំងអស់ រក្សាតម្លៃដឹកជញ្ជូននៅដដែល ដោយពុំដំឡើងថ្លៃ ក្នុងឱកាសពិធីបុណ្យភ្ជុំបិណ្ឌនេះ ដើម្បីរួមចំណែកជាមួយរាជរដ្ឋាភិបាល ក៏ដូចជាជួយសម្រួលដល់ជីវភាពរស់នៅរបស់ប្រជាពលរដ្ឋ។
ក្រៅពីនោះ លោកក៏បានអំពាវនាវដល់ប្រជាពលរដ្ឋទាំងអស់ថែរក្សានិងការពារសុខភាពពីការចម្លងជំងឺកូវីដ-១៩ តាមរយៈការប្រកាន់ខ្ជាប់នូវអនាម័យ និង «៣កុំ ៣ការពារ»។
ការអំពាវនាវរបស់ប្រមុខរដ្ឋាភិបាលបានធ្វើឡើងស្របពេលដែលប្រជាពលរដ្ឋ និងអ្នកឃ្លាំមើលសង្គម បានលើកឡើងពីបញ្ហាទំនិញ និងសេវាដឹកជញ្ជូនឯកជនដែលតែងមានការដំឡើងថ្លៃជាហូរហែនៅរៀងរាល់ឆ្នាំ ក្នុងអំឡុងពេលដែលមានពិធីបុណ្យជាតិនានា៕