ពលរដ្ឋខ្មែរ និងជនជាតិផ្សេងៗទៀតរាប់រយនាក់ បាននាំគ្នាធ្វើបាតុកម្មនៅមុខទីស្នាក់ការអង្គការសហប្រជាជាតិ(UN)ក្នុងទឹកដីសហរដ្ឋអាមេរិក ដើម្បីប្រឆាំងលោកនាយករដ្ឋមន្ត្រី ហ៊ុន សែន ខណៈលោកកំពុងមានវត្តមានចូលរួមសន្និបាតអង្គការសហប្រជាជាតិតនៅទីនោះ។
ការធ្វើបាតុកម្មរបស់ប្រជាពលរដ្ឋខ្មែរនិងជនជាតិមីយ៉ាន់ម៉ាឬ ភូមា ថៃ ជាដើម បានធ្វើឡើងអំឡុងពេលលោក ហ៊ុន សែន កំពុងមានវត្តមានចូលរួមសន្និបាតអង្គការសហប្រជាជាតិ លើកទី៧៧ នៅទីក្រុងញូវយ៉ក សហរដ្ឋអាមេរិក នាថ្ងៃទី២៣ ខែកញ្ញា ឆ្នាំ២០២២ ម្សិលមិញ។
ក្នុងវីដេអូឃ្លីបជិត ២៤នាទី ដែល លោក សម រង្ស៊ី បានផ្សព្វផ្សាយលើបណ្ដាញសង្គមនោះ បង្ហាញពីសកម្មភាពរបស់ប្រជាពលរដ្ឋខ្មែរធ្វើបាតុកម្ម ដោយបានលើកបដានិងកាន់រូបថតសកម្មជនគណបក្សសង្គ្រោះជាតិដែលត្រូវបានតុលាការរំលាយ ព្រមទាំងរូបថតកញ្ញា សេង ធារី ជាដើម ដែលបច្ចុប្បន្នអ្នកទាំងនោះ កំពុងជាប់ពន្ធនាគារនៅប្រទេសកម្ពុជា។
ពួកគេបានលើកឡើងថា សកម្មជន និងអ្នកគាំទ្រគណបក្សសង្គ្រោះជាតិដែលកំពុងជាប់ ពន្ធនាគារ ដោយសារការធ្វើទុក្ខបុកម្នេញពីសំណាក់រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន។
ក្រុមបាតុករដោយមានទាំងមន្ត្រីជាន់ខ្ពស់គណបក្សសង្រ្គោះជាតិដែលតុលាការរំលាយ ដូចជាលោក ម៉ែន សុថាវរិន្ទ្រ លោក ឡុង រី ជាដើមនោះបានស្នើទៅអង្គការសហប្រជាជាតិជួយអន្តរាគមន៍លើលោក ហ៊ុន សែន ឱ្យដោះលែងសកម្មជនគណបក្សសង្គ្រោះជាតិ ព្រមទាំងកញ្ញា សេង ធារី ឱ្យមានសេរីភាពវិញ។
ក្រៅពីស្នើឱ្យដោះលែងសកម្មជនសិទ្ធិមនុស្ស និងសកម្មជននយោបាយហើយ ពួកគេក៏ស្នើអង្គការសហប្រជាជាតិជំរុញទៅលោក ហ៊ុន សែន ឱ្យគោរពសិទិ្ធ និងស្តារលទ្ធិប្រជាធិបតេយ្យឡើងវិញ ដោយបើកឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌ នាពេលខាងមុខនេះផងដែរ។
តាមរយៈសកម្មជនគណបក្សសង្គ្រោះជាតិម្នាក់ ដែលបច្ចុប្បន្នកំពុងនិរទេសខ្លួននៅសហរដ្ឋអាមេរិក លោក រិន រដ្ឋ លើកឡើងអំឡុងពេលធ្វើបាតុកម្មនៅមុខទីស្នាក់ការអង្គការសហប្រជាជាតិថា រូបលោកមកតវ៉ានេះ ដើម្បីទាមទារឱ្យរដ្ឋាភិបាលដោះលែងអ្នកទោសនយោបាយដែលកំពុងជាប់ពន្ធនាគារទាំងអយុត្តិធម៌។
លោកថា៖«ប្រទេសកម្ពុជាក្រោមការដឹកនាំរបស់ លោក ហ៊ុន សែន ជាង ៤០ ឆ្នាំមកនេះ ឱ្យប្រជាពលរដ្ឋខ្មែររងទុក្ខវេទនា ធ្វើឱ្យប្រជាពលរដ្ឋខ្មែរឈឺចាប់ ហើយនៅក្នុងសង្គមតែមានការគំរាមកំហែង និងមានអំពើនិទណ្ឌភាពរហូត។ សូមឱ្យដោះលែងប្រជាធិបតេយ្យដែលរបបលោក ហ៊ុន សែន បំផ្លាញជាង ៥ ឆ្នាំមកនេះ ដែលមានការចាប់ខ្លួនមេបក្សប្រឆាំង ហើយរងបណ្ដឹងនៅតុលាការ និងឱ្យមានការបោះឆ្នោតដោយសេរី និងយុត្តិធម៌ នៅឆ្នាំ២០២៣ដែរ»។
នេះជាលើកទី២ ហើយដែលប្រជាពលរដ្ឋខ្មែរ ជនជាតិថៃ និងមីយ៉ាន់ម៉ា ដែលរស់នៅសហរដ្ឋអាមេរិបាននាំគ្នាបាតុកម្មប្រឆាំងនឹងលោក ហ៊ុន សែន នោះ ខណៈដំណើរទស្សនកិច្ចលោកទៅកាន់សហរដ្ឋអាមេរិក កាលពីខែឧសភា ដើម្បីចូលរួមកិច្ចប្រជុំកំពូលអាស៊ាន-អាមេរិកក៏មានប្រជាជាពលរដ្ឋខ្មែរធ្វើបាតុកម្មប្រឆាំងវត្តមានរបស់លោកដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការធ្វើបាតុកម្ពុជាដោយលើកហេតុផលថា រដ្ឋាភិបាលរំលោភសិទ្ធិមនុស្សនេះ មិនមែនទើបនឹងកើតឡើងឡើយ។ លោកបន្តថា ការធ្វើបាតុកម្មនេះ ក៏មិនមែនជារឿងចម្លែកសម្រាប់គណបក្សប្រជាជនកម្ពុជា និងប្រជាពលរដ្ឋកម្ពុជានៅទូទាំងប្រទេសនោះទេ។
លោកថា៖« ការធ្វើបាតុកម្មនេះ វាជាចរិកពិសពុលរបស់ក្រុមឧទ្ទាមក្រៅច្បាប់ដែលតែងតែប្រឆាំង ទោះបីជាមានវត្តមានឬអវត្តមានសម្ដេច ក៏គេនៅតែប្រឆាំង។ អាហ្នឹង វាជាចរិកតាំងពីពូជពង្សគេមកម្លេះ អាហ្នឹងមិនបាច់ឆ្ងល់ តើវាបានប្រយោជន៍ វាបានពួកគេហ្នឹងវាបំផ្លាញកិត្តិយសសេចក្ដីថ្លៃថ្នូរ កេរ្តិ៍ឈ្មោះ របស់ខ្មែរ មិនមែនតែខ្មែរនៅក្រៅប្រទេសទេ គឺខ្មែរនៅក្នុងប្រទេសទៀតផង»។
សម្រាប់លោកនាយករដ្ឋមន្ត្រី ហ៊ុន សែន វិញ កាលពីថ្ងៃទី២១ ខែកញ្ញា អះអាងថា វត្តមានរបស់លោកលើទឹកដីសហរដ្ឋអាមេរិក គឺ ទទួលបានការស្វាគមន៍យ៉ាងកក់ក្តៅពីប្រជាពលរដ្ឋរស់នៅទឹកដីប្រទេសមហាអំណាចលោកសេរីមួយនេះ។
ជាមួយគ្នានេះ លោកក៏បានអរគុណចំពោះវត្តមានជាជនរួមជាតិខ្មែរទាំងអស់ ដែលបាចំណាយពេលវេលាដ៏មានតម្លៃបំផុត ដោយបានអញ្ជើញមកជួបលោកដោយផ្ទាល់នៅពេលនេះ។
ហ្វេសប៊ុកលោក ហ៊ុន សែន សរសេរថា៖« នៅចំពោះមុខប្រជាពលរដ្ឋទាំងអស់ សម្តេចតេជោ នាយករដ្ឋមន្ត្រី បានមានប្រសាសន៍ថា តើនេះគឺជារូបសម្តេចផ្ទាល់រឺយ៉ាងណា? ព្រោះ មុនពេលមកដល់ទីក្រុងញូយ៉ក មានជនអគិតមួយចំនួនបាននិយាយថា សម្តេចឈឺដាច់សរសៃឈាម មិនបានទៅទីក្រុងញូយ៉ក សហរដ្ឋអាមេរិកនោះទេ»។
យ៉ាងណា ការធ្វើបាតុកម្មប្រឆាំងនឹងលោកនាយករដ្ឋមន្ត្រី ហ៊ុន សែន មិនមែនមានតែនៅមុខទីស្នាក់ការអង្គការសហប្រជាជាតិទេ។ ក្រុមបាតុករអះអាងថា ពួកគេគ្រោងធ្វើបាតុកម្មនេះ នៅមុខស្ថានទូតសហភាពអឺរ៉ុប និងកន្លែងផ្សេងដែរ ដើម្បីទាមទារឱ្យលោក ហ៊ុន សែន បែរមកដឹកនាំប្រទេសតាមបែបលទ្ធិប្រជាធិបតេយ្យឡើងវិញ ដោយគោរពរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីសជាដើម។
ទោះបីជាយ៉ាងនេះក្តី លោកនាយករដ្ឋមន្ត្រី ហ៊ុន សែន តាមរយៈហ្វេសប៊ុករបស់ខ្លួនបានអះអាងថា លោកបានដឹកនាំគណៈប្រតិភូចាកចេញពីសហរដ្ឋអាមេរិក និងបានទៅដល់ប្រទេសគុយបាប្រកបដោយសុវត្ថិភាព ដើម្បីអញ្ជើញបំពេញទស្សនកិច្ចផ្លូវការ។ លោកបញ្ជាក់ថា វត្តមានរបស់លោកនិងគណៈប្រតិភូបានទៅដល់ប្រទេសគុយបា នៅម៉ោង ៩:៣០នាទី នាល្ងាចថ្ងៃទី ២៣ ខែកញ្ញា ឆ្នាំ២០២២ ម៉ោងនៅប្រទេសគុយបា ដែលត្រូវនឹងម៉ោង ៨:៣០នាទី នៅប្រទេសកម្ពុជា នាព្រឹកថ្ងៃទី២៤ ខែកញ្ញា ឆ្នាំ២០២២៕