តំណាងមន្ត្រីគណបក្សក្រៅរដ្ឋាភិបាលចំនួន៤ បានឱ្យដឹងថា មកដល់ពេលនេះ ពួកគេនៅមិនទាន់ទទួលបានការឆ្លើយតបណាមួយពីរដ្ឋសភានៅឡើយ បើទោះបីជាពួកគេបានដាក់លិខិតជាថ្មីទៀតទៅស្ថាប័នមួយនេះ ដើម្បីសុំជួបពិគ្រោះយល់ទៅលើមូលដ្ឋានច្បាប់ និងលំហប្រជាធិបតេយ្យនៅកម្ពុជា។
គណបក្សនយោបាយទាំង៤ ដែលទាមទារឱ្យកែលម្អប្រព័ន្ធនៃការបោះឆ្នោត និងសិទ្ធិសេរីភាពខាងនយោបាយនៅមុនការបោះឆ្នោតជាតិខាងមុខនេះ រួមមាន គណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និងគណបក្សកែទម្រង់កម្ពុជា។
លោក អ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា ឱ្យដឹងនៅថ្ងៃទី២៦ ខែកញ្ញានេះថា គណបក្សនយោបាយនៅក្រៅរដ្ឋាភិបាលទាំង៤ បានដាក់លិខិតទៅរដ្ឋសភាជាថ្មីទៀតកាលពីថ្ងៃទី១៩ ខែកញ្ញា ដើម្បីសុំជួបពិគ្រោះយោបល់លើទៅលើមូលដ្ឋានច្បាប់ និងលំហប្រជាធិបតេយ្យ ដែលខ្លួនចាត់ទុកថា ដំណើរការច្បាប់ ជាពិសេសច្បាប់ពាក់ព័ន្ធនឹងការបោះឆ្នោត ហាក់មានការគំរាមកំហែងកាន់តែខ្លាំងឡើងៗទៅលើសេរីភាពនយោបាយ។
លោកបន្តថា គិតមកដល់ថ្ងៃចន្ទនេះ ពួកគេនៅមិនទាន់ទទួលបានការឆ្លើយតបណាមួយពីភាគីរដ្ឋសភានៅឡើយទេ។ លោកបន្តថា ប្រសិនបើការស្នើសុំណាត់ជួបលើកទី២នេះ រដ្ឋសភានៅតែបដិសេធទៀត នោះពិតជាគ្មានជម្រើសផ្សេងទេ គឺមានតែសុំជួបដោយផ្ទាល់ជាមួយគណបក្សប្រជាជនកម្ពុជាវិញ។
លោកបន្តថា៖ «យើងបានបានដាក់រួចហើយ លិខិតលើកទី២នេះ។ ប៉ុន្តែវាដូចជាស្ងាត់ឈឹង មិនឃើញឆ្លើយតបវិញទេ។ ប្រសិនបើលើកនេះមិនឆ្លើយតបទៀត យើងក៏គ្មានមធ្យោបាយដែរ។ បើគិតទៅ មានតែជួបជាមួយគណបក្សប្រជាជនកម្ពុជាវិញដោយផ្ទាល់ ព្រោះរដ្ឋសភាក៏ជាបក្សប្រជាជនកម្ពុជា ហើយក្រសួងមហាផ្ទៃក៏បក្សប្រជាជន»។
កាលពីថ្ងៃទី២៥ ខែសីហា ឆ្នាំ២០២២ កន្លងទៅ រដ្ឋសភាធ្លាប់បានច្រានចោលសំណើសុំជួបពីតំណាងគណបក្សនយោបាយទាំង៤នេះម្តងរួចមកហើយ នៅបន្ទាប់ពីគណបក្សនយោបាយទាំង៤បានដាក់សំណើសុំជួបលោក ហេង សំរិន ប្រធានរដ្ឋសភា កាលពីថ្ងៃទី១៧ ខែសីហា តែត្រូវបរាជ័យ។ លិខិតឆ្លើយតបរបស់រដ្ឋសភា សម្អាងហេតុថា បទប្បញ្ញត្តិនៃរដ្ឋធម្មនុញ្ញ និងបទបញ្ជាផ្ទៃក្នុងនៃរដ្ឋសភា ពុំមានចែងអំពីបទបែបបទនិងនីតិវិធីនៃការជួបពិភាក្សារវាងរដ្ឋសភា និងគណបក្សនយោបាយដែលគ្មានអាសនៈនៅក្នុងរដ្ឋសភាឡើយ។
វីអូឌី មិនអាចស្នើសុំការបញ្ជាក់បាននៅឡើយទេពីអ្នកនាំពាក្យរដ្ឋសភា លោក ឡេង ប៉េងឡុង នៅថ្ងៃទី២៦ ខែកញ្ញានេះ។
បើទោះជាបែបណា អ្នកនាំពាក្យរដ្ឋសភាធ្លាប់បានឆ្លើយតបកាលពីថ្ងៃទី៥ ខែកញ្ញា ថាក្នុងនាមស្ថាប័នកំពូលរបស់ជាតិមួយនេះលើកទឹកចិត្តឱ្យគណបក្សនយោបាយទាំងនោះរៀបចំញត្តិសាជាថ្មីទៀត ប្រសិនបើបក្សនយោបាយដែលនៅក្រៅរដ្ឋាភិបាលមានបំណងចង់ជួបពិគ្រោះយោបល់ជាមួយរដ្ឋសភា ហើយលោកក៏នឹងស្នើសុំគោលការណ៍បន្តទៅថ្នាក់ដឹកនាំកំពូលនៃរដ្ឋសភា ដើម្បីធ្វើសេចក្តីសម្រេចចិត្តអំពីរឿងនេះ។
លោកបន្តថា៖ «ឥឡូវដាក់មក តែខ្ញុំអត់ដឹងទេ ព្រោះទាល់សុំយោបល់ពីថ្នាក់លើទៀត»។
ការបដិសេធរបស់រដ្ឋសភានេះ ស្របពេលស្ថាប័នជាតិរៀបចំការបោះឆ្នោត និងក្រសួងមហាផ្ទៃ បានបើកផ្លូវឱ្យមានជំនួបរួចមកហើយ ក្នុងគោលបំណងប្រហាក់ប្រហែលគ្នានេះ ជាមួយតំណាងគណបក្សនយោបាយទាំង៤។
នៅក្នុងខ្លឹមសារនៃលិខិតរួមគ្នារបស់បក្សនយោបាយទាំង៤ កាលពីថ្ងៃទី២៥ ខែសីហា ឱ្យដឹងថា ការស្នើសុំជួបនេះ គឺក្នុងទិសដៅដើម្បីស្នើឱ្យស្ថាប័នជាតិកំពូលមួយនេះកែលម្អប្រព័ន្ធបោះឆ្នោត និងសេរីភាពខាងនយោបាយ ដើម្បីធានាថា ការបោះឆ្នោតជ្រើសតាំងតំណាងរាស្រ្ត ឆ្នាំ២០២៣ ខាងមុខនេះ ប្រព្រឹត្តទៅដោយសេរី ត្រឹមត្រូវ និងយុត្តិធម៌។
យ៉ាងណា ស្ថាប័នជាតិរៀបចំការបោះឆ្នោតបញ្ជាក់នៅចំពោះមុខតំណាងគណបក្សនយោបាយទាំង៤ ថាគោលការណ៍ទាំង១៦ចំណុចដូចដែលមាននៅក្នុងលិខិតរួមនេះ មិនពាក់ព័ន្ធនឹងសមត្ថកិច្ចរបស់ គ.ជ.ប ទាំងស្រុងទេ តែទាក់ទងនឹងរដ្ឋសភា និងក្រសួងមហាផ្ទៃច្រើនជាង។ ដោយឡែក ក្រសួងមហាផ្ទៃទទួលស្គាល់នៅចំពោះមុខជាមួយតំណាងគណបក្សនយោបាយទាំង៤ ក្នុងជំនួបទ្វេភាគី កាលពីថ្ងៃទី១៥ ខែកញ្ញា ថាក្រសួងមហាផ្ទៃនឹងពិនិត្យទៅលើភាពខ្វះខាតរបស់ខ្លួនក្នុងការអនុវត្តតួនាទីនិងភារកិច្ច ដូចដែលតំណាងគណបក្សនយោបាយទាំង៤លើកឡើងនេះ។
លោក សេក សុជាតិ ស្ថាបនិកនៃអង្គការអភិវឌ្ឍន៍ផ្នត់គំនិត យល់ឃើញថា ប្រសិនបើស្ថាប័នរដ្ឋសភាមិនបើកផ្លូវឱ្យមានការជួបពិគ្រោះយោបល់ពីតំណាងគណបក្សនយោបាយទាំង៤ ឆ្លុះបញ្ចាំងឱ្យឃើញពីការអនុវត្តច្បាប់មិនមានតម្លាភាព ជាពិសេសទំនងជាខ្លាចខាតប្រយោជន៍របស់គណបក្សប្រជាជនកម្ពុជា។
លោកបន្តថា៖ «នេះជារឿងមិនល្អទេ ដែលបិទផ្លូវមិនឱ្យគណបក្សនយោបាយទាំង៤ជួប។ ការបិទផ្លូវនេះបង្ហាញថា អាចជាការការពារផលប្រយោជន៍ឱ្យគណបក្សកាន់អំណាចច្រើនជាង»។
មាត្រា៣៥ នៃរដ្ឋធម្មនុញ្ញ កឋាខណ្ឌទី២ ចែងថា សេចក្តីស្នើទាំងឡាយណារបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕