គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា យ៉ាងហោចណាស់មនុស្ស១៣នាក់បានស្លាប់ក្នុងគ្រោះជំនន់ទឹកភ្លៀង ក្នុងនោះជនរងគ្រោះភាគច្រើនជាកុមារ ខណៈខេត្តមួយចំនួនកំពុងប្រឈមនឹងការជន់លិច បន្ទាប់ពីរងឥទ្ធិពលព្យុះ និងប្រព័ន្ធសម្ពាធទាប។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី ប្រាប់វីអូឌីនៅថ្ងៃអង្គារនេះថា ខេត្តដែលរងផលប៉ះពាល់ខ្លាំងដោយសារទឹកជំនន់មាន៤ខេត្ត ក្នុងនោះមានខេត្តបន្ទាយមានជ័យ សៀមរាប ឧត្តរមានជ័យ និងកំពង់ធំ។
ចំពោះចំនួនអ្នកស្លាប់ដោយសារជំនន់ទឹកភ្លៀង ចាប់ពីខែសីហា មកដល់ថ្ងៃនេះ លោកថាបានកើនដល់១៣នាក់ ក្នុងនោះភាគច្រើនជាកុមារដែលមានអាយុចាប់ពី៥ឆ្នាំ ដល់១១ឆ្នាំ។
លោក មុនី បន្តថា ក្នុងចំណោមខេត្តទាំង៤នេះ ខេត្តបន្ទាយមានជ័យ បានរងផលប៉ះពាល់ខ្លាំងជាងគេ ក្នុងនោះមានពលរដ្ឋប្រមាណ៥ ០០០គ្រួសារ រស់នៅ៨ក្រុង-ស្រុក ឬស្មើនឹង២៥ឃុំ-សង្កាត់ បានរងផលប៉ះពាល់ និងពលរដ្ឋជាង២០០គ្រួសារត្រូវបានជម្លៀសទៅកាន់ទីទួលសុវត្ថិភាព ខណៈដំណាំស្រូវចំនួន២៥ ៥៤០ហិកតា និងដំណាំរួមផ្សំចំនួន៥៩៩ហិកតា បានរងការលិចលង់។
ចំណែកខេត្តសៀមរាបវិញ អ្នកនាំពាក្យរូបនេះឱ្យដឹងថា មានពលរដ្ឋប្រមាណជិត៦ ០០០គ្រួសារ នៅ៨ក្រុង-ស្រុក ស្មើនឹង៤១ឃុំ-សង្កាត់ បានរងផលប៉ះពាល់ ខណៈសាលារៀនត្រូវលិច៨កន្លែង និងដំណាំស្រូវលិចជិត២ម៉ឺនហិកតា។
សម្រាប់នៅខេត្តកំពង់ធំវិញ លោក សុទ្ធ គឹមកុលមុនី ឱ្យដឹងថា មានប្រជាពលរដ្ឋចំនួន១ ៥២១គ្រួសារ នៅស្រុកប្រាសាទសំបូរ ក៏បានរងផលប៉ះពាល់ដោយសារជំនន់ទឹកភ្លៀងផងដែរ ខណៈនៅខេត្តឧត្ដរមានជ័យ លោកពុំទាន់បានដឹងពីចំនួនតួលេខពលរដ្ឋដែលរងផលប៉ះពាល់នៅឡើយ។
លោក សុទ្ធ គឹមកុលមុនី បន្តថា មកដល់ពេលនេះ ក្រុងការងារសង្គ្រោះបានត្រៀមរួចជាស្រេច ក្នុងការជួយដល់ប្រជាពលរដ្ឋនៅតាមបណ្ដាខេត្តដែលរងកំពុងប្រឈមនឹងជំនន់ទឹកភ្លៀងទាំងនោះ។
លោកថា៖ «បើតាមការព្យាករ ថ្ងៃទី២៧ ដល់ថ្ងៃទី៣០ នឹងមានភ្លៀងបន្តបន្ទាប់ អាចនឹងមានផលប៉ះពាល់បន្ត ប៉ុន្តែទោះជាយ៉ាងណា យើងបានត្រៀមអន្តរាគមន៍រួចហើយ។ ប៉ះពាល់ដំណាំស្រូវខេត្តកំពង់ធំ អាចឈានប៉ះពាល់ខ្លាំងដោយសាររយៈពេលយូរ ហើយខេត្តដទៃក្នុងចន្លោះពីក្រោម១០ថ្ងៃ ស្រូវមិនខូចខាតទេ ត្រឹមប៉ះពាល់ ប៉ុន្តែទឹកភ្លៀងនៅបន្តអ៊ីចឹងទៀត អាចឈានដល់ខូចខាត»។
តែយ៉ាងណា អ្នកនាំពាក្យរដ្ឋបាលខេត្តឧត្តរមានជ័យ លោក ឌី រ៉ាដូ លើកឡើងថា កាលពីសប្ដាហ៍មុន ក្នុងខេត្តនេះក៏មានជំនន់ទឹកភ្លៀងដែរ ប៉ុន្តែមិនបានបង្កផលប៉ះពាល់ធ្ងន់ធ្ងរនោះទេ ខណៈបច្ចុប្បន្ន ស្ថានភាពទឹកបានស្រកចុះវិញហើយ។
ប្រធាននាយកដ្ឋានឧតុនិយម នៃក្រសួងធនធានទឹក និងឧតុនិយម លោក អ៊ុំ រីណា មានប្រសាសន៍ថា តំបន់ទំនាបនឹងរងផលប៉ះពាល់ខ្លាំង ដោយសារតំបន់ទំនាបទទួលរងឥទ្ធិពលព្យុះ «ណូរុ NORU» ហើយនឹងវិវត្តទៅជាព្យុះទីហ្វុង។
លោកថា៖ «ខេត្តព្រះវិហារ ហើយមួយទៀត ទឹកដែលធ្លាក់ពីព្រះវិហារ វាចាក់ចូលមកតាមស្ទឹងសែន [ខេត្ត]កំពង់ធំ អ៊ីចឹងតំបន់ទីទំនាបទទួលទឹកភ្លៀងទទួលរងផលប៉ះពាល់ជាងគេ។ ដូចបានជម្រាបជូន សេចក្ដីជូនដំណឹងទាំងអស់ហ្នឹង ព្រោះហេតុអី? ឥទ្ធិពលរបស់ព្យុះ វាធ្វើឱ្យបណ្ដាខេត្តនៅព្រំប្រទល់យើងនិងថៃមានភ្លៀង អ៊ីចឹងប៉ះពាល់។ អ៊ីចឹងកត្តាដែលនាំឱ្យមានជំនន់ទឹកភ្លៀង មកពីទឹកហូរពីថៃ ដូចខាងព្រំប្រទល់ជាប់ពាយព្យ ជាប់ខេត្តបន្ទាយមានជ័យ និងខាងខេត្តបាត់ដំបងអីហ្នឹង»។
ករណីនេះ លោកថា ក្រសួងធនធានទឹក បានផ្សព្វផ្សាយច្រើនហើយ ដើម្បីឱ្យប្រជាពលរដ្ឋប្រុងប្រយ័ត្ន ខណៈភ្លៀងនៅធ្លាក់ជាបន្តបន្ទាប់នោះ។
លោកថា៖ «ក្នុងនោះ យើងផ្ដោតសំខាន់ណាស់ទៅឱ្យប្រជាពលរដ្ឋ ដែលគាត់រស់នៅប៉ែកខាងលើ ជាប់ជួរភ្នំដងរែក ហើយនឹងប៉ែកខាងពាយព្យ ជាប់ប្រទេសថៃហ្នឹង បងប្អូនប្រជាពលរដ្ឋដែលគាត់នៅជាប់ទីទំនាប ជាប់ភ្នំ ហើយជាប់ផ្លូវស្ទឹងទន្លេហ្នឹង»។
បើតាមសេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម នៅថ្ងៃទី២៧ ខែកញ្ញា ឆ្នាំ២០២២ ឱ្យដឹងថា ចាប់ពីថ្ងៃទី២៧-៣០ ខែកញ្ញានេះ ខេត្តឧត្ដរមានជ័យ ព្រះវិហារ រតនគិរី សៀមរាប បន្ទាយមានជ័យ ប៉ៃលិន បាត់ដំបង និងពោធិ៍សាត់ នឹងអាចមានភ្លៀងធ្លាក់ក្នុងកម្រិតពីបង្គួរទៅច្រើន ដោយសារតែឥទ្ធិពលព្យុះ និងសម្ពាធទាប ដែលប្រឈមនឹងជំនន់ទឹកភ្លៀង និងជំនន់ដោយបរិមាណទឹកហួសកម្រិត។
ចំពោះបណ្ដាខេត្តដទៃទៀត និងរាជធានីភ្នំពេញ ក្រសួងថាក៏នឹងមានភ្លៀងធ្លាក់ក្នុងកម្រិតពីតិចទៅបង្គួរ លើកលែងតែបណ្ដាខេត្តជាប់មាត់សមុទ្រ រួមមាន ខេត្តកោះកុង និងខេត្តព្រះសីហនុ ដែលអាចមានភ្លៀងធ្លាក់ច្រើន។
ចំណែកនៅលើផ្ទៃសមុទ្រវិញ ក្រសួងថាក៏នឹងមានភ្លៀងច្រើន ខ្យល់បោកបក់ខ្លាំង និងរលកសមុទ្រខ្ពស់ ខណៈភ្លៀងនឹងបន្តធ្លាក់ច្រើននៅតំបន់ផ្ទៃរងទឹកភ្លៀងនៃអាងទន្លេមេគង្គ ដែលអាចធ្វើឱ្យទឹកទន្លេមេគង្គមានការងើបកើនឡើងវិញជាបន្តបន្ទាប់៕