ប្រទេសជប៉ុន នៅថ្ងៃអង្គារនេះ នឹងផ្ដល់កិត្តិយសដល់អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ (Shinzo Abe) ដែលត្រូវបានធ្វើឃាត ដោយរៀបចំពិធីបុណ្យសពថ្នាក់ជាតិដ៏កម្រមួយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៧ ខែកញ្ញា ឆ្នាំ២០២២នេះ។
ទោះយ៉ាងណា នៅតែមានការជំទាស់ចំពោះការផ្ដល់កិត្តិយសដល់សពអតីតនាយករដ្ឋមន្រ្តីជប៉ុន លោក អាបេ ជាមួយនឹងពិធីបុណ្យសពជាលើកដំបូងចាប់តាំងពីឆ្នាំ១៩៦៧ ដែលនឹងត្រូវចំណាយប្រាក់អស់១១,៥លានដុល្លារ ហើយរដ្ឋជាអ្នកទទួលខុសត្រូវលើការចំណាយ ខណៈប្រជាពលរដ្ឋកំពុងតែប្រឈមនឹងវិបត្តិសេដ្ឋកិច្ច។
កាលពីថ្ងៃចន្ទម្សិលមិញនេះ លោក ហ៊ីដេមី ណូតូ (Hidemi Noto) ជាជំនួយការអ្នកដឹកនាំរឿងម្នាក់ អាយុ៣៨ឆ្នាំ ដែលបានមកមើលការរៀបចំពិធីបុណ្យនៅសាលនីពុន ប៊ូដូកាន (Nippon Budokan) បាននិយាយថា៖ «ខ្ញុំគិតថាមិនគួររៀបចំពិធីបុណ្យនេះទេ»។
Hidemi Noto បន្ថែមថា៖ «ពិធីបុណ្យនេះខុសគ្នាទាំងស្រុងពីពិធីបុណ្យសពរបស់ប្រជាពលរដ្ឋសាមញ្ញ។ ខ្ញុំគិតថា យើងមិនគួរប្រើប្រាស់ប្រាក់ពន្ធសម្រាប់រៀបចំពិធីបុណ្យនេះឡើយ»។
ទោះយ៉ាងណា ចាប់ពីព្រឹកថ្ងៃអង្គារនេះ ប្រជាពលរដ្ឋបានចាប់ផ្ដើមយកផ្កាទៅដាក់នៅសាលនីពុន ប៊ូដូកាន (Nippon Budokan) លឿនជាងការគ្រោងទុកដោយសារតែជាកាតព្វកិច្ច។
ប្រជាពលរដ្ឋប្រមាណ៤ ៣០០នាក់ ត្រូវបានរំពឹងថានឹងចូលរួមពិធីបុណ្យនៅថ្ងៃអង្គារនេះ និងយ៉ាងហោចណាស់មានអតីតឥស្សរជនរដ្ឋាភិបាល ឬឥស្សរជនរដ្ឋាភិបាលបច្ចុប្បន្ន ចំនួន៤៨នាក់ រួមទាំងអនុប្រធានាធិបតីសហរដ្ឋអាមេរិក លោកស្រី កាម៉ាឡា ហារីស (Kamala Harris) និងនាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) ផងដែរ។ លោក Kishida បានលើកឡើងថា ការរៀបចំពិធីបុណ្យសពនេះ គឺជាឱកាសសម្រាប់ជួបជាមួយមេដឹកនាំអន្តរជាតិ។
លើសពីនេះ មេដឹកនាំប្រទេស G7 ក៏នឹងចូលរួមពិធីបុណ្យសពនេះផងដែរ។
នៅខាងក្នុងសាលនីពុន ប៊ូដូកាន (Nippon Budokan) មានរូបថតដ៏ធំរបស់លោក អាបេ មានបំពាក់ខ្សែបូពណ៌ខ្មៅ ព័ទ្ធជុំវិញដោយផ្កាពណ៌បៃតង ស និងលឿង។ នៅក្បែរនោះមានរូបថតលោក អាបេ ដើរជាមួយមេដឹកនាំប្រទេស G7 កំពុងកាន់ដៃក្មេងៗ និងទស្សនកិច្ចតំបន់ជួបគ្រោះមហន្តរាយ។
នគរបាលរាប់ម៉ឺននាក់នឹងត្រូវដាក់ពង្រាយ ខណៈផ្លូវនិងសាលារៀននៅជិតៗនោះក៏នឹងត្រូវបិទផងដែរ។
ពិធីបុណ្យសពថ្នាក់ជាតិរបស់លោក អេបេ គឺជាពិធីបុណ្យលើកដំបូងចាប់តាំងពីឆ្នាំ១៩៦៧ ដែលមានការរៀបចំពិធីបុណ្យសពដូចគ្នានេះដែរ សម្រាប់អតីតនាយករដ្ឋមន្រ្តីជប៉ុន លោក ស៊ីហ្គឺរូ យូស៊ីដា (Shigeru Yoshida)។
ពាក់ព័ន្ធនឹងករណីនេះ លោក Kishida បានពន្យល់ពីការសម្រេចចិត្តរៀបចំពិធីបុណ្យនេះថា ជាមធ្យោបាយមួយដើម្បីផ្តល់កិត្តិយសដល់សមិទ្ធផលរបស់លោក អាបេ ក៏ដូចជាការគាំទ្រលទ្ធិប្រជាធិបតេយ្យ។ ទោះយ៉ាងណា នៅតែមានការជំទាស់ពីប្រជាពលរដ្ឋ។
យោងតាមការស្ទង់មតិនាពេលថ្មីៗនេះរបស់ TV Asahi មានតែ ៣០% នៃអ្នកឆ្លើយតបដែលបានឯកភាពចំពោះការរៀបចំពិធីបុណ្យសពនេះ និង ៥៤% ជំទាស់។
គួរបញ្ជាក់ថា អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ (Shinzo Abe) ត្រូវបានលួចធ្វើឃាតកាលពីថ្ងៃទី៨ ខែកក្កដា ឆ្នាំ២០២២ ខណៈលោកកំពុងថ្លែងសុន្ទរកថានៅទីក្រុងណារ៉ា (Nara) ភាគខាងលិចប្រទេសជប៉ុន៕