ក្រសួងធនធានទឹក និងឧតុនិយម អំពាវនាវទៅអាជ្ញាធរដែនដី និងពលរដ្ឋនៅតាមបណ្ដាខេត្តមួយចំនួន ប្រុងប្រយ័ត្នចំពោះគ្រោះធម្មជាតិជំនន់ទឹកភ្លៀង ដោយសារភ្លៀងនឹងបន្តធ្លាក់ច្រើននៅតំបន់ផ្ទៃរងទឹកភ្លៀងនៃអាងទន្លេមេគង្គ ដែលអាចធ្វើឱ្យទឹកទន្លេមានការកើនឡើងវិញជាបន្តបន្ទាប់។
ក្នុងសេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម នៅថ្ងៃទី២៧ ខែកញ្ញា ឆ្នាំ២០២២ ឱ្យដឹងថា នៅតាមបណ្តាខេត្តពាយព្យនៃប្រទេសកម្ពុជា ក្នុងនោះមានខេត្តឧត្ដរមានជ័យ ព្រះវិហារ រតនគិរី សៀមរាប បន្ទាយមានជ័យ ប៉ៃលិន បាត់ដំបង និងពោធិ៍សាត់ នឹងអាចមានភ្លៀងធ្លាក់ក្នុងកម្រិតពីបង្គួរទៅច្រើន ដោយសារតែឥទ្ធិពលព្យុះ និងសម្ពាធទាប។
ក្រសួងបញ្ជាក់ថា ភ្លៀងធ្លាក់ក្នុងកម្រិតពីបង្គួរទៅច្រើន បូកផ្សំនឹងបរិមាណទឹកភ្លៀងដែលហូរមកពីប្រទេសថៃបន្ថែមទៀត អាចបង្កឱ្យទីទំនាបជាប់ផ្លូវទឹក និងផ្លូវទឹកនៅក្នុងភូមិសាស្ត្រនៃបណ្តាខេត្តទាំងនោះ ប្រឈមនឹងជំនន់ទឹកភ្លៀង (I-lash flood) និងជំនន់ដោយបរិមាណទឹកហួសកម្រិត (Overflow) ចាប់ពីថ្ងៃទី២៧ ដល់ថ្ងៃទី៣០ ខែកញ្ញា ឆ្នាំ២០២២។
ចំពោះបណ្ដាខេត្តដទៃទៀត និងរាជធានីភ្នំពេញ ក្រសួងថា ក៏នឹងមានភ្លៀងធ្លាក់ក្នុងកម្រិតពីតិចទៅបង្គួរ លើកលែងតែបណ្ដាខេត្តជាប់មាត់សមុទ្រ រួមមាន ខេត្តកោះកុង និងខេត្តព្រះសីហនុ ដែលអាចមានភ្លៀងធ្លាក់ច្រើន។
ចំណែកនៅលើផ្ទៃសមុទ្រវិញ ក្រសួងថាក៏នឹងមានភ្លៀងច្រើន ខ្យល់បោកបក់ខ្លាំង និងរលកសមុទ្រខ្ពស់ ខណៈភ្លៀងនឹងបន្តធ្លាក់ច្រើននៅតំបន់ផ្ទៃរងទឹកភ្លៀងនៃអាងទន្លេមេគង្គ ដែលអាចធ្វើឱ្យទឹកទន្លេមេគង្គមានការងើបកើនឡើងវិញជាបន្តបន្ទាប់។
ករណីនេះ ក្រសួងធនធានទឹក និងឧតុនិយម អំពាវនាវដល់អាជ្ញាធរពាក់ព័ន្ធ អាជ្ញាធរដែនដី និងសាធារណជន បង្កើនការប្រុងប្រយ័ត្នខ្ពស់ ស្របពេលដែលខេត្តឧត្ដរមានជ័យ បន្ទាយមានជ័យ ពោធិ៍សាត់ បាត់ដំបង់ សៀមរាប និងកំពង់ធំ ជាដើម កំពុងរងការជន់លិចដោយសារជំនន់ទឹកភ្លៀង និងទឹកហូរធ្លាក់មកពីប្រទេសថៃ៕
