អាជ្ញាធរខេត្តកំពង់ស្ពឺ បានអំពាវនាវឱ្យប្រជាពលរដ្ឋប្រុងប្រយ័ត្ន ដោយសារបច្ចុប្បន្នទឹកស្ទឹងព្រែកត្នោតបានហក់ឡើងខ្លាំង ដែលអាចបង្កឱ្យមានការលិចលង់តំបន់ខ្លះជាយថាហេតុ។
ក្នុងសេចក្ដីប្រកាសព័ត៌មានរបស់រដ្ឋបាលខេត្តកំពង់ស្ពឺ ចុះថ្ងៃទី២៧ ខែកញ្ញា ឆ្នាំ២០២២ ឱ្យដឹងថា រយៈពេលប៉ុន្មានថ្ងៃកន្លងមកនេះ មានភ្លៀងធ្លាក់ខ្លាំងជាបន្តបន្ទាប់ ដែលធ្វើឱ្យទឹកផ្នែកខាងលើនៃដងស្ទឹងព្រែកត្នោតហក់ឡើងលឿន។
អាជ្ញាធរខេត្តបញ្ជាក់ថា ការហក់ឡើងទឹកស្ទឹងព្រែកត្នោតនេះអាចនឹងធ្វើឱ្យផ្នែកខាងក្រោមមានការលិចលង់តំបន់ខ្លះជាយថាហេតុ ហើយផ្នែកខ្លះត្រូវទទួលរងផលប៉ះពាល់ដល់ដំណាំកសិកម្ម សត្វចិញ្ចឹម ផ្ទះសម្បែង និងហេដ្ឋារចនាសម្ពន្ធនានា ពិសេសអាចបង្កគ្រោះថ្នាក់ដល់អាយុជីវិតប្រជាពលរដ្ឋផងដែរ។
ដើម្បីធានាសុវត្ថិភាព និងបង្ការនូវគ្រោះថ្នាក់ជាយថាហេតុផ្សេងៗឱ្យបានទាន់ពេលវេលា អាជ្ញាធរខេត្តកំពង់ស្ពឺបានអំពាវនាវដល់ប្រជាពលរដ្ឋទាំងអស់ ជាពិសេសប្រជាពលរដ្ឋដែលរស់នៅតំបន់ខាងលើ និងតំបន់ទំនាបនានាផ្នែកខាងក្រោម នៃទ្វារទឹករលាំងជ្រៃ ស្របតាមបណ្ដោយដងស្ទឹងព្រៃកត្នោត ត្រូវប្រុងប្រយ័ត្នខ្ពស់ និងស្វែងរកទីទួលសុវត្ថិភាពដែលនៅជិត ដើម្បីចៀងវាងការកើតមានឡើងនូវគ្រោះថ្នាក់ផ្សេងៗ ដោយថា តំបន់ទាំងនេះងាយរងគ្រោះ។
ជាមួយគ្នានេះ អាជ្ញាធរខេត្តកំពង់ស្ពឺក៏បានណែនាំឱ្យប្រជាពលរដ្ឋដែលរងគ្រោះដោយជំនន់ទឹកភ្លៀង ធ្វើសេចក្ដីរាយការណ៍ទៅអាជ្ញាធរភូមិ ឃុំ-សង្កាត់ ស្រុក និងខេត្តជាបន្ទាន់ ដើម្បីឱ្យអាជ្ញាធរមានលទ្ធភាពចាត់វិធានការដោះស្រាយ ការពារ និងជួយបានទាន់ពេលវេលា។
យ៉ាងណា ក្រសួងធនធានទឹក និងឧតុនិយម ឱ្យដឹងកាលពីថ្ងៃម្សិលមិញថា ការធ្លាក់ភ្លៀងបន្តបន្ទាប់នេះ ដោយសារកម្ពុជាកំពុងទទួលរងឥទ្ធិពលព្យុះ «ណូរុ NORU» ហើយនឹងវិវត្តទៅជាព្យុះទីហ្វុង ចាប់ពីថ្ងៃទី២៧ ដល់ថ្ងៃទី៣០ ខែកញ្ញានេះ ដែលធ្វើឱ្យខេត្តមួយចំនួន ក្នុងនោះមានខេត្តឧត្ដរមានជ័យ ព្រះវិហារ រតនគិរី សៀមរាប បន្ទាយមានជ័យ ប៉ៃលិន បាត់ដំបង និងពោធិ៍សាត់ ប្រឈមនឹងជំនន់ទឹកភ្លៀង និងជំនន់ដោយបរិមាណទឹកហួសកម្រិត។
ចំពោះបណ្ដាខេត្តដទៃទៀត និងរាជធានីភ្នំពេញ ក្រសួងធនធានទឹក ថាក៏នឹងមានភ្លៀងធ្លាក់ក្នុងកម្រិតពីតិចទៅបង្គួរ លើកលែងតែបណ្ដាខេត្តជាប់មាត់សមុទ្រ រួមមាន ខេត្តកោះកុង និងខេត្តព្រះសីហនុ ដែលអាចមានភ្លៀងធ្លាក់ច្រើន។
ចំណែកនៅលើផ្ទៃសមុទ្រវិញ ក្រសួងថាក៏នឹងមានភ្លៀងច្រើន ខ្យល់បោកបក់ខ្លាំង និងរលកសមុទ្រខ្ពស់ ខណៈភ្លៀងនឹងបន្តធ្លាក់ច្រើននៅតំបន់ផ្ទៃរងទឹកភ្លៀងនៃអាងទន្លេមេគង្គ ដែលអាចធ្វើឱ្យទឹកទន្លេមេគង្គមានការងើបកើនឡើងវិញជាបន្តបន្ទាប់៕
