ជនបរទេសរាប់រយនាក់ត្រូវបានសង្រ្គោះពីទីតាំងមួយចំនួនក្នុងរាជធានីភ្នំពេញ ខណៈនគរបាលទទួលស្គាល់ថាមានការបង្ខាំង ការធ្វើទារុណកម្ម ការជំរិតទារប្រាក់ និងការជួញដូរមនុស្ស។
ពាក់ព័ន្ធនឹងករណីនេះ រដ្ឋមន្ត្រីក្រសួងមហាផ្ទៃ លោក ស ខេង ជំរុញឱ្យចាត់វិធានការប្រឆាំងការជួញដូរមនុស្សក្នុងប្រតិបត្តិការទាំងនោះ។ ជនរងគ្រោះជាជនបរទេសជាច្រើន បាននិយាយថា ពួកគេត្រូវបានឆបោកឱ្យមកធ្វើការក្នុងប្រទេសកម្ពុជា ដោយសន្យាថាផ្ដល់ការងារស្របច្បាប់ តែផ្ទុយទៅវិញ ពួកគេក្លាយជាទាសភាពបំណុល និងត្រូវបានបង្ខំឱ្យធ្វើការឆបោកតាមអ៊ីនធឺណិត។ គេជឿថា មនុស្សរាប់ពាន់នាក់បានធ្វើការនៅក្នុងប្រតិបត្តិការឆបោក។
មជ្ឈមណ្ឌលនៃប្រតិបត្តិការឆបោក ភាគច្រើនស្ថិតនៅខេត្តព្រះសីហនុ ដែលជារឿយៗជាបរិវេណកាស៊ីណូតាមអ៊ឺនធឺណិតដែលត្រូវបានទុកចោល ក៏ដូចជាកាស៊ីណូនានានៅតាមព្រំដែន។ ទោះយ៉ាងណា នៅរាជធានីភ្នំពេញ ក៏មានប្រតិបត្តិឆបោកកើតឡើងច្រើនផងដែរ ហើយក្នុងអំឡុងខែកញ្ញានេះ នគរបាលបានឆ្មក់ចូលទីតាំងសង្ស័យយ៉ាងហោចណាស់១១ទីតាំង។
នៅសណ្ឋាគារ ឌីវីត ស្ថិតក្នុងខណ្ឌសែនសុខ មនុស្សចំនួន២៤៩នាក់ រួមមាន ជនជាតិបង់ក្លាដែស កម្ពុជា ចិន ឥណ្ឌូនេស៊ី ម៉ាឡេស៊ី មីយ៉ាន់ម៉ា នេប៉ាល់ តៃវ៉ាន់ និងវៀតណាម ត្រូវបានសង្រ្គោះ និងសាកសួរជុំវិញករណី «ល្បែងស៊ីសងតាមអ៊ីនធឺណិតខុសច្បាប់»។ នេះបើយោងតាមការឱ្យដឹងពីមន្ត្រីនគរបាលខណ្ឌសែនសុខ។ ការឆ្មក់ចូលកាលពីថ្ងៃទី១១ ខែកញ្ញា ក៏បានរឹបអូសកុំព្យូទ័រចំនួន១៦០គ្រឿងផងដែរ ហើយទីតាំងនោះកំពុងស្ថិតក្រោមការឃ្លាំមើល។
នៅអាផាតមិន (Apartment) ចំនួន២ផ្សេងទៀតក្នុងខណ្ឌសែនសុខ ជនជាតិចិនចំនួន១០នាក់ និងជនជាតិវៀតណាមចំនួន៧នាក់ ត្រូវបានសួរនាំ ហើយទូរសព្ទចំនួន៣៦០គ្រឿង និងអាក្រង់កុំព្យូទ័រ (Monitors) ១០០គ្រឿង ត្រូវបានរឹបអូសកាលពីថ្ងៃទី១០ និងថ្ងៃទី២០ ខែកញ្ញា។
រដ្ឋបាលខណ្ឌដូនពេញ បានឱ្យដឹងថា នៅថ្ងៃទី១០ ខែកញ្ញា នគរបាលបានឆ្មក់ចូលសណ្ឋាគារ Min ដែលស្ថិតនៅសង្កាត់ផ្សារថ្មីទី៣ និងបានរកឃើញទូរសព្ទចំនួន៧២គ្រឿងនៅក្នុងបន្ទប់មួយ ព្រមទាំងកុំព្យូទ័រចំនួន២គ្រឿងនៅក្នុងបន្ទប់មួយទៀត ប៉ុន្តែគ្មានមនុស្សនៅទេ។
រដ្ឋបាលខណ្ឌដូនពេញ បានឱ្យដឹងទៀតថា កម្លាំងសមត្ថកិច្ចចុះទៅដល់ខុនដូមួយកន្លែងក្នុងសង្កាត់ស្រះចក ផ្លូវលេខ៦៥ កាលពីថ្ងៃទី១៩ ខែកញ្ញា ដោយបានរកឃើញអ្នកគ្រប់គ្រងទីតាំង បុគ្គលិក និងអ្នកបកប្រែជាជនជាតិចិន បានវេចខ្ចប់ឧបករណ៍ល្បែងស៊ីសងខុសច្បាប់។ សមត្ថកិច្ចបានណែនាំអ្នកគ្រប់គ្រងពីការហាមឃាត់ល្បែងស៊ីសង និងការជួញដូរខុសច្បាប់គ្រប់ប្រភេទ ហើយត្រូវសហការជាមួយអាជ្ញាធរ បើមិនដូច្នេះទេ នឹងត្រូវប្រឈមមុខនឹងច្បាប់។
រដ្ឋបាលខណ្ឌចំការមន បាននិយាយថា ទីតាំងមួយកន្លែងនៅទល់មុខស្ថានទូតអូស្ត្រាលី ត្រូវបានឆ្មក់ចូលកាលពីថ្ងៃទី១៩ ខែកញ្ញា ពីបទសង្ស័យជាប់ពាក់ព័ន្ធនឹង «ប្រតិបត្តិការឆបោកតាមអ៊ីនធឺណិត»។
ទោះយ៉ាងណា មន្ត្រីនគរបាលរាជធានីភ្នំពេញ បានទទួលស្គាល់ថាមានការបង្ខាំង ការធ្វើទារុណកម្ម ការជំរិតទារប្រាក់ និងការជួញដូរមនុស្ស ក្នុងអំឡុងពេលចាប់ខ្លួនមនុស្ស៧នាក់ នៅទីតាំង២កន្លែង គឺសណ្ឋាគារឡាក់គីស្តារ ក្នុងសង្កាត់ផ្សារដើមគរ កាលពីថ្ងៃទី២០ ខែកញ្ញា និងសណ្ឋាគារ Fairyland ក្នុងសង្កាត់៧មករា កាលពីថ្ងៃទី២២ ខែកញ្ញា។
លោក លូ ហ្ស៊ាងរី (Lu Xiangri) ជាអ្នកជួយសង្គ្រោះជនជាតិចិន ដែលបានព្យាយាមជួយសង្រ្គោះជនរងគ្រោះពីការជួញដូរមនុស្សពីអាផាតមិនមួយកន្លែងក្នុងខណ្ឌសែនសុខ។ កន្លងមក ជនជាតិវៀតណាមក៏ត្រូវបានជួយសង្គ្រោះពីទីតាំងនៅទល់មុខនឹងស្ថានទូតអូស្ត្រាលីផងដែរ។
កាលពីថ្ងៃចន្ទ ទី២៦ ខែកញ្ញា ចៅសង្កាត់បឹងទំពុនទី១ លោក សួស សារិន ក៏បានទទួលស្គាល់ការឆ្មក់ចូលនៅខុនដូមួយកន្លែងដែល វីអូឌី ធ្លាប់បានរាយការណ៍ថា ជនជាតិឥណ្ឌូនេស៊ីមួយក្រុមត្រូវបានបង្ខំឱ្យធ្វើការឆបោកតាមអ៊ីនធឺណិត មុនពេលត្រូវបានជួយសង្គ្រោះ។ ក្រុមជនរងគ្រោះទាំងនោះ ត្រូវបានសម្ភាសបន្ទាប់ពីត្រលប់ទៅកោះបាតាំ (Batam) វិញ ក្នុងប្រទេសឥណ្ឌូនេស៊ី។
សមត្ថកិច្ចក៏បានបន្តប្រតិបត្តិការសង្រ្គោះនៅក្រៅរាជធានីភ្នំពេញផងដែរ។ នៅខេត្តព្រះសីហនុ ការឆ្មក់ចូលទីតាំងចំនួន៣ ចាប់ពីថ្ងៃទី១៨ ដល់ថ្ងៃទី២២ ខែកញ្ញា បានសង្រ្គោះជនបរទេសចំនួន១ ០៤៥នាក់ រួមមាន ជនជាតិបង់ក្លាដែស ចិន ឥណ្ឌា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា រុស្ស៊ី តៃវ៉ាន់ ថៃ និងវៀតណាម។ នេះបើយោងតាមមន្ត្រីនគរបាលខេត្តព្រះសីហនុ។
ពលរដ្ឋខ្មែរចំនួន៨នាក់ក៏ត្រូវបានចាប់ខ្លួនផងដែរ ពីបទបង្ខំមនុស្សឱ្យធ្វើការនៅទីតាំង Galaxy World ដែលមានអគារចំនួន៣ និងបន្ទប់ជាង២០០។ មន្ត្រីនគរបាលបានរកឃើញការជួញដូរមនុស្ស ការជួញដូររូបិយបណ្ណខុសច្បាប់ លក្ខខណ្ឌការងារខុសច្បាប់ និងការលេងល្បែងស៊ីសងតាមអ៊ីនធឺណិត។ មន្ត្រីនគរបាលខេត្តព្រះសីហនុបានឱ្យដឹងទៀតថា បុគ្គលិកដែលមិនមានឯកសារត្រឹមត្រូវ នឹងរងការផាកពិន័យ។
រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាឱ្យបញ្ជូនជនបរទេសរាប់រយនាក់ត្រលប់ទៅប្រទេសរបស់ពួកគេវិញ ចេញពីទីតាំងមួយទៀតដែលមានឈ្មោះថា Pao Yong Technology និងបញ្ជាឱ្យបិទអាជីវកម្មទាំងអស់នៅ Jincai ។
រដ្ឋបាលខេត្តកណ្តាល បានឱ្យដឹងថា សណ្ឋាគារមួយកន្លែងនៅក្រុងតាខ្មៅ ក៏ត្រូវបានបិទផងដែរ បន្ទាប់ពីមានការឆ្មក់ចូលកាលពីថ្ងៃទី២០ ខែកញ្ញា ហើយជនជាតិចិនជាច្រើននាក់ត្រូវបានសង្រ្គោះ។
កាលពីថ្ងៃទី២២ ខែកញ្ញា អ្នកនាំពាក្យក្រសួងការបរទេសវៀតណាម បាននិយាយថា ពលរដ្ឋវៀតណាមជាង១ ០០០នាក់ ដែលចាញ់បោកគេមកធ្វើការដោយខុសច្បាប់នៅក្នុងប្រទេសកម្ពុជា ឥលូវនេះត្រូវបានជួយសង្គ្រោះហើយ។ នេះបើយោងតាមទីភ្នាក់ងារសារព័ត៌មាន Vietnam Plus។
តំណាងអង្គការប្រឆាំងការឆបោកជាសកល (Global Anti-Scam Organization) ដែលជាក្រុមអ្នកស្ម័គ្រចិត្ដដែលបានចូលរួមក្នុងការជួយសង្គ្រោះជនរងគ្រោះពីទីតាំងឆបោក បាននិយាយថា អាជ្ញាធរកម្ពុជាបានបង្ហាញពីការចាត់វិធានការ ប៉ុន្តែមិនច្បាស់ថាតើអ្នកគ្រប់គ្រងប្រតិបត្តិការឆបោកទាំងនោះត្រូវបានឃាត់ខ្លួនឬយ៉ាងណា។
តំណាងអង្គការមួយនេះបានបន្តថា៖ «ពួកគេ [អាជ្ញាធរ] បានព្យាយាម ប៉ុន្តែខ្ញុំមិនប្រាកដថាតើមេធំត្រូវបានចាប់ខ្លួនឬអត់នោះទេ ហើយខ្ញុំគិតថានេះជាចំណុចដែលគួរឱ្យបារម្ភបំផុត។ គួរមានតម្លាភាពជាងនេះ ចំពោះសាធារណជន ព្រោះយើងគិតថាមេធំមិនត្រូវបានចាប់ខ្លួនឡើយ»។
អភិបាលរាជធានីភ្នំពេញ លោក ឃួង ស្រេង បានបដិសេធអត្ថាធិប្បាយជុំវិញករណីនេះ ដោយប្រាប់ថាជាប់ប្រជុំ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Over 10 Phnom Penh Condos, Hotels Raided Over Trafficking, Online ‘Services’
រាយការណ៍បន្ថែមដោយ៖ គៀត សុរិទ្ធធាវី