លោកនាយករដ្ឋមន្ត្រី ហ៊ុន សែន បញ្ជាទៅអាជ្ញាធរពាក់ព័ន្ធគ្រប់លំដាប់ថ្នាក់ បន្តចុះបង្ក្រាបល្បែងស៊ីសងខុសច្បាប់ឱ្យដូចភ្លៀងរលឹម ដោយកុំចាំតែបទបញ្ជា ហើយត្រូវចាប់មេខ្លោងធំយកទៅអនុវត្តតាមច្បាប់ ដើម្បីបង្កើនសុវត្ថិភាព សន្តិសុខ សណ្ដាប់ធ្នាប់សង្គម និងជាការរួមចំណែកកាត់បន្ថយការជួញដូរមនុស្ស។
ក្នុង «វេទិកាអន្តរសាសនាប្រឆាំងការជួញដួរមនុស្ស» នាព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានថ្លែងថា បញ្ហាល្បែងស៊ីសងខុសច្បាប់បានកើតឡើងច្រើននៅក្នុងប្រទេស ដែលទាមទារឱ្យគ្រប់តួអង្គទាំងអស់ត្រូវធ្វើសកម្មភាពព្រមៗគ្នាក្នុងការទប់ស្កាត់បញ្ហានេះ។ បើតាមលោកនាយករដ្ឋមន្ត្រី ក្រោយពីរដ្ឋាភិបាលបានបង្កើតក្រុមការងារ និងគណៈកម្មការដើម្បីបង្ក្រាបបញ្ហាល្បែងស៊ីសងនេះបានមួយថ្ងៃ គ្រាន់តែនៅក្នុងខេត្តកណ្ដាល បង្ក្រាបករណីល្បែងស៊ីសងបានជាង៧០០កន្លែង និងនៅរាជធានីភ្នំពេញ ជាង១ ០០០កន្លែង។
លោកថា៖ «អាហ្នឹងវាទាក់ទងជាមួយនឹងបញ្ហាភូមិឃុំមានសុវត្ថិភាព ដែលយើងបានដាក់ឱ្យអនុវត្តច្រើនឆ្នាំហើយ កន្លែងល្បែងស៊ីសង វាមិនដែលកើតនៅលើមេឃទេ វាកើតនៅលើដី ដីហ្នឹងវានៅតាមឃុំ តាមស្រុក តាមខេត្តនោះឯង! បញ្ហាវាស្ថិតនៅត្រង់យើងធ្វើឬមិនធ្វើ! អ៊ីចឹងខ្ញុំគួរតែនិយាយថា កុំចាំបាច់ដល់រដ្ឋមន្ត្រីក្រសួងមហាផ្ទៃស្រែក ឬកុំចាំបាច់ដល់នាយករដ្ឋមន្ត្រីស្រែក ចាំធ្វើ នាំគ្នាធ្វើឱ្យដូចភ្លៀងរលឹមទៅ។ កន្លែងខ្លះជាកន្លែងផឹកកាហ្វេសោះ ក៏ប៉ុន្តែទៅជាកន្លែងដែលភ្នាល់ដ៏កាក់កប ជាអនឡាញ ប្រណាំងសេះ ទាត់បាល់អីណា ពេញទឹកពេញដីទាំងអស់»។
លោកនាយករដ្ឋមន្ត្រី ហ៊ុន សែន បន្តថា ដើមចមដែលនាំឱ្យមានល្បែងស៊ីសងខុសច្បាប់នៅកម្ពុជា មិនមែនជាកំហុសរបស់ប្រជាពលរដ្ឋទាំងស្រុងនោះទេ តែបញ្ហានេះក៏ផ្ដើមចេញពីម្ចាស់ក្រុមហ៊ុនឆ្នោតផងដែរ ដែលករណីនេះ លោកបញ្ជាឱ្យមានការតាមចាប់មេខ្លោងធំយកមកអនុវត្តតាមច្បាប់ឱ្យខានតែបាន ដើម្បីទប់ស្កាត់បញ្ហានេះឱ្យមានប្រសិទ្ធភាព។
លោកបន្ថែមថា៖ «បើនិយាយពីគោលដៅបង្ក្រាប វាមិនច្រើនទេ! ឧទាហរណ៍ មេកន្ទុយលេខ គេត្រូវការបង្ក្រាបតែមេកន្ទុយលេខតែម្នាក់តើ! ព្រោះអ្នកដែលទៅទិញកន្ទុយលេខ មិនមែនជាគោលដៅដែលត្រូវបង្រ្កាបទេ អប់រំគេឱ្យឈប់លេងទៅ! ប៉ុន្តែអ្នកដែលដើរលក់កន្ទុយលេខ អ្នកហ្នឹងហើយដែលជាគោលដៅដែលយើងយកមកអនុវត្តផ្លូវច្បាប់»។
កាលពីថ្ងៃទី១៧ ខែកញ្ញា ឆ្នាំ២០២២ លោក ហ៊ុន សែន ក៏បានថ្លែងសារជាសំឡេង ដោយបញ្ជាទៅអភិបាលរាជធានី-ខេត្ត និងនគរបាល ឱ្យបិទរាល់ហាងកាហ្វេ ហាងគុយទាវ និងគ្រប់ទីតាំងទាំងអស់ដែលបើកឱ្យមានលេងល្បែងស៊ីសងខុសច្បាប់គ្រប់ប្រភេទ តាមមូលដ្ឋានរបស់ខ្លួន ខណៈអភិបាលរាជធានី-ខេត្ត ឬមន្ត្រីនគរបាលណាដែលមិនបានអនុវត្តតួនាទីរបស់ខ្លួន ត្រូវដកតំណែងតែម្ដង។
មន្ត្រីស៊ើបអង្កេតជាន់ខ្ពស់នៅសមាគមការពារសិទ្ធិមនុស្សអាដហុក លោក ស៊ឹង សែនករុណា សង្កេតឃើញថា មេខ្លោងបើកល្បែងស៊ីសងខុសច្បាប់ ដូចជា ឆ្នោតឡូតូ កន្ទុយលេខ និងល្បែងភ្នាល់តាមអនឡាញខុសច្បាប់ ជាដើម បានកើតមាននៅតាមបណ្តារាជធានី-ខេត្តទូទាំងប្រទេស ខណៈអាជ្ញាធរហាក់នៅមិនទាន់ចាត់វិធានការច្បាប់ឱ្យបានម៉ឺងម៉ាត់លើម្ចាស់អាជីវកម្មខុសច្បាប់ទាំងនោះនៅឡើយទេ។
ករណីនេះ លោកជំរុញទៅរដ្ឋាភិបាលនិងអាជ្ញាធរពាក់ព័ន្ធពង្រឹងការអនុវត្តច្បាប់ និងអនុវត្តឱ្យមានតម្លាភាព ដោយមិនប្រកាន់បក្ខពួក បញ្ឈប់ការផ្តល់អាជ្ញាបណ្ណដល់ក្រុមហ៊ុនល្បែងស៊ីសង ហើយចាត់វិធានការច្បាប់លើមេខ្លោងម្ចាស់អាជីវកម្មបើកល្បែងស៊ីសងខុសច្បាប់ទាំងនោះ ដើម្បីកាត់បន្ថយអំពើល្មើស និងផលប៉ះពាល់ដល់ប្រជាពលរដ្ឋ។
លោកថ្លែងថា៖ «បើសិនជារដ្ឋាភិបាលមិនផ្តល់អាជ្ញាបណ្ណឬក៏អនុញ្ញាតឱ្យក្រុមហ៊ុនទាំងអស់ហ្នឹងបើកល្បែងទាំងអស់ហ្នឹងទេ អ្នកដែលនៅលក់ដូរតូចតាចផ្នែកខាងក្រោម ក៏មិនអាចធ្វើទៅបានដែរ អ៊ីចឹងគួរតែធ្វើឡើងចាប់ផ្តើមពីមេខ្លោង ឬអ្នកដែលបើកល្បែងខាងលើមុន។ ខ្ញុំជឿថា បើសិនជាចាត់វិធានការលើថៅកែបើកល្បែងធំៗហ្នឹងមុន អ្នកខាងក្រោមច្បាស់ជាគាត់មិនដឹងជាលក់ឱ្យអ្នកណាទេ អ៊ីចឹងខ្ញុំគិតថា ក៏ជាការកាត់បន្ថយមួយសម្រាប់ការប៉ះពាល់ទៅដល់ពលរដ្ឋផ្សេងៗទៀតដែរ» ៕
