លោកនាយករដ្ឋមន្ត្រី ហ៊ុន សែន អំពាវនាវទៅអាជ្ញាធរពាក់ព័ន្ធទាំងអស់ និងអ្នកកាន់សាសនាផ្សេងៗ រួមគ្នាប្រយុទ្ធប្រឆាំងនឹងអំពើទុច្ចរិតឱ្យបានព្រមៗគ្នា ដើម្បីកុំឱ្យកម្ពុជាក្លាយជាឋានសួគ៌នៃឧក្រិដ្ឋកម្ម កន្លែងលាងលុយ ការជួញដូរមនុស្ស និងបទល្មើសផ្សេងៗ។
ក្នុង «វេទិកាអន្តរសាសនាប្រឆាំងការជួញដួរមនុស្ស» លោកនាយករដ្ឋមន្ត្រី ហ៊ុន សែន បានថ្លែងនាព្រឹកថ្ងៃព្រហស្បតិ៍នេះថា កាលពីមុន មានតែពលរដ្ឋកម្ពុជាទេ ដែលត្រូវគេជួញដូរកម្លាំងពលកម្មឱ្យទៅធ្វើការនៅលើទូកនេសាទ និងជួញដូរផ្លូវភេទទៅក្រៅប្រទេស ជាដើម។ ប៉ុន្តែបច្ចុប្បន្ននេះ លោកថាមានជនខិលខូចមួយចំនួនបានលួងលោមជនបរទេសឱ្យមកធ្វើការនៅកម្ពុជា ដោយថានឹងទទួលបានប្រាក់ខែច្រើន តែជាក់ស្ដែងនៅពេលពួកគេមកដល់កម្ពុជា ត្រូវបានក្រុមឧក្រិដ្ឋជននាំយកមកជួញដូរទៅវិញ។
លោកនាយករដ្ឋមន្ត្រី ហ៊ុន សែន ថ្លែងបញ្ជាក់ថា ការជួញដូរមនុស្សជាបញ្ហាសាកល ដែលទាមទារឱ្យអាជ្ញាធរពាក់ព័ន្ធទាំងអស់ និងអ្នកកាន់សាសនាផ្សេងៗ រួមគ្នាប្រយុទ្ធប្រឆាំងនឹងអំពើទុច្ចរិតឱ្យបានព្រមៗគ្នា ដើម្បីកុំឱ្យកម្ពុជាក្លាយជាកន្លែងឧក្រិដ្ឋកម្ម កន្លែងលាងលុយ ការជួញដូរមនុស្ស និងបទល្មើសផ្សេងៗ ជាដើម។
លោកថ្លែងដូច្នេះថា៖ «កុំឱ្យកម្ពុជាក្លាយទៅជាឋានសួគ៌នៃឧក្រិដ្ឋកម្ម ជាកន្លែងលាងលុយ[កខ្វក់]នៅទីនេះ ជាកន្លែងជួញដូរមនុស្សនៅទីនេះ»។
ជាមួយគ្នានេះដែរ លោកនាយករដ្ឋមន្ត្រី ហ៊ុន សែន ក៏បានប្រកាសយកថ្ងៃទី២០ ខែសីហា ជារៀងរាល់ឆ្នាំ ដើម្បីប្រារព្ធ «ទិវាជាតិអន្តរសាសនាប្រឆាំងការជួញដូរមនុស្ស»។ តែយ៉ាងណា លោកថា ទិវានេះមិនធ្វើតែមួយថ្ងៃ នៅថ្ងៃ២០ ខែសីហា នោះទេ តែត្រូវធ្វើជារៀងរាល់ថ្ងៃ ដើម្បីរួមគ្នាប្រយុទ្ធប្រឆាំង និងទប់ស្កាត់ការជួញដូរមនុស្សនៅកម្ពុជា។
មន្ត្រីស៊ើបអង្កេតជាន់ខ្ពស់នៅសមាគមការពារសិទ្ធិមនុស្សអាដហុក លោក ស៊ឹង សែនករុណា សង្កេតឃើញថា កន្លងមក ជនរងគ្រោះដោយអំពើជួញដូរមនុស្ស ភាគច្រើនជាជនបរទេសដែលចូលមកប្រកបមុខរបរនៅកម្ពុជា ជាពិសេសនៅអំឡុងពេលបើកល្បែងតាមអនឡាញឡើងវិញ។ លោកបន្តថា ជនប្រព្រឹត្តអំពើជួញដូរមនុស្ស បង្ខាំងមនុស្សខុសច្បាប់ និងបង្កជាបទល្មើសផ្សេងៗភាគច្រើនជាជនជាតិចិន ហើយពួកគេមានជាប់ពាក់ព័ន្ធជាមួយមន្ត្រីមានឥទ្ធិពល និងអ្នកមានលុយមានអំណាចមួយចំនួននៅពីក្រោយខ្នង។
យ៉ាងណា លោកគាំទ្រវិធានការរបស់រដ្ឋាភិបាល ក្នុងការជំរុញទៅគ្រប់ភាគីពាក់ព័ន្ធឱ្យរួមគ្នាទប់ស្កាត់ការជួញដូរមនុស្ស ដើម្បីបង្កើនសុវត្ថិភាព សន្តិសុខ សណ្ដាប់ធ្នាប់សង្គម។ ប៉ុន្តែមន្ត្រីសិទ្ធិមនុស្សរូបនោះបញ្ជាក់ថា ដើម្បីឱ្យការអនុវត្តវិធានការរបស់រដ្ឋាភិបាលមានប្រសិទ្ធភាព លុះត្រាតែពង្រឹងការអនុវត្តច្បាប់ឱ្យមានតម្លាភាព និងមិនប្រកាន់បក្ខពួកទៅលើជនល្មើសនិងអ្នកពាក់ព័ន្ធ។
លោកបញ្ជាក់ថា៖ «ប្រមុខរដ្ឋាភិបាលត្រូវជំរុញឱ្យអ្នកដែលមានតួនាទីអនុវត្តច្បាប់ បើសិនជាពួកគេមិនអនុវត្តច្បាប់ ត្រូវមានវិធានការដកតួនាទី ឬក៏វិធានការតាមច្បាប់ ប្រសិនជារកឃើញថា អ្នកទាំងអស់ហ្នឹងពាក់ព័ន្ធ ឬផលប្រយោជន៍នៃការប្រព្រឹត្តអំពើពុករលួយណាមួយ មិនត្រូវទុកពួកគេឱ្យនៅកាន់តួនាទីទាំងអស់នោះទេ។ អ៊ីចឹងបញ្ហានេះ យើងអាចធ្វើឡើង អាចបញ្ចប់នូវអំពើប្រព្រឹត្តទាំងអស់ហ្នឹងបានហើយ»។
ក្នុងពិធីមួយកាលពីថ្ងៃទី២០ ខែកញ្ញា ឆ្នាំ២០២២ រដ្ឋមន្ត្រីក្រសួងមហាផ្ទៃ លោក ស ខេង ធ្លាប់បានបញ្ជាក់ថា ចាប់ពីថ្ងៃទី១៨ ខែសីហា ដល់ថ្ងៃទី១៨ ខែកញ្ញា ឆ្នាំ២០២២ ក្រសួងបានទទួលបណ្ដឹងសរុបចំនួន២៨៩ករណី ពាក់ព័ន្ធនឹងការជួញដូរមនុស្ស និងបង្ខាំងមនុស្សខុសច្បាប់ ពីសាម៉ីជន សាច់ញាតិ ស្ថានទូត និងអង្គការអន្តរជាតិមួយចំនួន ក្នុងនោះ ខេត្តព្រះសីហនុនាំមុខគេ ដែលមានចំនួនរហូតដល់២១២ករណី ក្នុងចំណោមរាជធានី-ខេត្តចំនួន៩ផ្សេងទៀត ដូចជា ខេត្តស្វាយរៀង កណ្ដាល ឧត្ដរមានជ័យ ពោធិ៍សាត់ និងរាជធានីភ្នំពេញ ជាដើម។
លោកគូសបញ្ជាក់ថា ឆ្លងកាត់ការអនុវត្តជាក់ស្ដែង និងចុះស្រាវជ្រាវពីមន្ត្រីជំនាញ ៩៥ភាគរយនៃពាក្យបណ្ដឹងជាការពិត ហើយសមត្ថកិច្ចបានជួយសង្គ្រោះជនរងគ្រោះចំនួន១៧៦នាក់ មាន៨សញ្ជាតិ ក្នុងនោះ ខេត្តព្រះសីហនុ មានច្រើនជាងគេ។
លោក ស ខេង បញ្ជាក់ថា ភាគច្រើននៃជនរងគ្រោះ គឺធ្វើការនៅកន្លែងអាជីវកម្មល្បែងភ្នាល់អនឡាញខុសច្បាប់ ដែលការណ៍នេះនឹងជំរុញឱ្យមានបទល្មើសជួញដូរមនុស្សគ្រប់ទម្រង់ បទល្មើសគ្រឿងញៀន ភេរវកម្ម លួចឆក់ប្លន់ បទល្មើសជំរិតទារប្រាក់ ធ្វើទារុណកម្ម ឃាតកម្ម ការសងសឹក ការប្រើប្រាស់អាវុធខុសច្បាប់ បទល្មើសអន្តោប្រវេសន៍ខុសច្បាប់ និងបទល្មើសសម្អាតប្រាក់ បង្កផលប៉ះពាល់ដល់ការកសាងយុត្តិធម៌សង្គម។
សូមរំឭកថា កម្ពុជាក្រៅពីជាប់ក្នុងបញ្ជីខ្មៅនៃអំពើជួញដូរមនុស្សរបស់សហរដ្ឋអាមេរិក ក៏ជាប់ក្នុងបញ្ជីប្រផេះលាងលុយកខ្វក់ ឬប្រទេសតាមដានលើករណីលាងលុយខុសច្បាប់របស់ក្រុមការងារហិរញ្ញវត្ថុអន្តរជាតិ ៤ឆ្នាំជាប់គ្នា ចាប់ពីឆ្នាំ២០១៨មក ដែលការណ៍នេះ លោក ស ខេង ធ្លាប់បង្ហាញការព្រួយបារម្ភថា បើកម្ពុជារអិលធ្លាក់ក្នុងបញ្ជីខ្មៅនៃការលាងលុយកខ្វក់នោះ កម្ពុជានឹងជួបវិបត្តិ ទាំងវិស័យនយោបាយ និងវិស័យធនាគារ ពាក់ព័ន្ធទៅនឹងយន្តការផ្ទេរប្រាក់តាមយន្តការអន្តរជាតិ៕