ប្រភពមួយបានឱ្យដឹងថា តុលាការដែលគ្រប់គ្រងដោយរបបយោធាមីយ៉ាន់ម៉ា នៅថ្ងៃព្រហស្បតិ៍នេះ បានកាត់ទោសអតីតមេដឹកនាំមីយ៉ាន់ម៉ាដែលត្រូវបានទម្លាក់ពីតំណែង លោកស្រី អ៊ុងសាន ស៊ូជី និងអតីតទីប្រឹក្សាសេដ្ឋកិច្ចរបស់លោកស្រីមួយរូប លោក សន ថឺនែល (Sean Turnell) ឱ្យជាប់ពន្ធនាគាររយៈពេល៣ឆ្នាំ ពីបទ «រំលោភការសម្ងាត់រដ្ឋ»។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រភពដែលសុំមិនបញ្ចេញឈ្មោះ ឱ្យដឹងទៀតថា៖ «ពួកគេទាំងពីរនាក់ត្រូវបានតុលាការកាត់ទោសឱ្យជាប់ពន្ធនាគារម្នាក់រយៈពេល៣ឆ្នាំ ដោយមិនមានការពិន័យអ្វីផ្សេងក្រៅពីនេះឡើយ»។
លោកស្រី អ៊ុងសាន ស៊ូជី និងសេដ្ឋវិទូជនជាតិអូស្ត្រាលី លោក សន ថឺនែល ព្រមទាំងសមាជិកមួយចំនួននៃក្រុមសេដ្ឋកិច្ចរបស់លោកស្រី គឺស្ថិតក្នុងចំណោមមនុស្សរាប់ពាន់នាក់ផ្សេងទៀតដែលត្រូវបានចាប់ខ្លួន គិតចាប់តាំងពីក្រុមយោធាបានដណ្តើមអំណាចយកមកគ្រប់គ្រង កាលពីខែកុម្ភៈឆ្នាំមុនដែលក្នុងនោះរួមមានទាំងអ្នកនយោបាយ សមាជិកសភា សិស្ស និងអ្នកកាសែតផងដែរ។
លោក សៀន ថឺនែល បច្ចុប្បន្នក៏រងនូវការចោទប្រកាន់ពីបទ «រំលោភលើច្បាប់អន្តោប្រវេសន៍» ដែលប្រឈមនឹងការជាប់ពន្ធនាគាររហូតដល់៥ឆ្នាំផងដែរ ខណៈម្ចាស់ពានរង្វាន់ណូបែលសន្តិភាព លោកស្រី អ៊ុងសាន ស៊ូជី ក៏ត្រូវបានតុលាការចោទប្រកាន់លើបទល្មើសប្រមាណជាង២០ករណី ដែលអាចនឹងជាប់ពន្ធនាគារសរុបរហូតដល់រយៈពេលប្រមាណជា១៩០ឆ្នាំ បើតុលាការរកឃើញថា លោកស្រីមានកំហុសក្នុងសំណុំរឿងទាំងនេះ។
ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រង កាលពីថ្ងៃទី១ ខែកុម្ភៈ ឆ្នាំមុន និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះជនស៊ីវិលរាប់ពាន់នាក់ក៏ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានាផងដែរ៕