អាជ្ញាធរបានប្រាប់ប្រជាពលរដ្ឋដែលរស់នៅតាមដងស្ទឹងព្រែកត្នោតឱ្យមានការប្រុងប្រយ័ត្ន ខណៈកម្ពស់ទឹកកើនឡើង ហើយទ្វារទឹកខាងលើត្រូវបានបើកដើម្បីរំដោះសម្ពាធទឹក រីឯក្រសួងធនធានទឹក និងឧតុនិយម បានព្យាករថា ទឹកទន្លេមេគង្គនឹងហក់ឡើងក្នុងរយៈពេល៣ទៅ៥ថ្ងៃខាងមុខ។
ស្ទឹងព្រែកត្នោត ដែលមានប្រភពចាប់ពីភ្នំឱរ៉ាល់ ស្រុកឱរ៉ាល់ ខេត្តកំពង់ស្ពឺ ដល់រាជធានីភ្នំពេញ បានបង្កឱ្យមានទឹកជំនន់ ហើយប្រជាពលរដ្ឋរាប់រយគ្រួសារនៅរាជធានីភ្នំពេញត្រូវបានជម្លៀសក្នុងរយៈពេលពីរឆ្នាំចុងក្រោយនេះ។
នៅរសៀលថ្ងៃពុធម្សិលមិញ ទឹកបានហូរចេញពីទំនប់រលាំងជ្រៃ ស្រុកសំរោងទង ខេត្តកំពង់ស្ពឺ។ កម្រិតទឹកនៅទីនោះបានកើនឡើងជិតកន្លះម៉ែត្រ។
លោកស្រី សាយ ប៊ូ អាយុ៨១ឆ្នាំ បាននិយាយថា ផ្ទះរបស់លោកស្រីដែលមានចម្ងាយប្រហែល១៥ម៉ែត្រពីស្ទឹងព្រែកត្នោត ប្រាកដជាជន់លិច ប្រសិនបើទឹកឡើងខ្ពស់ជាងនេះ។
លោកស្រីបានមានប្រសាសន៍ថា៖ «យើងកំពុងតាមដានកម្រិតទឹកជារៀងរាល់ថ្ងៃ ដើម្បីយើងអាចត្រៀមខ្លួននៅពេលមានទឹកជំនន់កើតឡើង»។
លោកស្រីបន្ថែមថា៖ «ពេលមានទឹកជំនន់ យើងនឹងយកសត្វដូចជាគោ ព្រមទាំងចៅៗ និងសម្ភារចាំបាច់ផ្សេងទៀត ទៅស្នាក់នៅលើទំនប់ជាបណ្ដោះអាសន្ន»។
លោកស្រីបន្តថា ប្រជាពលរដ្ឋដែលរស់នៅតំបន់នោះជួបការលំបាក ជាពិសេសអ្នកធ្វើស្រែនិងចិញ្ចឹមសត្វ ដោយសារមានទឹកជំនន់ញឹកញាប់និងធ្ងន់ធ្ងរ និងជារឿយៗជន់លិចភូមិទាំងមូល។
លោកស្រីបន្ថែមថា៖ «នៅឆ្នាំ២០២០ ផ្ទះរបស់យើងលិច២ម៉ែត្រ។ យើងបង្ខំចិត្តស្នាក់នៅជាបណ្ដោះអាសន្នលើទំនប់រលាំងជ្រៃ អស់រយៈពេលជិតមួយសប្ដាហ៍ ព្រោះមានតែទីនោះទេដែលមិនលិចទឹក»។
មានភ្លៀងធ្លាក់ជាបន្តបន្ទាប់ក្នុងសប្ដាហ៍នេះ ហើយអាជ្ញាធរបានប្រាប់ឱ្យមានការប្រុងប្រយ័ត្នចំពោះព្យុះទីហ្វុងណូរុ។
លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយម ខេត្តកំពង់ស្ពឺ មានប្រសាសន៍ថា ប្រជាពលរដ្ឋ ជាពិសេសអ្នករស់នៅខាងក្រោមទំនប់រលាំងជ្រៃ ត្រូវប្រុងប្រយ័ត្ន ខណៈព្យុះទីហ្វុងណូរុ ឆ្លងកាត់ប្រទេសកម្ពុជាក្នុងសប្ដាហ៍នេះ ដែលបង្កឱ្យមានភ្លៀងធ្លាក់ និងកម្ពស់ទឹកកើនឡើង។ លោកបាននិយាយថា ទ្វារទឹកត្រូវបានបើក ដើម្បីរំដោះសម្ពាធទឹក កាលពីថ្ងៃពុធម្សិលមិញនេះ។
លោកបន្ថែមថា៖ «យើងកំពុងតាមដានកម្រិតទឹកយ៉ាងយកចិត្តទុកដាក់ ព្រោះផ្អែកលើការព្យាករអាកាសធាតុ នឹងមានភ្លៀងធ្លាក់រហូតដល់ចុងខែនេះ»។
លោកបន្ថែមថា ទឹកមិនទាន់ឈានដល់កម្រិតប្រកាសអាសន្ននៅឡើយទេ ប៉ុន្តែប្រជាពលរដ្ឋគួរត្រៀមខ្លួន។
លោកបន្ថែមថា៖ «ប្រជាជនស៊ាំនឹងទឹកជំនន់ ដូច្នេះពួកគាត់ដឹងថាត្រូវទៅណា ពេលមានទឹកជំនន់កើតឡើង»។
លោក កែម សារ៉ុម អនុភូមិអន្លង់ធំ ឃុំតាំងក្រូច បានថ្លែងថា យើងមិនអាចទប់ស្កាត់ការជន់លិចបានទេ។ លោកថា អ្វីដែលអាជ្ញាធរអាចធ្វើបាន គឺប្រាប់ប្រជាពលរដ្ឋឱ្យប្រុងប្រយ័ត្នចំពោះកម្រិតទឹក។
លោកបន្ថែមថា៖ «ទឹកស្ទឹងព្រែកត្នោត តែងតែហក់ឡើងយ៉ាងលឿន ហើយធ្វើឱ្យភូមិទាំងមូលត្រូវជន់លិច»។
ប្រធានអាជ្ញាធរទន្លេសាប លោក ម៉ៅ ហាក់ បាននិយាយកាលពីថ្ងៃពុធម្សិលមិញថា ស្ទឹងព្រែកត្នោត ក្នុងរាជធានីភ្នំពេញ កំពុងស្ថិតក្រោមការឃ្លាំមើល ប៉ុន្តែមិនទាន់ចាត់ទុកថាស្ថិតក្នុងកម្រិតដែលគួរឱ្យព្រួយបារម្ភនៅឡើយទេ ហើយព្យុះទីហ្វុងណូរុនឹងវាយប្រហារតំបន់មួយចំនួននៃប្រទេសកម្ពុជា។
ក្រសួងធនធានទឹក និងឧតុនិយម បានឱ្យដឹងថា ព្យុះទីហ្វុងណូរុ អាចនឹងបង្កឱ្យមានភ្លៀងធ្លាក់ខ្លាំងនៅតាមដងទន្លេមេគង្គ ជាពិសេសក្នុងខេត្តកំពង់ចាម ស្ទឹងត្រែង ក្រចេះ និងផ្នែកខ្លះនៃរាជធានីភ្នំពេញ ក្នុងរយៈពេល៣ទៅ៥ថ្ងៃខាងមុខ។ ក្រសួងបានឱ្យដឹងទៀតថា ការហក់ឡើងនៃកម្រិតទឹកទន្លេមេគង្គ អាចនឹងបណ្ដាលឱ្យមានទឹកជំនន់នៅតាមតំបន់មួយចំនួនតាមដងទន្លេ។
ក្រសួងបន្តថា ក្នុងរយៈពេលពី៣ទៅ៥ថ្ងៃខាងមុខ កម្ពស់ទឹកទន្លេមេគង្គអាចឡើងដល់ប្រហែល១០ម៉ែត្រ នៅខេត្តស្ទឹងត្រែង, ២១ម៉ែត្រ នៅក្រចេះ, ១៤,៣ម៉ែត្រ នៅកំពង់ចាម និង ៩,៤ ម៉ែត្រនៅភ្នំពេញ។ ផ្អែកលើទិន្នន័យរបស់គណៈកម្មការទន្លេមេគង្គ បានឱ្យដឹងថា កម្រិតទឹកនឹងកើនឡើងប្រហែល២ទៅ ២,៥ម៉ែត្រ ពីកម្រិតដែលបានកត់ត្រាកាលពីថ្ងៃពុធម្សិលមិញ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Prek Tnaut River’s Dam Releases Rising Water, Flood Alert Issued for Mekong