ក្រសួងការបរទេសអាមេរិក បានឱ្យដឹងនៅថ្ងៃពុធម្សិលមិញថា អាមេរិកក្នុងរយៈពេលប៉ុន្មានថ្ងៃខាងមុខនេះ នឹងដាក់ទណ្ឌកម្មសេដ្ឋកិច្ចថ្មីមួយចំនួនទៀត លើប្រទេសរុស្ស៊ី ជុំវិញការបោះឆ្នោតប្រជាមតិដែលប្រទេសមួយនេះធ្វើឡើងដើម្បីកាត់យកទឹកដីអ៊ុយក្រែន ខណៈទណ្ឌកម្មដែលនឹងត្រូវដាក់នេះអាចនឹងផ្ដោលើវិស័យហិរញ្ញវត្ថុ និងថាមពល។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងប្រាប់អ្នកយកព័ត៌មាន អ្នកនាំពាក្យក្រសួងការបរទេសសហរដ្ឋអាមេរិក លោក Ned Price បានលើកឡើងថា៖ «យើងនឹងបន្តធ្វើការជាមួយសម្ពន្ធមិត្តនិងដៃគូទាំងឡាយ ដើម្បីនាំមកនូវសម្ពាធកាន់តែខ្លាំងបន្ថែមទៀតលើប្រទេសរុស្ស៊ី បុគ្គល និងអង្គភាពនានាដែលកំពុងតែជួយគាំទ្រដល់ការប៉ុនប៉ងដណ្ដើមយកដែនដី [របស់អ៊ុយក្រែន] ទាំងនេះ»។
លោកបន្ថែមថា៖ «វិធានការបន្ថែមទៀតពីពួកយើងត្រូវបានរំពឹងថានឹងចេញក្នុងរយៈពេលប៉ុន្មានថ្ងៃខាងមុខនេះ»។
បើតាមអ្នកនាំពាក្យសេតវិមាន លោកស្រី Karine Jean-Pierre វិធានការទាំងនេះក៏នឹងរួមបញ្ចូលការដាក់ទណ្ឌកម្មលើបុគ្គលនិងអង្គភាពទាំងក្នុង និងក្រៅប្រទេសរុស្ស៊ីដែលគាំទ្រដល់ការធ្វើប្រជាមតិមួយនេះផងដែរ។
គួរបញ្ជាក់ថា ការបោះឆ្នោតប្រជាមតិកាត់យកទឹកដីអ៊ុយក្រែននេះបានចាប់ផ្ដើមធ្វើឡើងកាលពីថ្ងៃទី២៣ ខែកញ្ញា សប្ដាហ៍មុន នៅក្នុងតំបន់ Luhansk, Kherson, Donetsk និងតំបន់ Zaporizhzhia ដែលមានទំហំស្មើនឹង១៥ភាគរយនៃទឹកដីអ៊ុយក្រែនទាំងមូល ខណៈអាជ្ញាធរដែលតែងតាំងដោយប្រទេសរុស្ស៊ីនៅក្នុងតំបន់ទាំង៤នេះ បានរាយការណ៍ថា សំឡេងភាគច្រើនបានបង្ហាញពីការពេញចិត្តក្នុងការក្លាយជាផ្នែកមួយនៃប្រទេសរុស្ស៊ី បន្ទាប់ពីការបោះឆ្នោតនេះបញ្ចប់ទៅកាលពីថ្ងៃអង្គារ។
ទោះជាយ៉ាងណា អ្នកនាំពាក្យសេតវិមានរូបនេះបញ្ជាក់ថា សហរដ្ឋអាមេរិកនឹងមិនទទួលស្គាល់តំបន់ដែលរុស្ស៊ីធ្វើប្រជាមតិនៅក្នុងប្រទេសអ៊ុយក្រែននេះឡើយ ដោយលោកស្រីអះអាងថា គ្រប់ទិដ្ឋភាពនៃដំណើរការបោះឆ្នោតធ្វើប្រជាមតិនេះ គឺត្រូវបានរៀបចំទុកជាមុនដោយវិមានក្រឹមឡាំង៕