ក្រុមយុវជនដែលសកម្មផ្នែកការពារបរិស្ថានប្រមាណ៣០នាក់ នៅព្រឹកថ្ងៃព្រហស្បតិ៍នេះ បាននាំគ្នាស្លៀកពាក់សក្នុងទម្រង់ដង្ហែសពព្រៃឈើ ដើរហែក្បួនពីចំណុចមុខស្ថានទូតចិន ផ្លូវម៉ៅសេទុង ឆ្ពោះទៅកាន់ក្រសួងបរិស្ថាន ដើម្បីដាក់ញត្តិទាមទារឱ្យបញ្ឈប់ការរឹតត្បិតសិទ្ធិសេរីភាពពលរដ្ឋក្នុងសកម្មភាពការពារព្រៃឈើ។
យោងតាមសេចក្ដីជូនដំណឹងស្តីពី «ពិធីហែសពព្រៃឈើទៅកាន់ក្រសួងបរិស្ថាន» របស់ក្រុមយុវជនទាំងនោះ បានលើកឡើងថា ក្រុមយុវជនស្រឡាញ់បរិស្ថាន ចំនួន៣០នាក់ ធ្វើយុទ្ធនាការតាមដងផ្លូវសាធារណៈ ដោយនាំគ្នាស្លៀកសពាក់ស និងដង្ហែមឈូស ធ្វើដំណើរតាមមហាវិថីម៉ៅសេទុង ឆ្ពោះសំដៅទៅកាន់ទីស្ដីការក្រសួងបរិស្ថាន ក្នុងទម្រង់ជាកម្មវិធីដង្ហែសពព្រៃឈើ។
សេចក្ដីជូនដំណឹងដដែលបន្តថា នៅឯទីស្ដីការក្រសួងបរិស្ថាន យុវជននឹងដាក់ញត្តិទៅកាន់លោករដ្ឋមន្ត្រី សាយ សំអាល់ ដើម្បីទាមទារឱ្យបញ្ឈប់ការរឹតត្បិតសិទ្ធិសេរីភាពរបស់សហគមន៍មូលដ្ឋាន យុវជន អង្គការសង្គមស៊ីវិល និងមហាជនទូទៅ ក្នុងកិច្ចអភិរក្សថែរក្សាការពារធនធានព្រៃឈើ។
ក្នុងសម្លៀកបំពាក់ឈុតស និងកាន់ផ្កានៅនឹងដៃ ក្នុងដំណើរថ្មើរជើងពីមុខស្ថានទូតចិនប្រចាំនៅកម្ពុជា ឆ្ពោះទៅកាន់ក្រសួងបរិស្ថាន សកម្មជនការពារបរិស្ថាន កញ្ញា ភួន កែវរស្មី បានលើកឡើងថា ព្រៃឈើមានសារសំខាន់សម្រាប់មនុស្សនិងសត្វ ដែលទាមទារឱ្យមានការការពារនិងអភិរក្ស។ កញ្ញាបន្តថា បច្ចុប្បន្ន ព្រៃឈើបានរងនូវការកាប់បំផ្លាញ ហើយក្រសួងនិងអាជ្ញាធរពាក់ព័ន្ធបែរជារឹតត្បិត និងមិនអនុញ្ញាតឱ្យសហគមន៍ សកម្មជន និងអង្គការសង្គមស៊ីវិល ចុះល្បាតព្រៃទៅវិញ។
ករណីនេះ កញ្ញាបានស្នើដល់ក្រសួងបរិស្ថាននិងអាជ្ញាធរពាក់ព័ន្ធបើកឱ្យសហគមន៍ សកម្មជន និងសង្គមស៊ីវិល ចូលរួមក្នុងការចុះល្បាតព្រៃឡើងវិញ ដើម្បីការពារព្រៃឈើ និងធនធានធម្មជាតិនៅកម្ពុជា។
យុវជនម្នាក់ទៀតដែលចូលរួមក្នុងយុទ្ធនាការដង្ហែសពដើមឈើនេះដែរ លោក អូត ឡាទីន បាននិយាយថា៖ «ព្រៃឈើជាទ្រព្យសម្បត្តិរបស់ជាតិ យើងមានសិទ្ធិ! បច្ចុប្បន្ននេះ ធនធានធម្មជាតិកំពុងរងការបាត់បង់ជាបន្តបន្ទាប់ ដែលទាមទារឱ្យយើងជាពលរដ្ឋខ្មែរចូលរួមការពារព្រៃឈើទាំងអស់គ្នា»។
ក្នុងយុទ្ធនាការដង្ហែសពព្រៃឈើនេះដែរ គេសង្កេតឃើញមានកម្លាំងសមត្ថកិច្ចជាច្រើននាក់បានតាមឃ្លាំមើលពីសកម្មជនរបស់ក្រុមយុវជនទាំងនោះផងដែរ។
បើតាមសេចក្ដីជូនដំណឹងរបស់ក្រុមយុវជន យុទ្ធនាការក្នុងទម្រង់ដង្ហែសពដើមឈើនេះ ធ្វើឡើងក្នុងគោលបំណងទាមទារឱ្យក្រសួងបរិស្ថានបញ្ឈប់ការរឹតត្បិតនិងរារាំងទៅលើសកម្មភាពការពារព្រៃឈើ សហគមន៍មូលដ្ឋាន អង្គការសង្គមស៊ីវិល និងសកម្មបរិស្ថាន និងផ្សព្វផ្សាយសារទៅកាន់សាធារណជនអំពីបច្ចុប្បន្នភាពនៃមហន្តរាយលើព្រៃឈើ ព្រមទាំងលើកទឹកចិត្តនិងជំរុញដល់យុវជន-មហាជនចូលរួមចំណែកយ៉ាងសកម្មក្នុងកិច្ចអភិរក្ស៕