ថ្លែងក្នុងសវនាការកាលពីថ្ងៃព្រហស្បតិ៍ម្សិលមិញ លោក ឌួង ងៀប បានសារភាពថា លោកបានយកប្រាក់ម្នាក់ ១២ម៉ឺនដុល្លារអាមេរិក ពីជនជាតិចិន និងតៃវ៉ាន់ដើម្បីទទួលបានសញ្ជាតិខ្មែរ។
លោក ឌួង ងៀប បានដើរចូលក្នុងតុលាការដោយមិនជាប់ខ្នោះ នៅព្រឹកថ្ងៃទី២៩ ខែកញ្ញា ឆ្នាំ២០២២នេះ និងបានស្វាគមន៍សមាជិកគ្រួសារ ដោយមានឆ្មាំពន្ធនាគារកាន់ដបទឹកឱ្យលោក។ តុលាការបានឃុំខ្លួនលោក ឌួង ងៀប បណ្តោះអាសន្ននៅពន្ធនាគារ PJ ចាប់តាំងពីខែកុម្ភៈ ឆ្នាំ២០២២។
លោក ឌួង ងៀប ត្រូវបានតុលាការផ្ទន្ទាទោសពីបទឆបោក យកប្រាក់ពីជនជាតិតៃវ៉ាន់ ក៏ដូចជា ការក្លែងបន្លំឯកសារសាធារណៈដោយបង្កើតអត្តសញ្ញាណបណ្ណក្លែងក្លាយ។
ករណីក្លែងបន្លំអត្តសញ្ញាណបណ្ណត្រូវបានបើកសវនការជំនុំជម្រះ នៅថ្ងៃព្រហស្បតិ៍ម្សិលមិញ ប៉ុន្តែពាក្យបណ្តឹងប្រឆាំងរូបលោកត្រូវបានទម្លាក់ចោល បន្ទាប់ពីដើមបណ្តឹងបានយល់ព្រមថា ក្មួយប្រុសរបស់លោក ឌួង ងៀប នឹងទទួលខុសត្រូវចំពោះករណីនេះ។ ទោះយ៉ាងណា ក្នុងសវនាការ លោក ឌួង ងៀប បាននិយាយថា ប្រាក់ត្រូវបានប្រគល់ទៅឱ្យមន្ត្រីក្រសួងមហាផ្ទៃ ហើយក្រុមហ៊ុនរបស់លោកទទួលបានប្រាក់មិនដល់ ១០% ទេនៃចំនួនទឹកប្រាក់សរុប។
សមាជិកគ្រួសាររបស់លោក ឌួង ងៀប រួមទាំងភរិយារបស់លោក ឌួង ឆាយ ក៏បានចូលរួមស្តាប់សវនាការនេះដែរ។
ប្រធានចៅក្រមជំនុំជម្រះលោក ស៊ិន សុវណ្ណារ័ត្ន បាននិយាយថា «អ្នកដែលមិនពាក់ព័ន្ធក្នុងករណីនេះ មិនមានសិទ្ធិចូលរួមក្នុងសវនាការនេះទេ»។
មេធាវីការពារក្តីឱ្យលោក ឌួង ងៀប គឺលោក ម៉ី វណ្ឌី ដែលមានវត្តមានក្នុងសវនាការនោះដែរត្រូវបានចៅក្រមប្រាប់ថា លោកមិនមានសិទ្ធិធ្វើ ជាមេធាវីការពារក្តីឱ្យលោក ឌួង ងៀប ទៀតទេ ដោយបានលើកឯកសាររបស់លោក ឌួង ងៀប ដែលបង្ហាញថា លោក ឌួង ងៀប បានដកលោកចេញពីមេធាវីការពារក្តី។
មេធាវី ម៉ី វណ្ឌី បាននិយាយថា៖ «ខ្ញុំនឹងចាកចេញពីសវនាការនេះ។ គួរឱ្យសោកស្ដាយ ខ្ញុំទើបដឹងថា គាត់ដកខ្ញុំចេញ និងមិនអនុញ្ញាតឱ្យខ្ញុំធ្វើជាមេធាវីការពារក្តី ព្រោះខ្ញុំកំពុងបំពេញភារកិច្ចរបស់ខ្ញុំ។ គាត់ត្រូវការខ្ញុំ ហើយសុំឱ្យខ្ញុំផ្តិតមេដៃ ប៉ុន្តែគាត់មិនបានប្រាប់ខ្ញុំថា គាត់ដកខ្ញុំចេញទេ»។
មេធាវី ម៉ី វណ្ឌី ដើរចេញពីបន្ទប់សវនាការទាំងខឹង។
សវនាការជំនុំជម្រះត្រូវបានពន្យារពេលបីដងរួចមកហើយ ដោយសារតែមេធាវីទាំង១២រូបរបស់ លោក ឌួង ងៀប មិនមានវត្តមាននៅក្នុងសវនាការ។
នៅថ្ងៃព្រហស្បតិ៍ម្សិលមិញ ចៅក្រមបានលើកឡើងពីដំណើររឿងដែលចាប់ផ្តើមតាំងពីឆ្នាំ២០១៧ ដោយលោក ឌួង ងៀប បានប្រាប់ដើមបណ្តឹងឈ្មោះ ហ័ង សៅ ស៊ាន (Huang Hsiao Hsien) និងបីនាក់ទៀតថា ពួកគេអាចទទួលបានសញ្ជាតិខ្មែរ ដោយត្រូវបង់ប្រាក់ម្នាក់ ១២ម៉ឺនដុល្លារ។ លោក ឌួង ងៀប បានឱ្យពួកគេបង់រម្លស់ម្នាក់ ៥០ ០០០ដុល្លារ។
លោក ឌួង ងៀប បានប្រាប់តុលាការថា លោកមិនទាន់បានបញ្ចប់ដំណើរការផ្តល់សញ្ជាតិដល់ពួកគេនៅឡើយទេ បើទោះបីជាបានផ្តល់ប្រាក់មួយចំនួនទៅនគរបាលក្រសួងមហាផ្ទៃក៏ដោយ។ ដំណើរការនេះត្រូវបានពន្យារពេលដោយសារអាជ្ញាធរតម្រូវឱ្យពួកគេមកបង្ហាញខ្លួន ប៉ុន្តែពួកគេមិនអាចមកបង្ហាញខ្លួនបាន។
លោក ឌួង ងៀប បាននិយាយថា៖ «ខ្ញុំបានធ្វើរឿងនេះច្រើនដងហើយ។ ពួកគេបានបង់ប្រាក់ម្នាក់ ១២ម៉ឺនដុល្លារ ដើម្បីទទួលបានសញ្ជាតិខ្មែរ ហើយខ្ញុំក៏បានជួយជនជាតិតៃវ៉ាន់ជាច្រើននាក់ឱ្យទទួលបានសញ្ជាតិខ្មែរផងដែរ»។
ជាធម្មតា ត្រូវចំណាយពេល ៤-៦ខែ ក្នុងដំណើរការផ្តល់សញ្ជាតិនេះ ហើយក្រុមហ៊ុនរបស់លោក ឌួង ងៀប រកបានប្រាក់ចំណូលប្រហែល ៥០០០-១០ ០០០ដុល្លារអាមេរិក ពីដំណើរការនេះ។
លោក ឌួង ងៀប បានមានប្រសាសន៍ថា៖ «យើងបានធ្វើរឿងនេះច្រើនដងហើយ តាំងពីលោក សុខ អាន នៅមានជីវិត»។
ទោះយ៉ាងណា ដំណើរការផ្តល់សញ្ជាតិនេះបានជាប់គាំងនៅពេលនេះ ហើយលោកមិនអាចសងប្រាក់ទៅលោក Huang វិញបានទេ ដោយសារអាជីវកម្មរបស់លោកកំពុងជួបការលំបាកដោយសារការរីករាលដាលនៃជំងឺកូវីដ-១៩។ លោកបានបន្ថែមថា លោកបានស្គាល់លោក Huang តាំងពីឆ្នាំ១៩៩៥។
លោក ឌួង ងៀប ថ្លែងថា៖ «យើងជាដៃគូអាជីវកម្ម ហើយខ្ញុំមិនដឹងថា ហេតុអ្វីបានជាគាត់ប្តឹងខ្ញុំ»។
នៅពេលសវនាការបានឈានទៅដល់ការពិភាក្សាអំពីអត្តសញ្ញាណបណ្ណក្លែងក្លាយ លោក Huang បាននិយាយថា ក្មួយប្រុសរបស់លោក ឌួង ងៀប និងសហចុងចោទឈ្មោះ ឌួង ម៉េងហុង បានសន្យាធ្វើអត្តសញ្ញាណបណ្ណសញ្ជាតិខ្មែរចំនួន៤ ដែលអត្តសញ្ញាណបណ្ណមួយមានតម្លៃ ១៤ ០០០ដុល្លារ ប៉ុន្តែចុងក្រោយមានអត្តសញ្ញាណបណ្ណ៤ ដែលមានលេខអត្តសញ្ញាណបណ្ណដូចគ្នា។ ពេលនោះឈ្មោះ ម៉េងហុង បានធ្វើអត្តសញ្ញាណបណ្ណចំនួនបីបន្ថែមទៀត ដែលមានលេខអត្តសញ្ញាណបណ្ណខុសគ្នា ប៉ុន្តែនៅពេលដែលលោក Huang ទិញដីដោយប្រើអត្តសញ្ញាបណ្ណនោះ ម្ចាស់ដីបាននិយាយថា គឺជាអត្តសញ្ញាណបណ្ណក្លែងក្លាយ។
លោក ឌួង ងៀប បាននិយាយថា លោកមិនបានពាក់ព័ន្ធនឹងប្រតិបត្តិការនេះទេ។
លោក Huang បាននិយាយថា លោកបានប្តឹងទាំងលោក ម៉េងហុង និងលោក ឌួង ងៀប ដោយសារលោកមិនដឹងថា លោកគួរប្តឹងនរណានោះទេ ហើយលោកបាននិយាយថា លោកនឹងដកពាក្យបណ្តឹងប្រឆាំងនឹងលោក ឌួង ងៀប។
នៅពេលមេធាវីរបស់លោក ម៉េងហុង សួរថា តើលោកនឹងទម្លាក់ចោលពាក្យបណ្តឹងប្រឆាំងក្មួយប្រុសរបស់លោក ឌួង ងៀប ដែរឬទេ? លោក Huang បាននិយាយថា លោកមិនអាចនិយាយបានទេ។
សវនាការត្រូវបន្តដោយឈានទៅដល់ការចោទប្រកាន់លោក ឌួង ងៀប ពីបទឆបោក បើទោះបីជាមិនទាន់កំណត់កាលបរិច្ឆេទ។
បកប្រែនិងសម្រួលចេញពីអត្ថបទដើមភាសាអង់គ្លេស៖ Jailed Tycoon Reveals Citizenship Racket During Trial