តុលាការកំពូល សម្រេចតម្កល់សាលដីកាសាលាឧទ្ធរណ៍រាជធានីភ្នំពេញ ទុកជាបានការ ដោយមិនដោះលែងកញ្ញា សេង ធារី ឱ្យមានសេរីភាព ក្រោមហេតុផលថា រក្សាជនជាប់ចោទទុកជូនតុលាការ និងបារម្ភខ្លាចកញ្ញាបង្កចលាចល ឬអសន្តិសុខក្នុងសង្គម។
ការសម្រេចនេះ បន្ទាប់ពីតុលាការកំពូលបានបើកសវនាការ លើបណ្ដឹងសាទុក្ខរបស់លោក ជូង ជូងី មេធាវីការពារក្ដីឱ្យកញ្ញា សេង ធារី ដែលមិនសុខចិត្តចំពោះសេចក្ដីសម្រេចរបស់សាលាឧទ្ធរណ៍រាជធានីភ្នំពេញ កាលពីថ្ងៃទី០១ ខែកញ្ញា ឆ្នាំ២០២២ ដែលមិនដោះលែងកូនក្ដីរបស់ខ្លួន។
ប្រធានក្រុមប្រឹក្សាជំនុំជម្រះតុលាការកំពូល លោក គង់ ស្រ៊ីម បានប្រកាសសាលដីកាសម្រេចមិនដោះលែងកញ្ញា សេង ធារី ដោយថា ការសម្រេចរបស់សាលាឧទ្ធរណ៍រាជធានីភ្នំពេញ ជារឿងត្រឹមត្រូវ។
លោកបញ្ជាក់ថា ការមិនដោះលែងនេះ ដោយសារបារម្ភខ្លាចកញ្ញា សេង ធារី បង្កចលាចលដែលប៉ះពាល់ដល់សណ្ដាប់ធ្នាប់នៅក្នុងសង្គម និងដើម្បីរក្សាជនជាប់ចោទទុកជូនតុលាការ។ មួយវិញទៀត លោកបញ្ជាក់ថា បើទោះជាសាលក្រមរបស់តុលាការជាន់ទាប នៅមិនទាន់ចូលជាស្ថាពរ ប៉ុន្តែការឃុំខ្លួន កញ្ញា សេង ធារី មិនបានធ្វើឡើងផ្ទុយពីមាត្រា៣៩៨ នៃក្រមនីតិវិធីព្រហ្មទណ្ឌនោះទេ។
ចំពោះការអះអាងដែលថា កញ្ញា សេង ធារី មិនរត់គេចខ្លួនទៅក្រៅប្រទេសនោះ ប្រធានក្រុមប្រឹក្សាជំនុំជម្រះឆ្លើយតបថា មេធាវីជនជាប់ចោទមិនមានអ្វីសម្រាប់ធានាឡើយ។
មេធាវីការពារក្ដីឱ្យ កញ្ញា សេង ធារី គឺលោក ជូង ជូងី បង្ហាញការសោកស្ដាយចំពោះការសម្រេចរបស់តុលាការកំពូល ខណៈសវនាការបណ្ដឹងសាទុក្ខនាថ្ងៃនេះ មន្ត្រីពន្ធនាគារមិនបានយកកញ្ញាមកចូលរួមនោះទេ។
លោក ជូង ជូងី ថ្លែងថា៖ «ការសម្រេចរបស់តុលាការកំពូល មិនយុត្តិធម៌សម្រាប់កញ្ញា សេង ធារី។ កញ្ញា សេង ធារី គាត់អះអាងថា គាត់មិនរត់គេចខ្លួនទៅក្រៅប្រទេសទេ ដូច្នេះកាលដែលសំអាងថា ទុកជូនតុលាការចាត់ការតាមនីតិវិធីហ្នឹង មិនមែនជាសំអាងត្រឹមត្រូវទេ ហើយកញ្ញា សេង ធារី មិនដែលរត់គេចចេញពីតុលាការទេ ឱ្យតែតុលាការកោះហៅគាត់មកតតាំងជានិច្ច ដូច្នេះការសំអាងថា ដើម្បីរក្សាជនត្រូវចោទទុកជូនតុលាការចាត់ការតាមនីតិវិធី គឺជាសំអាងមួយដែលមិនអាចទទួលយកបានទេ។ សំអាងតុលាការកំពួលមួយទៀត ដើម្បីរក្សាសណ្ដាប់ធ្នាប់សាធារណៈ ដូច្នេះក្នុងន័យថា តុលាការកំពូលសន្មតថា បើដោះលែងកញ្ញា សេង ធារី នឹងធ្វើឱ្យមានភាពវឹកវឹរដល់សង្គម សំអាងបែបនេះ សន្មតថា កញ្ញា សេង ធារី នឹងប្រព្រឹត្តបទល្មើសដូច្នេះ ក៏មិនអាចទទួលបានដែរ»។
កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិមួយផងនោះ ត្រូវបានលោក រស់ ពិសិដ្ឋ ចៅក្រុមជំនុំជម្រះនៃសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ ៦ឆ្នាំ ខណៈថ្នាក់ដឹកនាំ និងអ្នកគាំទ្រគណបក្សសង្រ្គោះជាតិដែលត្រូវបានតុលាការរំលាយ ចំនួន ៥០នាក់ផ្សេងទៀត ត្រូវបានតុលាការផ្តន្ទាទោសដាក់ពន្ធនាគារចន្លោះពី ៥ឆ្នាំ ទៅ ៨ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់ជាតិ» ជុំវិញការប្រកាសជំហរគាំទ្រការធ្វើមាតុភូមិនិវត្តន៍ថ្ងៃ«៩វិច្ឆិកា»របស់លោក សម រង្ស៊ី។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ការសម្រេចយ៉ាងណានោះ ជាឆន្ទានុសិទ្ធិរបស់ចៅក្រម។ ប៉ុន្តែប្រសិនជា កញ្ញា សេង ធារី អាចបង្កឱ្យមានចលនាសង្គមបានមែននោះ លោកថា តុលាការហាក់ដូចជាវាយតម្លៃទៅលើសមត្ថភាពរបស់សមត្ថកិច្ចទាប។
លោក ស៊ឹង សែនករុណា ថា៖ «ខ្ញុំយល់ថា កញ្ញា សេង ធារី មិនអាចមានឥទ្ធិពលអីដែលទៅធ្វើឱ្យមានការបង្កភាពវឹកវរចលាចលសង្គមអីទេ គ្រាន់តែគាត់ធ្វើការអនុវត្តនៅសិទ្ធិសេរីភាពជាមូលដ្ឋានរបស់គាត់ក្នុងការបញ្ចេញមតិ ទាមទារតវ៉ាដោយសន្តិវិធីតាមច្បាប់របស់កម្ពុជា ក៏ដូចជាច្បាប់សិទ្ធិមនុស្សអន្តរជាតិ។ អ៊ីចឹងខ្ញុំយល់ថា មិនមែនដោយសារបញ្ហាហ្នឹងទេ ខ្ញុំយល់ថា រឿងនេះ គឺជាហេតុផលនៃការធ្វើទុក្ខបុកម្នេញទៅលើ កញ្ញា សេង ធារី ច្រើនជាងនៃរូបភាពដែលធ្វើឱ្យប៉ះពាល់សណ្ដាប់ធ្នាប់សាធារណៈ»។
កាលពីថ្ងៃទី១៥ ខែមិថុនា ឆ្នាំ២០២២ កញ្ញា សេង ធារី ត្រូវបានសមត្ថកិច្ចរាជធានីភ្នំពេញ បញ្ជូនចេញពីពន្ធនាគារព្រៃស រាជធានីភ្នំពេញ ទៅឃុំនៅពន្ធនាគារខេត្តព្រះវិហារ ក្រោយពីសាលាដំបូងរាជធានីភ្នំពេញ ផ្ដន្ទាទោសកញ្ញាបានមួយថ្ងៃ។
ទាក់ទិនរឿងនេះដែរ មេធាវីការពារក្ដីឱ្យកញ្ញា សេង ធារី គឺលោក ជូង ជូងី ក៏បានដាក់លិខិតទៅក្រសួងមហាផ្ទៃ ដើម្បីស្នើសុំផ្ទេរកូនក្ដីពីពន្ធនាគារខេត្តព្រះវិហារ មកពន្ធនាគារព្រៃស នៅរាជធានីភ្នំពេញវិញ ដោយថា ការឃុំខ្លួននៅខេត្តដែលមានចម្ងាយឆ្ងាយ មានការលំបាកច្រើន៕
