ប្រមុខរដ្ឋាភិបាលកម្ពុជាបានប្រកាសថានឹងយកថ្ងៃទី១៥ ខែតុលា ជាថ្ងៃរៀបចំពិធីបុណ្យថ្វាយព្រះវិញ្ញាណក្ខន្ធ ព្រះករុណា ព្រះបាទសម្ដេចព្រះ នរោត្តម សីហនុ ព្រះបរមរតនកោដ្ឋ គម្រប់ខួប១០ឆ្នាំ នៃការយាងសោយទិវង្គត និងខួប១០០ឆ្នាំ នៃការប្រសូតរបស់ព្រះអង្គ។
ថ្លែងពីខេត្តសៀមរាប ក្នុងឱកាសជួបសំណេះសំណាលជាមួយប្រជាពលរដ្ឋស្ម័គ្រចិត្តរើសំណង់ចេញពីតំបន់រមណីយដ្ឋានអង្គរ ជិត ៣ពាន់គ្រួសារបន្ថែមទៀតនៅព្រឹកថ្ងៃទី១ ខែតុលា ឆ្នាំ២០២២ លោកនាយករដ្ឋមន្ដ្រី ហ៊ុន សែន មានប្រសាសន៍ថា រាជរដ្ឋាភិបាលត្រូវរៀបចំព្រះរាជពិធីបុណ្យថ្វាយព្រះអង្គគម្រប់ខួប១០ឆ្នាំនៃការយាងសោយទិវង្គត និងជាខួប ១០០ឆ្នាំ នៃការប្រសូត្ររបស់អតីតព្រះមហាវរក្សត្រខ្មែរ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ នៅថ្ងៃទី១៥ ខែតុលាខាងមុខនេះ។
លោកបន្តថា ថ្ងៃទី១៥ តុលា ខាងមុខ ប្រជាពលរដ្ឋក៏នឹងត្រូវចូលរួមជាមួយព្រះរាជពិធីបុណ្យនោះឱ្យបានគ្រប់ៗគ្នា ដើម្បីរម្លឹកដល់ស្នាព្រះហស្ថ និងវីរភាពរបស់សម្ដេច ព្រះនរោត្តម សីហនុ ផងដែរ។
ព្រះករុណា ព្រះបាទសម្ដេច ព្រះនរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ទ្រង់ប្រសូត្រនៅថ្ងៃទី៣១ ខែតុលា ឆ្នាំ១៩២២។ ព្រះអង្គ ជារាជបុត្រារបស់ ព្រះបាទ នរោត្តម សុរាម្រិត និងព្រះមហាក្សត្រិយានី ស៊ីសុវត្ថិ កុសុមៈនារីរ័ត្នសេរីវឌ្ឍនា។
ព្រះបាទ នរោត្តម សីហនុ បានឡើងគ្រងរាជសម្បត្តិបន្តពីព្រះបាទ ស៊ីសុវត្ថិ មុនីវង្ស នៅឆ្នាំ១៩៤១ ក្នុងពេលព្រះអង្គមានព្រះជន្មាយុ ១៨ព្រះវស្សា ស្របពេលកម្ពុជាស្ថិតក្រោមអាណាព្យាបាលបារាំងនៅឡើយ។ នៅឆ្នាំ១៩៥៥ ព្រះអង្គបានបង្កើតគណបក្សមួយមានឈ្មោះថា គណបក្សសង្គមរាស្ត្រនិយម។ ក្នុងឆ្នាំ ១៩៥៥ ព្រះបាទ នរោត្តម សីហនុ បានដាក់រាជថ្វាយព្រះបិតា គឺព្រះបាទ សុរាម្រិត ដើម្បីកាន់តំណែងជានាយករដ្ឋមន្ត្រី។ បន្ទាប់ពីបិតាព្រះអង្គសោយទិវង្គតក្នុងឆ្នាំ១៩៦០ សម្តេច សីហនុ ក៏បានយល់ព្រមកាន់តំណែងជាព្រះប្រមុខរដ្ឋ រហូតដល់មានរដ្ឋប្រហារព្រះអង្គនាថ្ងៃទី១៨ ខែមីនា ឆ្នាំ១៩៧០ ពីសំណាក់ក្រុម លោក លន់ នល់។
យ៉ាងណា ក្នុងថ្ងៃទី២៤ ខែកញ្ញា ឆ្នាំ១៩៩៣ សម្ដេចព្រះនរោត្តម សីហនុ ត្រូវបានរដ្ឋសភាជាតិ ជ្រើសតាំងព្រះអង្គជាព្រះមហាក្សត្រនៃប្រទេសកម្ពុជាជាថ្មីម្ដងទៀត រហូតដល់ថ្ងៃទី៧ ខែតុលា ឆ្នាំ២០០៤ នៅពេលដែលព្រះរាជបុត្រារបស់ព្រះអង្គ គឺព្រះបរមនាថ នរោត្តម សីហមុនី ឡើងស្នងរាជ្យបន្ត។
សម្តេចព្រះនរោត្តម សីហនុ បានយាងសោយព្រះទិវង្គត នៅថ្ងៃចន្ទ ទី១៥ ខែតុលា ឆ្នាំ២០១២ នៅទីក្រុងប៉េកាំង ប្រទេសចិន ដោយព្រះជរាពាធ ក្នុងជន្មាយុ ៩០ព្រះវស្សា ហើយព្រះបរមសពរបស់ព្រះអង្គ ត្រូវបានដង្ហែមកដល់រាជធានីភ្នំពេញដើម្បីរៀបចំព្រះរាជពិធីបុណ្យតាមប្រពៃណីនៅថ្ងៃទី១៧ ខែតុលា ឆ្នាំ២០១២៕
