មន្ត្រីរដ្ឋបាលខេត្តឧត្តរមានជ័យ អះអាងថា សាកសពយោធាម្នាក់ត្រូវបានរកឃើញ ខណៈក្រុមការងារជួយសង្គ្រោះកំពុងរុករកសពយោធាម្នាក់ទៀតបានលង់ទឹក អំឡុងពេលពួកគេចុះជួយក្មេងពីរនាក់ដែលបានរអិលជើងធ្លាក់ទឹកនៅចំណុចអាងទឹកទំនប់អូរអង្គ្រង ភូមិគោកមន ឃុំគោកមន ស្រុកបន្ទាយអំពិល។
អ្នកនាំពាក្យរដ្ឋបាលខេត្តឧត្តរមានជ័យ លោក ឌី រ៉ាដូ ប្រាប់ វីអូឌី ថា ហេតុការណ៍យោធាស្លាប់នេះបានកើតឡើងបន្ទាប់ពីយោធាទាំង ២រូប បានចុះទៅជួយកុមារពីនាក់បងប្អូន កាលពីរសៀលម្សិលមិញ។ លោកបញ្ជាក់ថា កុមារពីរនាក់បងប្អូនត្រូវជួយសង្គ្រោះ ប៉ុន្តែយោធា ២នាក់ ដែលចុះជួយនោះ ត្រូវបានទឹកគួចទៅកន្លែងជ្រៅទើបបណ្ដាលឱ្យលង់ ដោយសារទឹកហូរខ្លាំង។
លោក ឌី រ៉ាដូ ថ្លែងថា៖ «កូនក្មេងហ្នឹងពីរនាក់បងប្អូន នៅលេងបង្ហៀរទឹក ហើយអាប្អូនក៏រអិលជើងធ្លាក់ ហើយអាបងឃើញក៏ទៅតាមចាប់។ អ៊ីចឹង កងពល ៤២ ដែលគាត់ទៅលេងនោះដែរ ក៏គាត់ទៅជួយ ទៅជួយគាត់បានរុញក្មេងនឹងទៅដល់ច្រាំងហើយ ដោយសារទឹកខ្លាំងក៏បុកគាត់ចូលទៅជ្រៅទៅ ហើយដោយសារសម្លៀកបំពាក់គាត់ជាយោធា អ៊ីចឹងធ្វើឱ្យទឹកដក់ធ្ងន់ គាត់ពិបាកហែលបញ្រ្ចាស់មកវិញ។ អ៊ីចឹងធ្វើឱ្យទាហានពីររូបលង់»។
លោក រ៉ាដូ បន្តថា គិតចាប់តាំងពីរសៀលម្សិលមិញរហូតដល់ល្ងាចថ្ងៃសៅរ៍នេះ សមត្ថកិច្ច និងក្រុមការងារជួយសង្គ្រោះបានរកឃើញសពយោធាមួយរូប ដែលមានអាយុ ២៤ឆ្នាំ។ ចំណែកយោធាមួយរូបទៀត មិនទាន់ឃើញសាកសពនៅឡើយ ប៉ុន្តែក្រុមការងារកំពុងស្វែងរកបន្តទៀត។ លោកបន្តថា យោធាទាំងពីររូបដែលជួយសង្គ្រោះក្មេងមកពីកងទ័ពនៃកងពលតូចថ្មើរជើង លេខ៤២ ការពារព្រំដែន នៅប្រាសាទតាមាន់។
លោក ឌី រ៉ាដូ បន្តថា៖ «រកមិនទាន់ឃើញទេ តាំងពីម្សិលមិញ។ យើងប្រើកម្លាំងចម្រុះស្រុកផង មានកម្លាំងឃុំ។ យើងរួមគ្នា ដើម្បីស្វែងរកសពពួកគាត់ហ្នឹង»។
អ្នកនាំពាក្យសាលាខេត្តរូបនេះបញ្ជាក់ថា បច្ចុប្បន្ននៅខេត្តឧត្ដរមានជ័យមិនមានទឹកជំនន់ទេ ហើយទឹកជន់ដោយទឹកភ្លៀងនោះ បានស្រកចុះបណ្តើរៗទៅវិញហើយដែរ៕
