សមត្ថកិច្ចបានរកឃើញសាកសពយោធាម្នាក់ទៀតកាលពីល្ងាចម្សិលមិញ បន្ទាប់ពីមន្ត្រីយោធារូបនោះត្រូវបានទឹកគួចទៅកន្លែងជ្រៅ នៅអំឡុងពេលចុះជួយសង្គ្រោះក្មេង២នាក់ឱ្យរួចផុតពីសេចក្តីស្លាប់ ដោយការលង់ទឹកកាលពីចុងខែកញ្ញា នៅចំណុចអាងទឹកទំនប់អូរអង្គ្រង ស្រុកបន្ទាយអំពិល ខេត្តឧត្តរមានជ័យ។
ស្នងការនគរបាលខេត្តឧត្តរមានជ័យ លោក ហួត សុធី បានប្រាប់វីអូឌីនៅថ្ងៃទី២ ខែតុលា ឆ្នាំ២០២២ថា កាលពីល្ងាចម្សិលមិញ ក្រុមការងារជំនាញបានចុះរកឃើញសាកសពយោធាម្នាក់ទៀត ក្នុងចំណោមយោធាពីរនាក់ ដែលលង់ទឹកស្លាប់ អំឡុងពេលពួកគេចុះជួយក្មេង២នាក់ ដែលបានរអិលជើងធ្លាក់ទឹកនៅចំណុចអាងទឹកទំនប់អូរអង្គ្រង ភូមិគោកមន ឃុំគោកមន ស្រុកបន្ទាយអំពិល ។
លោកបញ្ជាក់ថា៖ «យើងបានរកឃើញសាកសពយោធាម្នាក់ទៀតហើយ។ យើងក៏បានប្រគល់សាកសពឱ្យទៅសាច់ញាតិ យកទៅធ្វើបុណ្យតាមប្រពៃណី» ។
ស្នងការរូបនេះបញ្ជាក់ថា ហេតុការណ៍យោធាពីរស្លាប់នេះ បានកើតឡើងបន្ទាប់ពីពួកគេ បានចុះទៅជួយសង្គ្រោះកុមារពីរនាក់បងប្អូន កាលពីរសៀលថ្ងៃទី៣០ ខែកញ្ញា ឆ្នាំ២០២២ ឱ្យរួចផុតពីសេចក្តីស្លាប់ ប៉ុន្តែយោធា ២នាក់ ដែលចុះជួយនោះ ត្រូវបានទឹកគួចទៅកន្លែងជ្រៅ និងហូរខ្លាំង ទើបបណ្ដាលឱ្យលង់ស្លាប់នៅកន្លែងកើតហេតុតែម្តង។
លោក ហួត សុធី មានប្រសាសន៍បន្ថែមថា នេះជាបទពិសោធន៍មួយដែលធ្វើឱ្យកងកម្លាំងទាំងអស់ ត្រូវមានការប្រុងប្រយ័ត្នខ្ពស់ នៅពេលចុះជួយសង្គ្រោះប្រជាពលរដ្ឋ និងក្មេងៗ ពេលលង់ទឹក ត្រូវមានអាវពោងការពារសុវត្ថិភាព និងសម្ភារៈសំខាន់ៗមួយចំនួនទៀត ដើម្បីបញ្ជៀសកុំឱ្យមានរឿងបែបនេះកើតឡើងបន្តទៀត ។
គួរបញ្ជាក់ថា យោធាទាំងពីររូប ដែលស្លាប់បាត់បង់ជីវិតដោយសារជួយសង្គ្រោះក្មេង២នាក់ឱ្យរួចពីសេចក្តីស្លាប់នោះ គឺជាកងទ័ព នៃកងពលតូចថ្មើរជើង លេខ ៤២ ការពារព្រំដែន នៅប្រាសាទតាមាន់ ឈរជើងនៅភូមិសាស្ត្រ ស្រុកបន្ទាយអំពិល ខេត្តឧត្តរមានជ័យ។
ក្រោយលង់ទឹកកាលពីថ្ងៃទី៣០ ខែកញ្ញា សាកសពយោធាម្នាក់ឈ្មោះ វ៉ាន់ ថុល ភេទ ប្រុស អាយុ ២០ឆ្នាំ ត្រូវបានក្រុមជួយសង្គ្រោះរកឃើញមុនដំបូងនៅម៉ោងប្រមាណ១១ ថ្ងៃត្រង់ នាថ្ងៃទី១ ខែតុលា ឆ្នាំ២០២២៕