លោកនាយករដ្ឋមន្រ្តី ហ៊ុន សែន និងជាមេដឹកនាំបក្សកាន់អំណាច សម្អាងថា នឹងផ្តល់បណ្ណក្រីក្រជូនពលរដ្ឋប្រមាណជា១០ម៉ឺនគ្រួសារបន្ថែមទៀត ដើម្បីជួយសម្រួលបញ្ហាជីវភាពរបស់ពួកគេ ខណៈបន្តបិទខ្ទប់គណបក្សប្រឆាំងពីសង្វៀននយោបាយចំពេលការបោះឆ្នោតជាតិឆ្នាំ២០២៣ជិតមកដល់។
ក្នុងពិធីចែកសញ្ញាបត្រ ឱ្យនិស្សិតដែលធ្វើឡើងក្នុងរាជធានីភ្នំពេញ នាថ្ងៃចន្ទនេះ លោក ហ៊ុន សែន ថ្លែងថាលោកនឹងផ្តល់បណ្ណក្រីក្របន្ថែមទៀតទៀតនេះដើម្បីជួយសម្រួលជីវភាពរបស់ពលរដ្ឋដែលរងផលប៉ះពាល់ពីជំងឺកូវីដ-១៩ ដោយថា បើទោះបីជម្រើសនេះ មានការរិះគន់ថា លោកបានព្យាយាមកេងចំណេញនយោបាយមុនរដូវបោះឆ្នោតមកដល់ក្តី។
បន្ថែមពីនេះ លោកបានថ្លែងសារបែបឌឺដងទៅកាន់អតីតដៃគូប្រកួតដែលមានសក្តានុពល គឺមេដឹកនាំគណបក្សសង្គ្រោះជាតិដែលតុលាការបានរំលាយ ចេញពីឆាកនយោបាយ ចាប់ពីចុងឆ្នាំ២០១៧ថា ការផ្តល់បណ្ណក្រីក្រជូនពលរដ្ឋ ជាការជួយមនុស្សក្នុងសមាជិកគ្រួសារទាំងមូល មិនមែនផ្តល់ប្រាក់ត្រឹម៤ម៉ឺនរៀលក្នុងមួយខែសម្រាប់មនុស្សចាស់ដូចការសន្យាកន្លងទៅនោះទេ។
លោកនាយករដ្ឋមន្រ្តី ថ្លែងថា៖ «ពួកអ្នកឯងភូត ចាស់ៗប្រាក់ខែ៤ម៉ឺនរៀលក្នុង១ខែ។ ខ្ញុំមិនមែនគិតត្រឹមតែមនុស្សចាស់ទេ ចុះបើបានតែចាស់ ចុះអាក្មេងនៅក្នុងផ្ទះនោះវាយ៉ាងម៉េច? ខ្ញុំគិតមួយកញ្ចប់ អ្នកក្រីក្រនោះឥឡូវជិត៧០ម៉ឺនគ្រួសារឥឡូវបើថែម១០ម៉ឺនគ្រួសារទៀតក៏វាអត់ទាស់ខុសអីដែរ»។
អ្នកនាំពាក្យក្រសួងសង្គមកិច្ចអតីតយុទ្ធជន និង យុវនីតិសម្បទា លោក តូច ចាន់នី លើកឡើងថា ពលរដ្ឋដែលទទួលបានបណ្ណក្រីក្រ ទទួលបានប្រាក់ប្រចាំខែក្នុងមួយគ្រួសារ ចន្លោះពីជាង១០ម៉ឺន ទៅ៦០ម៉ឺនរៀល អាស្រ័យលើចំនួនសមាជិកគ្រួសារច្រើន ឬតិច ហើយថា បច្ចុប្បន្នរដ្ឋាភិបាល នៅតែបន្តបើកជូនពួកគេជិត៧០ម៉ឺនគ្រួសារ។
គណបក្សសង្គ្រោះជាតិ ដែលដឹកនាំដោយ លោក កឹម សុខា និងលោក សម រង្ស៊ី មុនតុលាការរំលាយ បានដាក់ចេញកម្មវិធីនយោបាយចំនួន៧ចំនុច ក្នុងនោះមានទាំងផ្តល់ប្រាក់ដល់ចាស់ៗចាប់ពីអាយុ៦០ឆ្នាំឡើង នឹងទទួលបានប្រាក់៤ម៉ឺនរៀលក្នុងមួយខែ បើគណបក្សនេះឈ្នះឆ្នោតបានឡើងកាន់អំណាច។
ក្រៅពីនេះលោក ហ៊ុន សែន បានព្រមានវិធានការ ចំពោះសកម្មជននយោបាយ ដែលគាំទ្រលោក សម រង្ស៊ី ក្នុងការប្រើយុទ្ធសាស្ត្រចាស់ បំផុសកុំឱ្យពលរដ្ឋសងបំណុលត្រឡប់ទៅធនាគារវិញផងដែរ ដើម្បីកុំឱ្យពួកគេយកបញ្ហានេះទាក់ទាញសន្លឹកឆ្នោត ។
លោក ហ៊ុន សែន ថា៖ «ឥឡូវអ្នកឯងចង់ធ្វើបដិវត្តន៍តាំងពីហ្នឹង[ឥឡូវ]ចង់ធ្វើបដិវត្តន៍? និយាយគ្នាត្រង់ៗ លើកមុនខ្ញុំព្រមានម្តងហើយ ស្ងាត់!
តែឥឡូវនេះ គេដើរខ្សឹប ហើយអាមុខសញ្ញាដើរខ្សឹបគេដឹងមុខតើ! ជំពាក់លុយគេ ប្រញាប់រកលុយសង ប្រយ័ត្នគេរឹបអូស ដល់គេរឹបអូសថា អយុត្តិធម៌ណាស់រុះផ្ទះ ចុះហ្អែងខ្ចីលុយគេទៅ ហ្អែងគិតម៉េចដែរ?»។
ស្ថាបនិកគណបក្សសង្គ្រោះជាតិដែលតុលាការរំលាយ លោក សម រង្ស៊ី ដែលគាត់កំពុងនិរទេសខ្លួន មុនការបោះឆ្នោតជ្រើសរើសក្រុមប្រឹក្សាឃុំសង្កាត់ ធ្លាប់ចេញសារនយោបាយអំពាវនាវបញ្ហានេះ តែត្រូវលោក ហ៊ុន សែន អះអាងថាលោកបានចេញវិធានការទប់ស្កាត់បានម្តងរួចមកហើយ។
ចំណែកលោក កឹម សុខា វិញត្រូវបានតុលាការដកសិទ្ធិធ្វើនយោបាយជាង៥ឆ្នាំមកហើយ ចាប់ពីថ្ងៃដែលសមត្ថកិច្ចឆ្មក់ចូលចាប់ខ្លួនទាំងយប់ កាលពីថ្ងៃទី៣ ខែកញ្ញា ឆ្នាំ២០១៧ ចោទថា គប់គិតជាមួយសហរដ្ឋអាមេរិកចង់ផ្តួលរំលំរដ្ឋាភិបាល ក្រោយគណបក្សប្រឆាំងនេះហក់ឡើងប្រជាប្រិយភាពជិតទាន់គណបក្សកាន់អំណាចដែរនោះ ដែលការណ៍នេះ ត្រូវបានគេមើលឃើញថា ជាសំណុំរឿងនយោបាយ។
អ្នកនាំពាក្យគណបក្សភ្លើងទៀន លោក ថាច់ សេដ្ឋា បដិសេធការលើកឡើងនេះ ដោយសម្អាងថាគណបក្សគ្មានគោលការណ៍នេះទេ ហើយថាក៏គ្មានសកម្មជនណាដើរប្រាប់អ្នកជាប់បំណុលកុំឱ្យសងប្រាក់ដែលជំពាក់ទៅធនាគារវិញដែរ។
លោក ថាច់ សេដ្ឋា បញ្ជាក់ថា៖ «យើងអត់មានផលប្រយោជន៍ស្អីទៅធ្វើបែបហ្នឹង អ្វីដែលយើងគិតគឺធ្វើបែបម៉េចឱ្យគ្រប់គ្រងប្រព័ន្ធហិរញ្ញវត្ថុហ្នឹងឱ្យបានច្បាស់លាស់ នៅពេលយើងដឹកនាំរដ្ឋាភិបាល ដើម្បីបញ្ចុះការប្រាក់ទាំងធនាគារ ទាំងគ្រឹះស្ថានមីក្រូហិរញ្ញវត្ថុ ដើម្បីបន្ធូរបន្ថយដល់ជីវភាពប្រជាពលរដ្ឋ។ យើងមិនអាចតម្លើងខ្ពស់បែបហ្នឹងទេ ដល់ពេលពលរដ្ឋអត់មានលុយសងទៅរឹបអូសយកផ្ទះសម្បែងដីធ្លីអត់ត្រឹមត្រូវទេ»។
សាស្រ្តាចារ្យវិទ្យាសាស្ត្រនយោបាយ លោក ឯម សុវណ្ណរ៉ា ថា សារនយោបាយរបស់មេដឹកនាំ ជាការវាយបំបាក់ស្មារតីក្រុមអ្នកនយោបាយប្រឆាំង ហើយបានញែកពលរដ្ឋឱ្យជាពីរក្រុមផ្សេងគ្នា រវាងអ្នកគាំទ្ររដ្ឋាភិបាល និងក្រុមអ្នកមាននិន្នាការផ្ទុយ ដែលបញ្ហានេះនឹងជំរុញឱ្យមានភាពផុយស្រួយនៃការបែកបាក់ជាតិ ខណៈវិបត្តិនយោបាយមិនទាន់ត្រូវបានដោះស្រាយនៅឡើយនោះ។
ជាការយល់ឃើញលោកថា មេដឹកនាំក្នុងសង្គមប្រជាធិបតេយ្យគួរប្រើសារនយោបាយជំរុញឱ្យពលរដ្ឋចេះរួមរស់ជាមួយគ្នា ប្រកបដោយសុខដុមរមនា ក្រោមដំបូលរដ្ឋធម្មនុញ្ញ ចៀសវាងផ្ញើសារជំរុញឱ្យជាតិបន្តបែកបាក់គ្មានទីបញ្ចប់ បើមិនដូច្នោះទេលោកថា ថ្នាក់ដឹកនាំនឹងបាត់បង់ការគាំទ្រ។
លោក ឯម សុវណ្ណរ៉ា ថា៖ «ក្នុងក្របខណ្ឌជាថ្នាក់ដឹកនាំយើងគួរតែមាន សារមួយចំនួនដែលអាចបង្រួបបង្រួមប្រជាពលរដ្ឋ ព្រោះនិន្នាការនយោបាយជាសេរីភាពក្នុងរដ្ឋធម្មនុញ្ញ ដែលផ្តល់សិទ្ធិឱ្យពលរដ្ឋ មានសិទ្ធិជ្រើសរើសគណបក្សនយោបាយដែលខ្លួនស្រឡាញ់ មិនរើសអើងទេ បើកាលណាយើងយកចំនុចនេះមកប្រកាសជាសាធារណៈ ហើយជាថ្នាក់ដឹកនាំទៀត ធ្វើឱ្យអំណាចគាំទ្រពីពលរដ្ឋហ្នឹង ក៏មិនខ្លាំងដែរវាកាន់តែថយទៅវិញទេ»។
យោងតាមការស្ទង់មតិសេដ្ឋកិច្ចសង្គម របស់ រាជរដ្ឋាភិបាល សម្រាប់ឆ្នាំ២០១៩ និងឆ្នាំ២០២០ បំណុលជាមធ្យមក្នុងមួយគ្រួសារបានកើនឡើង ៨៥ភាគរយ ក្នុងរយៈពេលពីរឆ្នាំចុងក្រោយនេះ ពោលគឺកើនពី ៩,៦លានរៀល ដល់១៧,៧លានរៀល ។
ប្រភពដដែលសម្អាងថា សម្រាប់ប្រជាជនកម្ពុជានៅតាមទីជនបទ ការជំពាក់បំណុលគ្រឹះស្ថានមីក្រូហិរញ្ញវត្ថុ គឺជាហានិភ័យដ៏ធំមួយដែលផ្សារភ្ជាប់ទៅនឹងការបាត់បង់ដីធ្លី ផ្ទះសម្បែង ។
ដោយឡែកពាក់ព័ន្ធនឹងបញ្ហានយោបាយវិញ កំពុងរអិលកាន់តែជិតទៅរកវិធានការដាក់ទណ្ឌកម្មទាំងវិស័យសេដ្ឋកិច្ចនិងនយោបាយ បើស្ថានការណ៍មិនត្រូវបានកែលម្អទាន់ពេល ក្រោយពីសហរដ្ឋអាមេរិកដាក់កម្ពុជាក្នុងបញ្ជីខ្មៅនៃការជួញដូរមនុស្ស ស្របពេលដែលកម្ពុជាមិនទាន់រើខ្លួនរួចពីបញ្ជីប្រផេះ ឬប្រទេសតាមដានការលាងលុយកខ្វក់ពីក្រុមហិរញ្ញវត្ថុអន្តរជាតិ រួមទាំងការធ្វើច្បាប់មួយចំនួន របស់តំណាងរាស្ត្រ អាមេរិក ដើម្បីត្រៀមឆ្លើយតបទៅនឹងការធ្លាក់ចុះស្ថានភាពសិទ្ធិមនុស្ស និងប្រជាធិបតេយ្យដែលបានកើតឡើងវិញជាង ៥ឆ្នាំមកនេះ៕
