តៃវ៉ាន់ នៅថ្ងៃចន្ទនេះ បានបើកដំណើរការប៉ុស្តិ៍ទូរទស្សន៍ ដែលរួមមានព័ត៌មាន និងការកម្សាន្តជាភាសាអង់គ្លេសជាលើកដំបូង ក្នុងគោលបំណងដើម្បីនាំយករូបភាពរបស់ខ្លួនកាន់តែច្រើន ទៅកាន់ឆាកអន្តរជាតិ ស្របពេលដែលចិនកំពុងតែព្យាយាមទាមទារយកដែនកោះមួយនេះមកគ្រប់គ្រង។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងនៅក្នុងពិធីសម្ពោធ លោកស្រី សៃ អ៊ីងវេន បានឱ្យដឹងថា ប៉ុស្តិ៍ទូរទស្សន៍នេះ គឺជាការជួយនាំយករូបភាពតៃវ៉ាន់ទៅកាន់ឆាកអន្តរជាតិ ស្របពេលដែលដែនកោះមួយនេះ ក៏ត្រូវបង្កើតទំនាក់ទំនងកាន់តែជិតស្និទ្ធជាមួយបណ្ដាប្រទេសដែលចែករំលែកតម្លៃស្នូលនៃសេរីភាព និងលទ្ធិប្រជាធិបតេយ្យផងដែរ។
លោកស្រីបន្តថា៖ «រឿងរ៉ាវរបស់តៃវ៉ាន់ គួរត្រូវបានចែករំលែកជាមួយពិភពលោក ហើយស្របពេលដែលមនុស្សកាន់តែច្រើនឡើងនៅជុំវិញពិភពលោកចាប់អារម្មណ៍លើតៃវ៉ាន់ វាពិតជាមានសារៈសំខាន់ខ្លាំងណាស់ ក្នុងការដែលយើងមានវេទិកាមួយ ដើម្បីនាំយកតៃវ៉ាន់ទៅកាន់សហគមន៍អន្តរជាតិ»។
គួរបញ្ជាក់ថា ប៉ុស្តិ៍ទូរទស្សន៍មានឈ្មោះថា TaiwanPlus ដែលគាំទ្រដោយរដ្ឋាភិបាល និងលោកស្រីប្រធានាធិបតី សៃ អ៊ីងវេន (Tsai Ing-wen) នេះបានចាប់ផ្តើមប្រតិបត្តិការកាលពីឆ្នាំមុនជាវេទិកាផ្សាយតាមប្រព័ន្ធអនឡាញ។
រហូតមកដល់ពេលនេះ ប៉ុស្តិ៍ទូរទស្សន៍នេះ គឺមានតែនៅក្នុងតៃវ៉ាន់ប៉ុណ្ណោះ។ ទោះជាយ៉ាងណា ពួកគេក៏កំពុងសំឡឹងមើលការបើកដំណើរការនៅសហរដ្ឋអាមេរិកក្នុងរយៈពេលខាងមុខផងដែរ៕
