ពលរដ្ឋរុស្ស៊ីរាប់ពាន់នាក់ ដែលកេណ្ឌឱ្យទៅធ្វើទាហានសម្រាប់សង្រ្គាមនៅប្រទេសអ៊ុយក្រែន ត្រូវបានបញ្ជូនត្រលប់ទៅផ្ទះវិញ ព្រោះមិនមានលក្ខណៈសម្បត្តិគ្រប់គ្រាន់។
យោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៣ ខែតុលា ឆ្នាំ២០២២ នេះ បានឱ្យដឹងថា នៅលើសមរភូមិប្រយុទ្ធកាលពីថ្ងៃអាទិត្យម្សិលមិញ លោក ពូទីន បានទទួលបរាជ័យយ៉ាងដុនដាប ដោយកងកម្លាំងអ៊ុយក្រែនបានគ្រប់គ្រងទាំងស្រុងនូវមជ្ឈមណ្ឌលភស្តុភាររបស់រុស្ស៊ី ដែលស្ថិតនៅក្នុងតំបន់លីម៉ាន (Lyman) ភាគខាងកើតអ៊ុយក្រែន ដែលជាជោគជ័យដ៏ធំបំផុតក្នុងរយៈពេលប៉ុន្មានសប្តាហ៍មកនេះ។
ការកេណ្ឌទ័ពលើកដំបូងរបស់រុស្ស៊ី ចាប់តាំងពីសង្គ្រាមលោកលើកទី២ បន្ទាប់ពីកងកម្លាំងរបស់ខ្លួនបានទទួលបរាជ័យយ៉ាងដុនដាបក្នុងសមរភូមិនៅអ៊ុយក្រែន បាននាំឱ្យពលរដ្ឋរុស្ស៊ីរាប់ពាន់នាក់ភៀសខ្លួនទៅក្រៅប្រទេស។
លោកមៃខែល ដេយ៉ារ៉េវ (Mikhail Degtyarev) អភិបាលក្រុងខាបារ៉ូវស៍ (Khabarovsk) របស់រុស្ស៊ី បាននិយាយថា ពលរដ្ឋរុស្ស៊ីជាច្រើនពាន់នាក់ បានចុះឈ្មោះចូលបម្រើកងទ័ពក្នុងរយៈពេល១០ថ្ងៃ ប៉ុន្តែមានពលរដ្ឋមួយចំនួន មិនមានលក្ខណៈសម្បត្តិគ្រប់គ្រាន់ឡើយ។
លោក Degtyarev បានលើកឡើងនៅក្នុងសារជាវីដេអូតាមបណ្តាញតេឡេក្រាមថា៖ «ប្រហែលពាក់កណ្តាលនៃពួកគេ [អ្នកដែលបានចុះឈ្មោះចូលបម្រើកងទ័ព] ត្រូវបានបញ្ជូនត្រលប់ទៅផ្ទះវិញ ដោយសារតែពួកគេមិនបានបំពេញតាមលក្ខណៈវិនិច្ឆយជ្រើសរើសសម្រាប់ការចូលបម្រើយោធា»។
គួរបញ្ជាក់ថា កាលពីថ្ងៃទី២១ ខែកញ្ញា ឆ្នាំ២០២២ ប្រធានាធិបតីរុស្ស៊ី លោក វ្លាឌីមៀរ ពូទីន (Vladimir Putin) បានបញ្ជាឱ្យមានការកេណ្ឌទ័ពជាលើកដំបូងដែលមិនធ្លាប់មាន ចាប់តាំងពីសង្គ្រាមលោកលើកទី២ និងចោទលោកខាងលិចថាមានបំណងចង់បំផ្លាញរុស្ស៊ី។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមដោយប្រធានាធិបតី លោក វ្លាឌីមៀរ ពូទីន។
រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ឆ្នាំ២០២២ ដែលបានធ្វើឱ្យបណ្ដាប្រទេសមួយចំនួននៅលើពិភពលោកសម្រេចដាក់ទណ្ឌកម្មយ៉ាងធ្ងន់ធ្ងរជាបន្តបន្ទាប់លើរុស្ស៊ី៕