នាយកដ្ឋានជំនាញរបស់ក្រសួងពាណិជ្ជកម្ម ច្រានចោលការចោទប្រកាន់ដែលថា មន្ត្រីរបស់ខ្លួនបានចុះទៅជំរិតទារប្រាក់ពីដេប៉ូលក់ប្រេងរបស់ពលរដ្ឋជាប្រចាំ ដោយថា មន្ត្រីរបស់ខ្លួនបានអនុវត្តត្រឹមត្រូវតាមនីតិវិធីច្បាប់ និងបទប្បញ្ញត្តិជាធរមាន។
ការបដិសេធនេះ ធ្វើឡើងតាម រយៈលិខិតបំភ្លឺ ចុះថ្ងៃទី៣ ខែតុលា របស់ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្ម និងបន្ទាប់ពីមានគណនី TikTok មួយ បានបង្ហោះវីដេអូផ្សព្វផ្សាយកាលពីពេលថ្មីៗនេះ ដោយរៀបរាប់ចោទក្រុមមន្ត្រីក្រសួងពាណិជ្ជកម្មថា បានចុះជំរិតទារប្រាក់ពីដេប៉ូលក់ប្រេងរបស់ពួកគាត់ជាប្រចាំ។
ក្នុងលិខិតនោះ ក.ប.ប បានលើកឡើងថា គណនី TikTok មួយនោះ បានផ្សព្វផ្សាយព័ត៌មាន ដោយប្រើប្រាស់រូបភាព និងពាក្យសំដីចោទប្រកាន់មកលើមន្ត្រីរបស់ខ្លួន ដែលប្រាស់ចាកពីការពិត។ ក.ប.ប បានគូសបញ្ជាក់ថា មន្ត្រីជំនាញរបស់ខ្លួនបានអនុវត្តការងារត្រឹមត្រូវតាមនីតិវិធីច្បាប់ និងបទប្បញ្ញត្តិជាធរមាន។
ប្រភពដដែលបន្ថែមថា ក្រោយពីទទួលបានព័ត៌មាននេះ និងបន្ទាប់ពីមានការបញ្ជាពី លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម អគ្គនាយកដ្ឋានបានចាត់មន្ត្រីចុះស្រាវជ្រាវករណីនេះ ដើម្បីស្វែងរកការបំភ្លឺពីមន្ត្រីដែលបានចុះអនុវត្តផ្ទាល់ និងម្ចាស់ដេប៉ូលក់ប្រេងផងដែរ។
ស្ថាប័ននេះបន្តថា ភាគីមន្ត្រីដែលបានចុះអនុវត្តច្បាប់ និងម្ចាស់ដេប៉ូលក់រាយប្រេងឥន្ធនៈ សុទ្ធតែបានបង្ហាញឯកសាររបស់មន្ត្រីអនុវត្តច្បាប់បានបំពេញពេលចុះត្រួតពិនិត្យនៅដេប៉ូប្រេងឥន្ធនៈ និងបានរកឃើញការធ្វើអាជីវកម្មមិនស្មោះត្រង់ (មិនគ្រប់លីត្រ) ជូនអ្នកប្រើប្រាស់ ក្នុងនោះ ភាពមិនអនុលោម ត្រូវបានរកឃើញចំនួន ២លើក គឺនៅខែឧសភា ឆ្នាំ២០២២ មួយលើក និងនៅខែសីហា ឆ្នាំ២០២២.មួយលើក និងបានធ្វើការព្រមាន និងពិន័យអន្តរការណ៍ចំពោះម្ចាស់ដេប៉ូ ដោយមានវិក័យបត្រ និងបង្កាន់ដៃបង់ប្រាក់ពិន័យអន្តរការណ៍ត្រឹមត្រូវ។
ក.ប.ប អះអាងថា៖ «យោងតាមការសារភាពរបស់ម្ចាស់ដេប៉ូ ការបង្ហោះវីដេអូកន្លងមកនេះ គឺដោយសារតែមានការមិនសប្បាយចិត្តចំពោះសមត្ថកិច្ច ដែលបានចុះត្រួតពិនិត្យ និងអនុវត្តច្បាប់ដោយធ្វើការពិន័យអន្តរការណ៍ចំនួន ២លើក កន្លងមក ចំពោះដេប៉ូរបស់ខ្លួនដែលបានបំពានច្បាប់ស្ដីពីកិច្ចការពារអ្នកប្រើប្រាស់»។
អគ្គនាយកដ្ឋាន ក.ប.ប អំពាវនាវដល់ធុរជនដែលប្រកបអាជីវកម្មនៅកម្ពុជា រកស៊ីដោយសុចរិត ស្មោះត្រង់ ដើម្បីរួចផុតពីការប្រឈមចំពោះមុខច្បាប់ជាធរមាន។
ក.ប.ប បន្តថា៖ «មិនត្រូវផ្សព្វផ្សាយព័ត៌មានមិនពិត ចោទប្រកាន់ចំពោះសមត្ថកិច្ចដែលជាអ្នកអនុវត្តច្បាប់ដោយគ្មានភស្តុតាង ដែលនឹងនាំដល់ការទទួលខុសត្រូវចំពោះមុខច្បាប់ផងដែរ»។
ជាមួយគ្នានេះដែរ ក្រសួងពាណិជ្ជកម្ម ក៏បានប្រាប់ឱ្យអ្នកប្រកបអាជីវកម្មនានា ផ្តល់កិច្ចសហការជាមួយសមត្ថកិច្ចនៅរាល់ពេលសមត្ថកិច្ចចុះត្រួតពិនិត្យ សំដៅការពារផលប្រយោជន៍របស់អ្នកប្រើប្រាស់ និងជំរុញឱ្យការធ្វើអាជីវកម្មប្រកបដោយសមធម៌៕