គណបក្សឆន្ទៈខ្មែរ សម្រេចមិនដាក់បញ្ជីបេក្ខជនឈរឈ្មោះ សម្រាប់ជ្រើសតាំងតំណាងរាស្រ្តដែលបម្រើឱ្យការបោះឆ្នោតរដ្ឋសភា នៅក្នុងខែកក្កដា ឆ្នាំ២០២៣ ខាងមុខនេះទេ គឺគណបក្សក្រៅរដ្ឋាភិបាលមួយនេះ សម្រេចជ្រកក្រោមឆ័ត្រតែមួយជាមួយនឹងគណបក្សភ្លើងទៀន ខណៈគណបក្សកាន់អំណាចចាត់ទុកការរួមកម្លាំងគ្នានេះថា នឹងមិនធ្វើឱ្យគណបក្សប្រជាជនកម្ពុជា ត្រូវព្រឺខ្នងណាមួយនោះឡើយ។
លោក គង់ មុនីកា ប្រធានគណបក្សឆន្ទៈខ្មែរ បានឱ្យដឹងនៅថ្ងៃអង្គារនេះថា គណបក្សរបស់ខ្លួន បានសម្រេចជាគោលការណ៍ហើយ គឺមិនដាក់បញ្ជីបេក្ខភាពសម្រាប់ឈរឈ្មោះបោះឆ្នោតទេ នៅថ្ងៃខាងមុខនេះ ដោយបេក្ខភាពទាំងអស់នឹងត្រូវមកឈរឱ្យតែគណបក្សភ្លើងទៀនតែមួយជាមួយគ្នា។ លោកបន្តថា នៅចំពោះមុខនេះ ការសម្រេចរំលាយគណបក្សឆន្ទៈខ្មែរ ឬទុកគណបក្សនេះឱ្យនៅចាំផ្ទះ ឬក៏ត្រូវរួបរួមគ្នាជាមួយគណបក្សភ្លើងទៀនឬយ៉ាងណានោះ គឺកំពុងស្ថិតនៅក្នុងការពិនិត្យ និងពិគ្រោះយោបល់បន្តទៀតនៅឡើយ។
លោកបន្តថា៖ «យើងសម្លឹងទៅរកការរួមគ្នាជាគណបក្សតែមួយ ក៏ប៉ុន្តែទៅតាមស្ថានការណ៍ជាក់ស្តែង ដូចដែលសេចក្តីថ្លែងការណ៍របស់គណបក្សឆន្ទៈខ្មែរអីចឹង។ យើងត្រូវការពេលវេលាដើម្បីជជែកគ្នាទៀតហើយ តែពីពេលនេះទៅយើងនៅក្រោមស្លាកគណបក្សភ្លើងទៀនតែមួយ អីចឹង មានន័យថាយើងមិនទាន់ច្របាច់បញ្ចូលគ្នាតែមួយឡើយទេ»។
រដ្ឋាភិបាល បានដាក់ចេញគោលការណ៍រួចហើយថា ការបោះឆ្នោតជ្រើសតាំងតំណាងរាស្រ្ត សម្រាប់នីតិកាលទី៧នេះ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣។
លោកនាយករដ្ឋមន្រ្តី ហ៊ុន សែន ធ្លាប់ថ្លែងជាសាធារណៈរួចហើយថា ក្រោយឆ្នាំ២០២៣ទៅ រដ្ឋាភិបាលរបស់លោកនឹងលែងមានការរិះគន់ថា ជារដ្ឋាភិបាលឯកបក្ស ដូចមុនទៀតហើយ។ ក្នុងន័យនេះ ទំនងលោកមើលឃើញថា តាមរយៈការចូលរួមពីបក្សនយោបាយដទៃ ក្នុងការបោះឆ្នោតនេះ កៅអីរដ្ឋសភានឹងត្រូវធ្លាក់ទៅគណបក្សផ្សេងខ្លះ។
ការសម្រេចឈានជើងចូលរួមកម្លាំងតែមួយរបស់គណបក្សឆន្ទៈខ្មែរ និងគណបក្សភ្លើងទៀននេះ ស្របពេលសម្ព័ន្ធគណបក្សនយោបាយទាំង៤ កំពុងតែធ្វើយុទ្ធនាការតស៊ូមតិ ជំរុញឱ្យស្ថាប័ន គ.ជ.ប និងស្ថាប័នសំខាន់ៗដទៃទៀត របស់រដ្ឋាភិបាល កែលម្អប្រព័ន្ធបោះឆ្នោត និងលំហសេរីភាពខាងនយោបាយ។
ដោយឡែក សេចក្តីប្រកាសព័ត៌មានរបស់គណបក្សភ្លើងទៀន ដែលចេញនៅថ្ងៃទី៤ ខែតុលានេះឯណេះវិញ ក៏មិនខុសគ្នាពីអ្វីដែលជាជំហររបស់មេដឹកនាំគណបក្សឆន្ទៈខ្មែរដែរទេ។ តាមរយៈសេចក្តីថ្លែងការណ៍របស់ខ្លួន គណបក្សចាស់វង្សាមួយនេះ បានបង្ហាញការស្វាគមន៍ចំពោះគណបក្សឆន្ទៈខ្មែរ ដែលជាបក្សសម្ព័ន្ធអ្នកប្រជាធិបតេយ្យជាមួយគ្នា ក្នុងការសម្រេចចិត្តមិនដាក់បញ្ជីបេក្ខជនឈរឈ្មោះបោះឆ្នោតជ្រើសតាំងតំណាងរាស្រ្ត ហើយចូលរួមជាមួយគណបក្សភ្លើងទៀន ជាគណបក្សតែមួយ ចាប់ពីពេលនេះទៅ។
បន្ថែមលើសេចក្តីថ្លែងការណ៍នេះ លោក ថាច់ សេដ្ឋា អនុប្រធានគណបក្សភ្លើងទៀន មានជំនឿថា ការរួមកម្លាំងគ្នាឡើងវិញនេះ នឹងមិនមានទំនាស់ផលប្រយោជន៍ណាមួយកើតឡើងទេ ព្រោះអ្នកនយោបាយទាំងអស់ គឺសុទ្ធតែតម្កល់ផលប្រយោជន៍ជាតិជាធំដូចគ្នា។ មួយវិញទៀត លោកថា ការតែងតាំង និងការផ្តល់ឋានៈបែបណានោះ គឺជាការសម្រេចតាមលក្ខខន្តិកៈ ដូចមានចែងរបស់គណបក្សភ្លើងទៀន។
លោកបន្តថា៖ «ការចូលរួមនេះ មានន័យថា មកធ្វើសកម្មភាពនៅក្រោមស្លាកគណបក្សភ្លើងទៀនតែមួយ អីចឹងបេក្ខជនតំណាងរាស្រ្តក៏ដោយ គឺយើងឈរនៅក្នុងតំណាងរាស្រ្តរបស់គណបក្សភ្លើងទៀនតែមួយនេះឯង »។
បើទោះជាបែបណា សម្រាប់អ្នកនាំពាក្យគណបក្សប្រជាជនកម្ពុជា លោក សុខ ឥសាន បានចំអកឱ្យការរួមកម្លាំងគ្នានេះថា គ្រាន់តែជាការលំអរផ្នែកប្រជាធិបតេយ្យ ដែលជួយឱ្យបក្សប្រជាជនកម្ពុជា បានកាន់អំណាចតទៅទៀតទេ។ មិនតែប៉ុណ្ណោះ លោកថា កម្លាំងដែលមានការគាំទ្រស្តួចស្តើងនៅតាមមូលដ្ឋានរបស់បក្សនយោបាយទាំងពីរ នៅតែជាកម្លាំងដែលមិនអាចជាការគំរាមកំហែង ចំពោះភាពជោគជ័យក្នុងពេលបន្តបន្ទាប់ទៀត របស់គណបក្សកាន់អំណាចបានដដែល។
លោកបន្តថា៖ «ការបញ្ចូលគ្នារវាងគណបក្សទាំងពីរហ្នឹង វាជាសិទ្ធិនយោបាយរបស់គាត់ទេ ឱ្យតែមេដឹកនាំគណបក្សទាំងពីរមានឆន្ទៈដូចគ្នា។ ខ្ញុំព្រួយបារម្ភតែចូលហើយចេញៗ ដូចកន្លងទៅយើងឮថាគណបក្សបួន ឬប្រាំហ្នឹង ប្រុងបញ្ចូលគ្នាតែទីបំផុតចង់សម្ព័ន្ធភាពមានតែ២បក្ស នេះគឺជាចំណុចទី១ ហើយចំណុចទី២ក្មួយលើកថាជាគណបក្សតូចៗ បើជាគណបក្សតូចៗចូលគ្នាពីរ វានៅតែតូចដដែល។ វាអត់ខ្លាំងទេ!»។
តាមរយៈសេចក្តីប្រកាសព័ត៌មាននៅថ្ងៃនេះ របស់គណបក្សភ្លើងទៀន ដែលបើកផ្លូវឱ្យមានការរួមកម្លាំងគ្នាពីអ្នកនយោបាយ នៃគណបក្សឆន្ទៈខ្មែរ គណបក្សចាស់វង្សាមួយនេះ ក៏សម្រេចតែងតាំងលោក គង់ គាំ ក្នុងពេលតែមួយ ជាឧត្តមទីប្រឹក្សានៃគណបក្សភ្លើងទៀនផងដែរ៕