លោកនាយករដ្ឋមន្ត្រី ហ៊ុន សែន បានឱ្យដឹងថា ភរិយារបស់លោកបានជ្រើសរើសទីតាំងដីមួយទំហំ ៣៥គុណ២៥ម៉ែត្រ ក្នុងវត្តមុនីសុវណ្ណ (ហៅវត្តជំពុះក្អែក)ក្នុងខណ្ឌច្បារអំពៅ រាជធានីភ្នំពេញ ដើម្បីរៀបចំធ្វើជាចេតិយជូនលោកក្រោយទទួលមរណភាពទៅ។
ថ្លែងក្នុងពិធីសំណេះសំណាលជាមួយប្រជាពលរដ្ឋក្នុងស្រុកបន្ទាយស្រី ខេត្តសៀមរាប កាលពីចុងសប្តាហ៍កន្លងទៅលោក ហ៊ុន សែន បានលើកឡើងថា ភរិយារបស់លោកបានលួចសាងសង់ចេតិយមួយទុកជូនសម្រាប់លោក ដែលករណីនេះកើតឡើងបន្ទាប់ពី លោក ហ៊ុន ណេង ដែលជាបងប្រុសរបស់លោកបានស្លាប់ដោយគាំងបេះដូងភ្លាមៗ កាលពីខែឧសភា ឆ្នាំ២០២២កន្លងទៅ។
ទោះជាយ៉ាងណា លោកនាយករដ្ឋមន្ត្រីថា រូបលោកនឹងមិនទុកធាតុរបស់ខ្លួននៅចេតិយក្នុងវត្តឡើយ ដោយចង់រៀបចំនៅដីផ្ទះរបស់លោកជំនួសវិញ។
លោក ហ៊ុន សែន ថា៖ «យោងលើអបិយជំនឿ ខ្ញុំអត់ហ៊ានដាច់ខាតហើយ។ តែមិនស្រួល បារមីយើង ព្រលឹងយើង ពេលទៅដល់ហ្នឹង[ចេតិយក្នុងវត្ត] ខ្មោចព្រលឹងយើង គឺត្រូវបានគេជាន់កនៅហ្នឹង។ បារមីមិនដល់ កុំលេង។ ខ្ញុំអត់លេងទេ»។
លោកបន្តថា៖ «ប្រពន្ធខ្ញុំ គាត់ទៅលួចធ្វើចេតិយនៅក្នុងវត្តចំពុះក្អែក។ ខ្ញុំថា ខ្ញុំមិនទៅនៅវត្តទេ។ អត់ទៅទេ សុំទោស មិនទៅទេ»។
ទាក់ទិននឹងករណីនេះ លោកបន្ថែមថា វិធីមួយដែលងាយស្រួលសម្រាប់លោកគឺការសាងសង់ទីតាំង មួយនៅផ្ទះរបស់លោកក្នុងក្រុងតាខ្មៅ ខេត្តកណ្ដាល។
លោកថា៖ «ប្រពន្ធរបស់ខ្ញុំបាននិយាយថា គាត់បានធ្វើរួច [ចេតិយ] នៅវត្តចំពុះក្អែកហើយ ដោយខ្ញុំថា សុំទោស ខ្ញុំអត់ទៅនៅដាច់ខាតគឺមិនទៅនៅ ព្រោះយើងមិនដឹងថាវត្តហ្នឹង មានអីខ្លះនៅហ្នឹង»។
លោកបន្តថា៖ «ខ្មោចយើងទៅ ស្រាប់តែមានពួកយូកូម (ក្រុមបងធំ)។ ខ្ញុំអត់ទៅនៅទេ សុំនិយាយគ្នាឱ្យច្បាស់អ៊ីចឹងតែម្ដងថា ខ្ញុំមិនទៅនៅវត្តទេ។ ដល់អ៊ីចឹងទៅ ឥឡូវប្រពន្ធខ្ញុំក៏ប្រគល់អាហ្នឹង [ចេតិយ] ឱ្យបងរបស់ខ្ញុំ [លោក ហ៊ុន សាន]»។
លោកថា៖ «ខ្ញុំធ្វើក្បែរផ្ទះខ្ញុំ ហើយថ្ងៃមុនប្រាប់ចៅ ព្រោះចៅច្បងនឹងទទួលបានមរតកផ្ទះរបស់ខ្ញុំ ដែលខ្ញុំកំពុងនៅរាល់ថ្ងៃនៅតាខ្មៅ ដោយនឹងទទួលមរតកផ្ទះហ្នឹង»។
ជាមួយគ្នានេះ លោក ហ៊ុន សែន ក៏បានក្រើនរំលឹកដល់ចៅកុំឱ្យលក់កន្លែង [ផ្ទះ] ហ្នឹង ដោយថា បើសិនជាលក់ គឺនឹងលក់ខ្មោចតាដែលរស់នៅទីនោះដូចគ្នា។
គួរបញ្ជាក់ថា នៅក្នុងវត្តមុន្នីសុវណ្ណកាលពីថ្ងៃអង្គារកន្លងទៅ ចេតិយខាងលើនេះនៅតែបន្តសាងសង់ជាមួយនឹងរចនាបថបន្ថែមទៀត រួមទាំងការដំឡើងភ្លើងបំភ្លឺផងដែរ។
ទាក់ទិននឹងករណីនេះ ចៅសង្កាត់ព្រែកថ្មីលោក លីវ វណ្ណថេង ក៏បានឱ្យដឹងថា ទីតាំងនេះ [វត្តមុនីសុវណ្ណ ហៅចំពុះក្អែក] ទទួលបានការចាប់អារម្មណ៍ដោយសារតែមានសោភណ្ឌភាព និងត្រូវបានរៀបចំល្អ។
លោកថា៖ «ជាក់ស្ដែង គឺមិនមានជាបារមីអីពិសេសទេ [ប៉ុន្តែ] បរិវេណវត្តមានទំហំធំជាមួយនឹងទេសភាព និងដើមឈើដ៏ស្រស់ស្អាត រួមនឹងស្រះមួយផងដែរ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Hun Sen Declines Ornate Stupa, Wants to Stay at Home After Death
