រដ្ឋមន្ត្រីការបរទេសជប៉ុនលោក ហាយ៉ាហ្ស៊ី យ៉ូហ្ស៊ីម៉ាសា (Hayashi Yoshimasa) ឱ្យដឹងថារដ្ឋាភិបាលជប៉ុន បានបញ្ជាឱ្យឯកអគ្គរដ្ឋទូតរុស្ស៊ីចាកចេញពីប្រទេសជប៉ុន ត្រឹមថ្ងៃទី១០ ខែតុលា ឆ្នាំ២០២២នេះ ជាការឆ្លើយតបនឹងការបណ្តេញអគ្គកុងស៊ុលរបស់ខ្លួនចេញពីប្រទេសរុស្ស៊ី។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន NHK។
ពាក់ព័ន្ធនឹងករណីនេះ លោក Hayashi បានប្រាប់អ្នកសារព័ត៌មានថា កាលពីថ្ងៃអង្គារ អនុរដ្ឋមន្ត្រីការបរទេសជប៉ុន លោក ម៉ូរី ថាកេអូ (Mori Takeo) បានកោះហៅឯកអគ្គរដ្ឋទូតរុស្ស៊ីប្រចាំប្រទេសជប៉ុន លោកមៃខែល ហ្គលូហ្សីន (Mikhail Galuzin)។ លោក Mori បានប្រកាសថាលោក Mikhail Galuzin ជាជនមិនត្រូវបានស្វាគមន៍ (persona non grata)។
កាលពីខែមុន សេវាសន្តិសុខសហព័ន្ធរបស់រុស្ស៊ី បានឃុំខ្លួនអគ្គកុងស៊ុលជប៉ុនប្រចាំនៅទីក្រុង វ្លាឌីវ៉ូស្តុក (Vladivostok) ប្រទេសរុស្ស៊ីលោក ម៉ូតូគិ តាតស៊ុណូរិ (Motoki Tatsunori) ដោយចោទប្រកាន់ពីបទចារកម្ម។
រដ្ឋាភិបាលរុស្ស៊ីបានប្រកាសថា លោក Motoki Tatsunori ជាបុគ្គលមិនត្រូវបានស្វាគមន៍ និងបញ្ជាឱ្យលោកចាកចេញពីប្រទេសរបស់ខ្លួន។
លោក Hayashi បានប្រាប់អ្នកសារព័ត៌មានថា ការឃុំខ្លួនអគ្គកុងស៊ុលជប៉ុននេះ គឺជាការរំលោភបំពានជាក់ស្តែង និងធ្ងន់ធ្ងរចំពោះច្បាប់អន្តរជាតិ។ លោកបានហៅទង្វើរបស់រុស្ស៊ីថាមិនគួរឱ្យជឿ និងមិនអាចទទួលយកបានជាដាច់ខាត៕
