ប្រជាពលរដ្ឋប្រមាណ ៣ ០០០នាក់ នៅឃុំព្រះដាក់ ស្រុកបន្ទាយស្រី ខេត្តសៀមរាប បានប្រមូលផ្តុំតវ៉ានៅមុខសាលាឃុំកាលពីថ្ងៃពុធ ក្រោយពួកគាត់បានទទួលព័ត៌មានថា អាជ្ញាធរជាតិអប្សរា ឱ្យពួកគាត់ចាកចេញពីលំនៅឋានទៅនៅទីតាំងថ្មីក្នុងតំបន់រុនតាឯក។
លោក ជា វីរៈ ជាប្រជាពលរដ្ឋរស់នៅភូមិថ្នល់ទទឹង ឃុំព្រះដាក់ ប្រាប់វីអូឌីថា ពលរដ្ឋនៅឃុំព្រះដាក់ បានប្រមូលផ្តុំតវ៉ានៅមុខសាលាឃុំ កាលពីថ្ងៃម្សិលមិញ ដើម្បីទាមទារសុំមិនចាកចេញពីលំនៅឋាន ឬដោះដូរទៅកន្លែងថ្មី។ លោកបន្តថា ថ្មីៗនេះ អាជ្ញាធរជាតិអប្សរា បានមកសម្របសម្រួលឱ្យប្រជាពលរដ្ឋនៅភូមិមួយចំនួន ក្នុងឃុំនេះឱ្យដោះដូរទៅនៅទីតាំងថ្មីក្នុងតំបន់រុនតាឯក ក្រោមហេតុផលថា តំបន់ដែលពលរដ្ឋកំពុងរស់នៅបច្ចុប្បន្ន ជាតំបន់រមណីយដ្ឋានអង្គរ។
លោក ជា វីរៈ បន្ថែមថា៖ «យើងមិនព្រមចាកចេញ ដោយសារយើងរស់នៅកន្លែងភូមិចាស់នេះយូរឆ្នាំហើយ ហើយយើងមិនចង់ចាកចេញដោយបារម្ភពីផលប៉ះពាល់សេដ្ឋកិច្ចគ្រួសារ។ យើងទៅនៅកន្លែងថ្មីថា តើមុខរបរយើង យើងត្រូវធ្វើអី រកស៊ីអី។ យើងនៅភូមិចាស់នេះយើងអត់ការងារធ្វើ តែយើងមានស្រែចម្ការធ្វើ។ អីចឹងហើយយើងសុំរស់នៅភូមិចាស់ យើងមិនព្រមរុះរើផ្ទះទៅកន្លែងថ្មី»។
ពលរដ្ឋរស់នៅឃុំព្រះដាក់ម្នាក់ទៀត លោក និន ណន និយាយថា គ្រួសារលោកបានរស់នៅភូមិចាស់នេះ៣ជំនាន់មកហើយ និងមិនអាចដោះដូរទៅកន្លែងថ្មីបានឡើយ ខណៈលោកថា ការដោះស្រាយរបស់អាជ្ញាធរជុំវិញរឿងនេះពុំមានតម្លាភាព។
លោកបន្តថា ការដោះដូរទៅកន្លែងថ្មីនៅតំបន់រុនតាឯកនោះ គឺអាជ្ញាធរផ្តល់ដីឡូតិ៍ត្រឹមតែ២០ម៉ែត្រគុណ៣០ម៉ែត្រប៉ុណ្ណោះ ទោះដីអ្នកភូមិមានទំហំប៉ុណ្ណាក៏ដោយ។ លោកថា គ្រួសារលោកមានដីលំនៅឋានទំហំ៣០ម៉ែត្រគុណ២០០ម៉ែត្រ និងដីស្រែទំហំ ៥ហិកតា សម្រាប់បង្កបង្កើនផលចិញ្ចឹមគ្រួសារជារៀងរាល់ឆ្នាំ។
ពលរដ្ឋរូបនេះ បន្តថា ការដែលអាជ្ញាធរឱ្យគាត់ដោះដូរ ដោយផ្តល់ដីឡូតិ៍មកវិញត្រឹមតែ២០ម៉ែត្រគុណ៣០ម៉ែត្រនៅតំបន់រុនតាឯកនោះ គឺលោកមិនអាចទទួលយកបានឡើយ។
លោកបន្ថែមថា៖ «ខ្ញុំមិនមែនជាមន្ត្រីរាជការដល់ខែបើកប្រាក់ខែនោះទេ។ ខ្ញុំជាកសិករសុទ្ធសាត ខ្ញុំអាស្រ័យផលតដូនតាច្រើនជំនាន់មកហើយ រស់ដោយពឹងកសិកម្មសុទ្ធ ហើយអាជ្ញាធរឱ្យយើងដោះដូរទៅកន្លែងថ្មី គឺដីយើងមានប៉ុន្មានហិកតាក៏គេឱ្យដោះដូរឱ្យយើងវិញ ត្រឹមតែក្បាល២០ម៉ែត្រគុណ៣០ម៉ែត្រដែរ អីចឹងឱ្យពួកខ្ញុំទទួលយកម៉េចកើត។ ខ្ញុំអាស្រ័យផលរបៀបម៉េច។ ពួកខ្ញុំមិនទាមទារអ្វីទេ ពួកខ្ញុំទាមទារសុំរស់នៅក្នុងភូមិឃុំដដែល។ ពួកខ្ញុំអត់ចាកចេញពីលំនៅឋានរបស់ពួកខ្ញុំទេ។ ខ្ញុំសុំអង្វរដល់សម្តេច[ហ៊ុន សែន]សុំលោកពិចារណាឡើងវិញ ស្រណោះដល់ប្រជាពលរដ្ឋមិនមែនតិចគ្រួសារទេ បើគិតក្នុងឃុំព្រះដាក់ទាំងមូល ចូលខ្ទង់ម៉ឺននាក់ហើយ»។
មេឃុំព្រះដាក់ លោក ភិន ថោង ប្រាប់វីអូឌីថា ពលរដ្ឋប្រមាណ ៣ ០០០នាក់ បានប្រមូលផ្តុំនៅមុខសាលាឃុំ ក្រោយអាជ្ញាធរជាតិអប្សរា ចុះមកសាកសួរយោបល់ពលរដ្ឋអំពីការស្ម័គ្រចិត្តដោះដូរទីលំនៅ ទៅនៅតំបន់អភិវឌ្ឍន៍រុនតាឯក។
មេឃុំរូបនេះ បញ្ជាក់ថា អាជ្ញាធរមិនទាន់បានកំណត់ឱ្យពលរដ្ឋចាកចេញពីលំនៅឋាននៅឡើយទេ ដោយគ្រាន់តែមកស៊ើបសួរប៉ុណ្ណោះ ហើយលោកក៏មិនទាន់អាចបញ្ជាក់បានថា ប្រជាពលរដ្ឋនៅឃុំព្រះដាក់ ត្រូវដោះដូរទៅកន្លែងថ្មីយ៉ាងណាដែរ ដោយរងចាំការសម្រេចពីថ្នាក់លើសិន។ បើតាមមេឃុំរូបនេះ នៅឃុំព្រះដាក់ មានពលរដ្ឋរស់នៅចំនួន ២ ២១១គ្រួសារ ឬស្មើនឹង៩ ៦២១នាក់។
លោកបន្ថែមថា៖ «ខ្ញុំអត់ដឹងរឿងនេះច្បាស់ទេ រងចាំមើលថ្នាក់លើសម្រេច ប៉ុន្តែអាជ្ញាធរយើងចុះព្រឹកមិញនេះ គ្រាន់តែចុះស្រង់ព័ត៌មាន និងសួរមតិយោបល់បងប្អូនប្រជាពលរដ្ឋទេ។ អត់ទាន់ដឹងថា គេឱ្យពួកគាត់ចាកចេញឬក៏អត់ទេ។ ខ្ញុំអត់ទាន់មានចំលើយពិតប្រាកដទេ»។
អ្នកនាំពាក្យអាជ្ញាធរជាតិអប្សរាលោក ឡុង កុសល សុំមិនឆ្លើយតបពាក់ព័ន្ធរឿងនេះទេ ដោយលោកបង្វែរឱ្យទៅសួរក្រសួងរៀបចំដែនដី នគរូបនីយកម្ម និងសំណង់វិញ ប៉ុន្តែលោក សេង ឡូត អ្នកនាំពាក្យក្រសួងរៀបចំដែនដី មិនលើកទូរស័ព្ទ។
មន្ត្រីឃ្លាំមើលការរំលោភសិទ្ធិមនុស្សអាដហុកប្រចាំខេត្តសៀមរាប លោក សួស ណារិន ដែលតាមដានករណីនេះ បានទទូចដល់អាជ្ញាធរពាក់ព័ន្ធសម្របសម្រួលដោះស្រាយរឿងនេះដោយសន្តិវិធីជូនពលរដ្ឋ ដោយលោកបារម្ភខ្លាចមានការតវ៉ាទ្រង់ទ្រាយធំ ដែលអាចឈានទៅកើតមានអំពើហិង្សាណាមួយជាដើម។
លោកបន្ថែមថា៖ «ប្រសិនជាពុំមានការប្រជុំសម្របសម្រួលដោះស្រាយរឿងនេះទេ ខ្ញុំបារម្ភថា បើថ្ងៃទី៧ ខែតុលានេះ អត់បានប្រជុំដោះស្រាយជូនពួកគាត់ទេ វាអាចឱ្យពួកគាត់តវ៉ាកាន់តែខ្លាំងថែមទៀត ព្រោះដូចថាអាជ្ញាធរកុហកគាត់។ ខ្ញុំគិតថាអាជ្ញាធរគួរតែសម្របសម្រួលកុំឱ្យពលរដ្ឋមានបញ្ហាថ្នាំងថ្នាក់បន្តទៅទៀត»។
គួររំលឹកថា រដ្ឋាភិបាលកំពុងរៀងចំតំបន់រមណីយដ្ឋានអង្គរឡើងវិញ ដោយប្រកាសឱ្យប្រជាពលរដ្ឋដែលកំពុងរស់នៅ និងអាស្រ័យផលនៅតំបន់ការពារមួយនេះ ស្ម័គ្រចិត្តដោះដូរលំនៅឋានទៅនៅទីតាំងថ្មី ដែលរៀបចំដោយអាជ្ញាធរនៅតំបន់អភិវឌ្ឍន៍រុនតាឯក ស្រុកបន្ទាយស្រី ដោយក្នុង១គ្រួសារទទួលបានដីឡូតិ៍២០ម៉ែត្រគុណ៣០ម៉ែត្រ ដែលគិតមកដល់ដើមខែតុលានេះ មានប្រមាណជិត ៣ ០០០គ្រួសារ។ នេះបើតាមរបាយការណ៍តួលេខដែលរដ្ឋាភិបាលបានប្រកាសពីចំនួនពលរដ្ឋនៅតំបន់រុនតាឯក ដែលទទួលបានប័ណ្ណក្រីក្រ។
ក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា កាលពីថ្ងៃទី៤ ខែតុលា លោកនាយករដ្ឋមន្ត្រី ហ៊ុន សែន បានព្រមានឈប់ផ្តល់សំណងដល់ពលរដ្ឋដែលរស់នៅខុសច្បាប់ក្នុងតំបន់រមណីយដ្ឋានអង្គរ បើពលរដ្ឋទាំងនោះជឿតាមការញុះញង់របស់អ្នកនយោបាយ ហើយមិនព្រមចាកចេញ ដើម្បីចង់ទាមទារថ្លៃសំណងខ្ពស់ជាងអ្វីដែលរដ្ឋាភិបាលបានកំណត់។
លោកនាយករដ្ឋមន្ត្រី ហ៊ុន សែន ថ្លែងថា ថ្មីៗនេះ លោកបានទទួលព័ត៌មានថា មានមនុស្សមួយចំនួនបានទៅឃោសនាប្រាប់ប្រជាពលរដ្ឋដែលរស់នៅខុសច្បាប់ក្នុងតំបន់រមណីយដ្ឋានអង្គរ ក្នុងខេត្តសៀមរាប កុំអាលចាកចេញ ដើម្បីតថ្លៃសំណងឱ្យបានច្រើនជាមុន ឬបានដីច្រើនជាងមុនជាដើម។
លោកបានផ្តាំទៅប្រជាពលរដ្ឋនៅតំបន់រមណីយដ្ឋានអង្គរ កុំជឿតាមការឃោសនាទាំងនោះ ព្រោះរដ្ឋាភិបាលបានកំណត់ពីសំណងទៅឱ្យប្រជាពលរដ្ឋរួចទៅហើយ៕
