អ្នកនាំពាក្យនគរបាលថៃ បាននិយាយថា យ៉ាងហោចណាស់មានមនុស្ស ៣៤នាក់ស្លាប់ នៅក្នុងការបាញ់សម្លាប់រង្គាលនៅ មណ្ឌលថែទាំកុមារមួយកន្លែង ក្នុងខេត្តភាគឦសាននៃប្រទេសថៃ នៅថ្ងៃព្រហស្បតិ៍នេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។
នគរបាលបាននិយាយនៅក្នុងសេចក្តីថ្លែងការណ៍មួយថា ជនរងគ្រោះមានទាំងកុមារ (២២នាក់) និងមនុស្សពេញវ័យ ហើយខ្មាន់កាំភ្លើងគឺជា អតីតមន្ត្រីនគរបាល។ បច្ចុប្បន្ន នគរបាលកំពុងតាមប្រមាញ់ខ្មាន់កាំភ្លើង។
អ្នកនាំពាក្យរដ្ឋាភិបាល បាននិយាយថា នាយករដ្ឋមន្ត្រីថៃ បានជូនដំណឹងដល់ភ្នាក់ងារទាំងអស់ឱ្យចាត់វិធានការ និងចាប់ខ្លួនជនល្មើស។
បច្ចុប្បន្នភាព៖ យោងតាមការចេញផ្សាយរបស់ទីភ្នាក់ងារសារព័ត៌មាន CNA បានឱ្យដឹងថា ខ្មាន់កាំភ្លើងមានឈ្មោះថា ផាន់យ៉ា កាំរ៉ាប់ (Panya Kamrab) អាយុ ៣៤ឆ្នាំ បានរត់គេចខ្លួន បន្ទាប់ពីបាញ់ប្រហារដោយជិះរថយន្តភីកអាប់ពណ៌ស។ ទោះបីយ៉ាងណា យោងតាមការិយាល័យស៊ើបអង្កេតកណ្តាលរបស់ថៃ បានបញ្ជាក់ថា ខ្មាន់កាំភ្លើងបានសម្លាប់ប្រពន្ធ កូន បន្ទាប់មកសម្លាប់ខ្លួនឯង៕
