ប្រមុខរាជរដ្ឋាភិបាលកម្ពុជា លោក ហ៊ុន សែន បានអំពាវនាវដល់ពលរដ្ឋនៅឃុំព្រះដាក់ ស្រុកបន្ទាយស្រី ខេត្តសៀមរាប រក្សាភាពស្ងប់ស្ងាត់សិន ពាក់ព័ន្ធការប្រតិកម្មទៅនឹងការរុះរើសំណង់ដែលនៅជាប់រមណីយដ្ឋានអង្គរ ខណៈរាជរដ្ឋាភិបាលនៅមិនទាន់បានគិតគូរដល់ការរុះរើសំណង់របស់ពួកគេនៅឡើយនោះ។
ការអំពាវនាវនេះ ធ្វើឡើងក្រោយពីប្រជាពលរដ្ឋប្រមាណ ៣ ០០០នាក់ រស់នៅឃុំព្រះដាក់ កាលពីថ្ងៃពុធម្សិលមិញ បានប្រមូលផ្តុំគ្នាតវ៉ានៅសាលាឃុំ ក្រោយពួកគាត់បានទទួលព័ត៌មានថា អាជ្ញាធរជាតិអប្សរា ឱ្យពួកគាត់ចាកចេញពីលំនៅឋានទៅនៅទីតាំងថ្មីក្នុងតំបន់រុនតាឯក។
លោកនាយករដ្ឋមន្ត្រី លោក ហ៊ុន សែន ថ្លែងក្នុងពិធីបើកសន្និសីទ «ចក្ខុវិស័យកម្ពុជាឆ្នាំ២០២២» នៅថ្ងៃទី០៦ ខែតុលានេះ ថា តាមពិតរដ្ឋាភិបាលមិនទាន់បានគិតគូរដល់ការរុះរើសំណង់ពលរដ្ឋនៅក្នុងឃុំព្រះដាក់នៅឡើយទេ ក្នុងនោះរដ្ឋគ្រាន់តែកំពុងសិក្សាអំពីហេដ្ឋារចនាសម្ព័ន្ធ ការស្តារបារាយណ៍ខាងកើត ដែលធ្លាប់មានសមត្ថភាពស្តុកទឹករហូតដល់ ៣០លានម៉ែត្រគូប ដើម្បីទ្រទ្រង់អង្គរ និងអំពីផលប៉ះពាល់លើពលរដ្ឋ។
បែបនេះក្តី លោកថា គម្រោងនេះនឹងមិនមានការទាញពលរដ្ឋពីឃុំព្រះដាក់ចេញទាំងអស់នោះដែរ។
លោកនាយករដ្ឋមន្ត្រី ហ៊ុន សែន អះអាងថា រដ្ឋាភិបាលមានការគិតគូរដោយម៉ត់ចត់ និងមិនទទឹងទិសឡើយលើករណីនេះ ដូច្នេះលោកបានប្រាប់ឱ្យពលរដ្ឋនៅឃុំព្រះដាក់ រក្សាភាពស្ងប់ស្ងាត់សិន។
លោក ហ៊ុន សែន ថា៖ «យើងក៏បានដឹងដែរថា ឃុំព្រះដាក់ត្រូវបានកសាងប្រមាណជា ៣០០-៤០០ឆ្នាំរួចមកហើយ ហើយឃុំនេះស្ថិតនៅជាឃុំមួយដែលទាក់ទងនឹងផ្នែករដ្ឋបាលដែនដីរបស់យើងទៀតផង។ ប៉ុន្តែហេតុដូចម្តេចបានជាប្រជាជនចាប់ផ្តើមព្រួយបារម្ភអំពីរឿងនេះ? ខ្ញុំសូមបញ្ជូនសារទៅប្រជាជននៅទីនោះ សូមស្ងប់ស្ងាត់ យើងគិតគូរដោយម៉ត់ចត់»។
បែបនេះក្តី ប្រមុខរដ្ឋាភិបាលរូបនេះថា លោកបានជជែកជាមួយអភិបាលខេត្តសៀមរាបពីបញ្ហានេះ និងសម្រេចបញ្ជូនរដ្ឋមន្ត្រីក្រសួងរៀបចំដែនដី លោក ជា សុផារ៉ា និងរដ្ឋមន្ត្រីក្រសួងវប្បធម៌ លោកស្រី ភឿង សកុណា ទៅជួបពន្យល់ពលរដ្ឋដោយផ្ទាល់នៅថ្ងៃទី០៧ ខែតុលា ស្អែកនេះ។
ប្រជាពលរដ្ឋរស់នៅឃុំព្រះដាក់ ស្រុកបន្ទាយស្រី ខេត្តសៀមរាប លោក តូ ជីវ៉ា ប្រាប់ វីអូឌី នៅថ្ងៃទី០៦ ខែតុលានេះថា៖ «ទោះបីសម្តេច [ហ៊ុន សែន] គាត់អត់ទាន់បានប្រកាសថា រុះរើ ប៉ុន្តែម្សិលមិញជាក់ស្តែងអាជ្ញាធរថ្នាក់ក្រោមគាត់ចុះមក ការនិយាយស្តីរបស់គាត់ផ្សេង ហើយដល់ពេលសម្តេចគាត់និយាយមកផ្សេង។ ដល់ពេលចឹងវាពិបាកដែរ ព្រោះប្រជាពលរដ្ឋឱ្យតែឮថា បញ្ហាចឹងកើតឡើង ពីមាត់មួយទៅមាត់មួយ ផ្អើល!»។
បុរសវ័យ ៣០ឆ្នាំ រូបនេះ បន្តថា កាលពីថ្ងៃម្សិលមិញ អាជ្ញាធរជាច្រើននាក់ មានខ្លះស្លៀកពាក់ឯកសណ្ឋាន និងខ្លះទៀតស្លៀកពាក់ស៊ីវិល បានជិះរថយន្តជាច្រើនគ្រឿង ចុះទៅតាមផ្ទះរបស់ពលរដ្ឋមួយចំនួន ដោយបានលួងលោមពលរដ្ឋឱ្យរុះរើសំណង់ទៅកាន់ទីតាំងថ្មីនៅឃុំរុនតាឯក ព្រមទាំងប្រើពាក្យពេចន៍ថា «បើពលរដ្ឋមិនព្រមទៅ មុននិងក្រោយក៏គង់តែត្រូវផ្តិតមេដៃចាកចេញដដែលទេ»។
ករណីនេះ លោក តូ ជីវ៉ា បញ្ជាក់ថា រូបគាត់ក៏ដូចជា ពលរដ្ឋផ្សេងទៀតក្នុងឃុំព្រះដាក់ ប្រកាន់ជំហរមិនចាកចេញនោះទេ បើសិនជារដ្ឋាភិបាលឱ្យពួកគាត់រុះរើទៅកាន់កន្លែងថ្មីមែននោះ។
លោក តូ ជីវ៉ា ថា៖ «ពួកគាត់[ពលរដ្ឋ]ក៏ដូចជាខ្ញុំ គឺប្តេជ្ញាចិត្តហើយ ទោះជាលទ្ធផលចុងក្រោយយ៉ាងណា ក៏ប្រជាជនទាំងមូលនៅក្នុងឃុំគឺ តស៊ូ តវ៉ាលុះដល់លទ្ធផលចុងក្រោយ។ ព្រោះយើងដឹងស្រាប់ហើយថា កាលពីមុនយើងធ្លាប់មានសង្គ្រាម ចឹងហើយយើងជម្លៀសទៅនៅកន្លែងមួយៗមិនមែនស្រួលឯណា ចឹងពួកគាត់ច្បាស់ជាមានគំនិតមួយថា បើយើងផ្លាស់ប្តូរទៅកន្លែងថ្មី ចឹងអ្វីៗគឺថ្មីទាំងអស់»។
មន្ត្រីឃ្លាំមើលសិទ្ធិមនុស្ស ដីធ្លី និងធនធានធម្មជាតិ នៃសមាគមអាដហុក ខេត្តសៀមរាប លោក សួស ណារិន ដែលបានចុះឃ្លាំមើលករណីនេះ លើកឡើងថា បើទោះនាយករដ្ឋមន្ត្រីមិនបានប្រកាសពីការតម្រូវឱ្យពលរដ្ឋរុះរើ ប៉ុន្តែពលរដ្ឋអះអាងថា អាជ្ញាធរដែលចុះផ្ទាល់ដល់លំនៅឋានរបស់ពួកគាត់ បានប្រើពាក្យពេចន៍ដែលធ្វើឱ្យពលរដ្ឋមានក្តីបារម្ភ។
លោក សួស ណារិន ថ្លែងថា៖ «យើងចង់ឱ្យមានដំណោះស្រាយជាក់លាក់ កុំយកអាបញ្ហា UNESCO ហ្នឹងមកដាក់ជាសម្ពាធឱ្យពលរដ្ឋត្រូវតែគោរពតាម។ ព្រោះជួនកាល UNESCO គេជាអង្គការធំពិភពលោក គេមិនបានមកវាស់ថា ត្រង់នេះត្រូវចេញ ត្រង់នោះត្រូវចេញអីទេ គេមើលតែក្នុងផែនទីទេ។ ចឹងដំណោះស្រាយនៅលើយើងដែលជាអ្នកនៅនឹងដីផ្ទាល់ហ្នឹង ថាតើកន្លែងណាត្រូវកំណត់ឱ្យគាត់ត្រូវចាកចេញ កន្លែងណាដែលត្រូវទុក កំណត់ឱ្យច្បាស់ ដើម្បីកុំឱ្យគាត់មានការភាន់ច្រលំ»។
គួររំលឹកថា រដ្ឋាភិបាលកំពុងរៀងចំតំបន់រមណីយដ្ឋានអង្គរឡើងវិញ ដោយប្រកាសឱ្យប្រជាពលរដ្ឋដែលកំពុងរស់នៅ និងអាស្រ័យផលនៅតំបន់ការពារមួយនេះ ស្ម័គ្រចិត្តដោះដូរលំនៅឋានទៅនៅទីតាំងថ្មី ដែលរៀបចំដោយអាជ្ញាធរនៅតំបន់អភិវឌ្ឍន៍រុនតាឯក ស្រុកបន្ទាយស្រី ដោយក្នុង១គ្រួសារទទួលបាន ដីឡូតិ៍២០ម៉ែត្រគុណ៣០ម៉ែត្រ៕
