ប្រធានាធិបតីអាមេរិក លោក ចូ បៃឌិន (Joe Biden) បាននិយាយថា ការគំរាមកំហែងរបស់ប្រធានាធិបតីរុស្ស៊ី លោក វ្លាឌីមៀរ ពូទីន (Vladimir Putin) ក្នុងការប្រើប្រាស់អាវុធនុយក្លេអ៊ែរ គឺជាការគំរាមកំហែងដ៏ធំបំផុតចាប់តាំងពីវិបត្តិមីស៊ីលគុយបា ខណៈមេដឹកនាំយោធារបស់រុស្ស៊ីបានប្រឈមមុខនឹងប្រតិកម្មផ្នែកការទូតជាសាធារណៈយ៉ាងខ្លាំងក្លា ជុំវិញសង្គ្រាមនៅអ៊ុយក្រែន។
ទីភ្នាក់ងារសារព័ត៌មាន Reuters នៅថ្ងៃទី៧ ខែតុលា ឆ្នាំ២០២២នេះ បានស្រង់សម្តីលោក Biden មកចុះផ្សាយថា សហរដ្ឋអាមេរិកកំពុង «ព្យាយាមឈ្វេងយល់» ពីជំហររបស់លោក ពូទីន ចំពោះសង្គ្រាមនៅអ៊ុយក្រែន ដោយព្រមានថា លោក ពូទីន «មិននិយាយលេងទេ» នៅពេលដែលលោកនិយាយអំពីការប្រើប្រាស់អាវុធនុយក្លេអ៊ែរ ឬអាវុធជីវសាស្ត្រ ឬគីមី ពីព្រោះយោធារបស់រុស្ស៊ីកំពុងតែទទួលរងនូវបរាជ័យយ៉ាងដុនដាប។
លោក Biden បានថ្លែងកាលពីថ្ងៃព្រហស្បតិ៍ម្សិលមិញថា៖ «ជាលើកដំបូង ចាប់តាំងពីវិបត្តិមីស៊ីលគុយបា យើងមានការគំរាមកំហែងដោយផ្ទាល់ចំពោះការប្រើប្រាស់អាវុធនុយក្លេអ៊ែរ»។
លោកបន្តថា៖ «យើងមិនបានប្រឈមមុខនឹងសង្រ្គាមលោក ចាប់តាំងពីរដ្ឋបាលរបស់លោក ចន កេណេឌី [John Kennedy] និងវិបត្តិមីស៊ីលគុយបា»។
នៅក្នុងវិបត្តិឆ្នាំ១៩៦២ សហរដ្ឋអាមេរិក ក្រោមរដ្ឋបាលរបស់ប្រធានាធិបតី John Kennedy និងសហភាពសូវៀត ក្រោមរដ្ឋបាលរបស់លោក នីគីតា គ្រូសឆេវ (Nikita Khrushchev) បានហៀបនឹងប្រើប្រាស់អាវុធនុយក្លេអ៊ែរទៅហើយ ជុំវិញការបញ្ជូនមីស៊ីលរបស់សហភាពសូវៀតទៅក្នុងប្រទេសគុយបា។
លោក Biden និយាយថា៖ «ខ្ញុំសង្ឃឹមថានឹងមិនមានការប្រើប្រាស់អាវុធនុយក្លេអ៊ែរ និងមិនមានសង្រ្គាមលោកកើតឡើង»។
លោក ពូទីន បានព្រមានថា លោកនឹងប្រើគ្រប់មធ្យោបាយទាំងអស់ រួមទាំងអាវុធនុយក្លេអ៊ែរ ដើម្បីទាមទារយកទឹកដីរុស្ស៊ីមកវិញ រួមទាំងតំបន់ទាំង៤ របស់អ៊ុយក្រែន ដែលរុស្ស៊ីទើបតែដាក់បញ្ចូលជាទឹកដីរបស់ខ្លួន។
នៅក្នុងសុន្ទរកថាទៅកាន់វិទ្យាស្ថានឡូវី (Lowy) របស់ប្រទេសអូស្ត្រាលី លោក Zelenskiy បាននិយាយថា អង្គការណាតូ (NATO) គួរតែចាត់វិធានការរារាំងរុស្ស៊ីកុំឱ្យប្រើប្រាស់អាវុធនុយក្លេអ៊ែរ។
ទោះយ៉ាងណា អ្នកនាំពាក្យវិមានក្រឹមឡាំង លោក ឌីមីទ្រី ពេស្កូវ (Dmitry Peskov) បានថ្កោលទោសការលើកឡើងរបស់លោក Zelenskiy ថាជា «ការអំពាវនាវឱ្យចាប់ផ្តើមសង្គ្រាមលោក ដែលនឹងមានផលវិបាកធ្ងន់ធ្ងរដែលមិនអាចទាយទុកជាមុនបាន»។ នេះបើយោងតាមទីភ្នាក់ងារសារព័ត៌មាន RIA៕