រដ្ឋាភិបាលប្រាប់ពលរដ្ឋក្នុងឃុំព្រះដាក់ ស្រុកបន្ទាយស្រី ខេត្តសៀមរាប ជួយទប់ស្កាត់សំណង់ថ្មី និងអ្នកចំណូលថ្មី ព្រមទាំងចៀសវាងប្រើប្រាស់ដីស្នាក់នៅជាប់រមណីយដ្ឋានអង្គរនេះជាកម្មសិទ្ធិ ឬទិញលក់ ខណៈអះអាងថា មិនមានការរុះរើសំណង់និងលំនៅឋានរបស់ពលរដ្ឋនៅឃុំនេះឡើយ។
ការអះអាងនេះបានធ្វើឡើងក្នុងជំនួបរវាងរដ្ឋមន្ត្រីក្រសួងរៀបចំដែនដី និងរដ្ឋមន្ត្រីក្រសួងវប្បធម៌ ជាមួយប្រជាពលរដ្ឋនៅឃុំព្រះដាក់ នៅថ្ងៃសុក្រនេះ។
ក្នុងជំនួបនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា អះអាងថា នឹងមិនមានការរុះរើសំណង់និងលំនៅឋានរបស់ពលរដ្ឋនៅភូមិទាំង៦ ក្នុងឃុំព្រះដាក់ឡើយ។ តែយ៉ាងណា លោកបានសំណូមពរដល់ពលរដ្ឋនៅឃុំព្រះដាក់ ជួយទប់ស្កាត់ការសង់សំណង់ និងអ្នកចំណូលថ្មីនៅឃុំនេះ ដើម្បីបញ្ចៀសការប៉ះពាល់ដល់រមណីយដ្ឋានអង្គរ។
លោកថា៖ «សូមកុំឱ្យមានសំណង់ថ្មីនៅលើទឹកដីចាស់ កុំឱ្យមានអ្នកចំណូលថ្មី។ វាភ័ន្តអត្តសញ្ញាណអ្នកនៅក្នុងទីកន្លែងឃុំព្រះដាក់របស់យើងនេះ ម៉េចទៅ? វាខូច»។
ក្រៅពីនោះ រដ្ឋមន្ត្រីក្រសួងរៀបចំដែនដីរូបនេះប្រាប់ពលរដ្ឋថា ពួកគេនឹងមិនអាចប្រើប្រាស់ដីស្នាក់នៅនេះដាក់ជាកម្មសិទ្ធិផ្ដាច់មុខរបស់ខ្លួន ឬទិញលក់បានឡើយ។
លោកបន្តថា៖ «អត់មានកម្មសិទ្ធិទេណា! គេអត់ឱ្យទេណា! បងប្អូន! មានការគ្រប់គ្រង ហើយដាក់នៅក្នុងកាតព្វកិច្ចរបស់យើង មុននឹងចុះចូលទៅក្នុងបញ្ជីបេតិកភណ្ឌពិភពលោក។ មិនមែនយកដី មិនមែនយកបារាយណ៍ខាងកើត មកចែកពុះជាឡូត៍ ហើយដាក់កម្មសិទ្ធិទេ! អត់ទេណាបងប្អូន! កន្លែងនេះច្បាស់ណា! ច្បាស់ណា? អត់មានទេណា! តតំណទៅទៀត អត់មានទេ។ មិនទេ! មិនបានជាដាច់ខាត ហ៊ានតែដាក់ចូល ហ៊ានតែចែកគ្នា គេខ្វែងបញ្ជីចេញពីបេតិកភណ្ឌពិភពលោក ហើយពេលនោះកុំនិយាយទេសចរ អត់មានទេទេសចរ»។
លោកបន្តថា បើសិនមិនអាចទប់ស្កាត់ផលរំខាននានាដែលនាំឱ្យប៉ះពាល់ដល់ការការពារតំបន់អង្គរ នោះរមណីយដ្ឋានប្រាសាទបុរាណរបស់ខ្មែរនេះ នឹងត្រូវគេខ្វែងចេញពីបញ្ជីបេតិកភណ្ឌ ហើយនឹងគ្មានភ្ញៀវទេសចរមកទស្សនាទៀតទេ។
ក្នុងនោះ លោក ជា សុផារ៉ា ថាការស្ដារបារាយណ៍ខាងកើតអង្គរ នឹងជួយឱ្យទឹកទ្រទ្រង់ប្រាសាទអង្គរវត្ត និងផ្តល់ទឹកសម្រាប់ពលរដ្ឋប្រើប្រាស់ផងដែរ។
ក្រៅពីនោះ លោកថ្លែងថា បើពលរដ្ឋអាចរុះរើលំនៅស្ថានទៅរុនតាឯកបាន ដើម្បីអាចឱ្យរដ្ឋស្ដារបារាយណ៍បាន នោះគឺជាការប្រសើរណាស់។ យ៉ាងណា លោកថា នេះគឺអាស្រ័យលើការស្ម័គ្រចិត្តរបស់ពលរដ្ឋទេ តែបើពួកគាត់មិនចង់ទៅ ក៏មិនមានការបង្ខំដែរ។
ក្នុងពិធីបើកសន្និសីទ «ចក្ខុវិស័យកម្ពុជាឆ្នាំ២០២២» កាលពីថ្ងៃទី៦ ខែតុលា ម្សិលមិញ លោកនាយករដ្ឋមន្ត្រី ហ៊ុន សែន ថ្លែងថា តាមពិតរដ្ឋាភិបាលមិនទាន់បានគិតគូរដល់ការរុះរើសំណង់ពលរដ្ឋនៅក្នុងឃុំព្រះដាក់នៅឡើយទេ ក្នុងនោះ រដ្ឋគ្រាន់តែកំពុងសិក្សាអំពីហេដ្ឋារចនាសម្ពន្ធ ការស្ដារបារាយណ៍ខាងកើត ដែលធ្លាប់មានសមត្ថភាពស្តុកទឹករហូតដល់ ៣០លានម៉ែត្រគូប ដើម្បីទ្រទ្រង់អង្គរ និងអំពីផលប៉ះពាល់លើពលរដ្ឋ។
បែបនេះក្ដី លោកថា គម្រោងនេះនឹងមិនមានការទាញពលរដ្ឋពីឃុំព្រះដាក់ចេញទាំងអស់នោះដែរ។
គួររំឭកថា រដ្ឋាភិបាលកំពុងរៀងចំតំបន់រមណីយដ្ឋានអង្គរឡើងវិញ ដោយប្រកាសឱ្យប្រជាពលរដ្ឋដែលកំពុងរស់នៅនិងអាស្រ័យផលនៅតំបន់ការពារមួយនេះ ស្ម័គ្រចិត្តដោះដូរលំនៅឋានទៅនៅទីតាំងថ្មីដែលរៀបចំដោយអាជ្ញាធរ នៅតំបន់អភិវឌ្ឍន៍រុនតាឯក ស្រុកបន្ទាយស្រី ដោយក្នុង១គ្រួសារទទួលបានដីឡូត៍ ២០ម៉ែត្រគុណ៣០ម៉ែត្រ៕