ក្រុមសិទ្ធិមនុស្សដែលបានប្ដឹងទៅតុលាការ ចំពោះអតីតប្រធានាធិបតីស្រីលង្កា លោក ហ្កូតាបាយ៉ា រ៉ាចាប៉ាកសា (Gotabaya Rajapaksa) បាននិយាយនៅក្នុងសេចក្ដីថ្លែងការណ៍នៅថ្ងៃសុក្រនេះថា តុលាការកំពូលរបស់ប្រទេសស្រីលង្កាបានអនុញ្ញាតឱ្យមានដំណើរការនីតិវិធីចំពោះលោក Rajapaksa។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។
តុលាការក៏បានយល់ព្រមអនុញ្ញាតឱ្យដំណើរការនីតិវិធីចំពោះអតីតនាយករដ្ឋមន្ត្រីស្រីលង្កា លោក ម៉ាហ៊ីនដា រ៉ាចាប៉ាកសា (Mahinda Rajapaksa) និងអតីតរដ្ឋមន្ត្រីហិរញ្ញវត្ថុ ព្រមទាំងអតីតអភិបាលធនាគារកណ្ដាលពីររូបផងដែរ។
ពាក្យបណ្ដឹងដែលប្ដឹងដោយអង្គការតម្លាភាពអន្តរជាតិ (Transparency International) អំពាវនាវឱ្យមានការទទួលខុសត្រូវចំពោះការដឹកនាំប្រទេសដែនកោះមួយនេះ ដែលនាំឱ្យមានវិបត្តិហិរញ្ញវត្ថុដ៏អាក្រក់បំផុតក្នុងរយៈពេលជាង៧ទសវត្សរ៍។
គួរបញ្ជាក់ថា ប្រទេសស្រីលង្កា ក្នុងរយៈពេលចុងក្រោយនេះ បានទទួលរងនូវវិបត្តិសេដ្ឋកិច្ចដ៏អាក្រក់បំផុតដែលមិនធ្លាប់មានពីមុនមក ខណៈទុនបម្រុងអន្តរជាតិរបស់ខ្លួនក៏ស្ថិតក្នុងកម្រិតទាបបំផុតផងដែរ ដែលបានបង្កឱ្យប្រទេសមួយនេះជួបប្រទះបញ្ហាកង្វះថវិកាធ្ងន់ធ្ងរសម្រាប់ការនាំចូលអាហារ ឱសថ និងប្រេងឥន្ធនៈ ជាដើម។
លោក Rajapaksa បានចុះចេញពីតំណែងភ្លាមៗបន្ទាប់ពីបានភៀសខ្លួនទៅក្រៅប្រទេសកាលពីថ្ងៃទី១៤ ខែកក្កដា ឆ្នាំ២០២២ ខណៈមានការតវ៉ាទ្រង់ទ្រាយធំនៅក្នុងប្រទេស៕
