នាយករដ្ឋមន្ត្រីកម្ពុជា បានផ្ញើសារលិខិតមួយជូនទៅនាយករដ្ឋមន្ត្រីថៃ លោក ប្រាយុទ្ធ ចាន់អ៊ូឆា ដើម្បីចូលរួមរំលែកទុក្ខសោកចំពោះហេតុការណ៍បាញ់ប្រហារនៅមជ្ឈមណ្ឌលថែទាំកុមារភាគឦសាន ប្រទេសថៃ បណ្តាលឱ្យកុមារ និងមនុស្សចាស់ជាង៣០នាក់ ស្លាប់កាលពីពេលថ្មីៗនេះ។
សារលិខិតរបស់លោកនាយករដ្ឋមន្ត្រី ហ៊ុន សែន បានលើកឡើងថា លោកមានការតក់ស្លុត និងក្តីសោកសៅយ៉ាងក្រៃលែង នៅពេលបានដឹងអំពីករណីបាញ់ប្រហារដ៏អាក្រក់ នៅឯមជ្ឈមណ្ឌលថែទាំកុមារមួយកន្លែង ក្នុងខេត្តណងប៊ូឡាំភូ ភាគឦសានប្រទេសថៃ កាលពីថ្ងៃទី៦ ខែតុលា ឆ្នាំ២០២២។ ហេតុការណ៍បាញ់ប្រហារនេះ បានឆក់យកជីវិតមនុស្សរាប់សិបនាក់ ដែលភាគច្រើនជាកុមារ និងបានធ្វើឱ្យមនុស្សជាច្រើននាក់ផ្សេងទៀតទទួលរងរបួសផងដែរ។
សារលិខិតបន្តថា៖ «ក្នុងឱកាសដ៏សោកសៅបំផុតនេះ ក្នុងនាមឱ្យរដ្ឋាភិបាល និងប្រជាជននៃព្រះរាជាណាចក្រកម្ពុជា ខ្ញុំសូមសម្តែងនូវសមានចិត្តយ៉ាងជ្រាលជ្រៅ និងចូលរួមរំលែកទុក្ខយ៉ាងក្រៀមក្រំបំផុត ជូនចំពោះ ឯកឧត្តម ប្រាយុទ្ធ ចាន់អ៊ូចា រាជរដ្ឋាភិបាល និងប្រជាជននៃព្រះរាជាណាចក្រថៃ ជាពិសេសក្រុមគ្រួសារនៃសព និងជនរងគ្រោះ។ កម្ពុជាឈរនៅជាមួយថៃ ក្នុងពេលដ៏សោកសៅចំពោះឧប្បត្តិហេតុសម្លាប់មនុស្សយ៉ាងរង្គាលនេះ និងសូមបួងសួងឱ្យអ្នកដែលរងរបួសទាំងឡាយឆាប់ជាសះស្បើយឡើងវិញ»។
យោងតាមតាមការចេញផ្សាយរបស់ទីភ្នាក់ងារសារព័ត៌មាន Reuters ក្នុងសប្តាហ៍នេះ បានស្រង់សម្តីរបស់អ្នកនាំពាក្យនគរបាលជាតិថៃ បាននិយាយថា យ៉ាងហោចណាស់មានមនុស្ស ៣៤នាក់ស្លាប់ នៅក្នុងការបាញ់សម្លាប់រង្គាលនៅ មណ្ឌលថែទាំកុមារមួយកន្លែង ក្នុងខេត្តភាគឦសាននៃប្រទេសថៃ កាលពីថ្ងៃព្រហស្បតិ៍ទី៦ ខែតុលា ប៉ុន្តែតួលេខក្រោយមកបញ្ជាក់ថាមានអ្នកស្លាប់រហូតដល់៣៨នាក់។ នគរបាលបាននិយាយនៅក្នុងសេចក្តីថ្លែងការណ៍មួយថា ជនរងគ្រោះភាគច្រើនលើសលុបជាកុមារ ហើយខ្មាន់កាំភ្លើងគឺជាអតីតមន្ត្រីនគរបាល ប៉ុន្តែហេតុផលពិតប្រាកដជុំវិញហេតុការណ៍បាញ់ប្រហារនេះគេនៅមិនទាន់ដឹងច្បាស់នៅឡើយ។
អ្នកនាំពាក្យរដ្ឋាភិបាលបាននិយាយថា នាយករដ្ឋមន្ត្រីថៃ បានជូនដំណឹងដល់ភ្នាក់ងារទាំងអស់ឱ្យចាត់វិធានការ និងចាប់ខ្លួនជនល្មើស។
យោងតាមការចេញផ្សាយរបស់ទីភ្នាក់ងារសារព័ត៌មាន CNA បានឱ្យដឹងថា ខ្មាន់កាំភ្លើងមានឈ្មោះថា ផាន់យ៉ា កាំរ៉ាប់ (Panya Kamrab) អាយុ ៣៤ឆ្នាំ បានរត់គេចខ្លួន បន្ទាប់ពីបាញ់ប្រហារដោយជិះរថយន្តភីកអាប់ពណ៌ស។ ទោះបីយ៉ាងណា យោងតាមការិយាល័យស៊ើបអង្កេតកណ្តាលរបស់ថៃ បានបញ្ជាក់ថា ខ្មាន់កាំភ្លើងបានសម្លាប់ប្រពន្ធ កូន បន្ទាប់មកសម្លាប់ខ្លួនឯង៕
