ខណៈទីក្រុងជាច្រើន រួមទាំងរដ្ឋធានីកៀវ ប្រទេសអ៊ុយក្រែន ត្រូវបានរាយការណ៍ថា បានរងការវាយប្រហារដោយការផ្ទុះជាច្រើនទីតាំង ដែលបានបង្កឱ្យមនុស្សស្លាប់និងរងបួស នៅថ្ងៃចន្ទនេះ លោកប្រធានាធិបតី វ៉ូឡូឌីមៀ ហ្សេលេនស្គី បានចោទប្រទេសរុស្ស៊ីថា កំពុងតែព្យាយាមកម្ចាត់ប្រទេសរបស់លោកចេញពីពិភពលោក។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងតាមរយៈសារក្នុងប្រព័ន្ធតេឡេក្រាម (Telegram) ប្រធានាធិបតីអ៊ុយក្រែនរូបនេះ បានឱ្យដឹងថា៖ «ពួកគេ [រុស្ស៊ី] កំពុងតែព្យាយាមបំផ្លាញ និងកម្ចាត់យើងចេញពីភពផែនដី»។
លោកបន្តថា៖ «ពួកគេបំផ្លាញប្រជាជនរបស់យើងដែលកំពុងតែសម្រាកនៅផ្ទះ នៅក្នុងទីក្រុង Zaporizhzhia និងសម្លាប់មនុស្សដែលកំពុងតែធ្វើដំណើរទៅធ្វើការនៅក្នុងទីក្រុងឌីនីប្រូ [Dnipro] និងរដ្ឋធានីកៀវ»។
គួរបញ្ជាក់ថា ការវាយប្រហារភ្លាមៗក្នុងទីក្រុងមួយចំនួនក្នុងប្រទេសអ៊ុយក្រែននេះ កើតមានឡើងបន្ទាប់ពីប្រធានាធិបតីរុស្ស៊ី លោក វ្លាឌីមៀរ ពូទីន បានចោទប្រកាន់អ៊ុយក្រែនថា បានរៀបចំការវាយប្រហារភេរវកម្មលើស្ពានដ៏សំខាន់មួយដែលតភ្ជាប់ពីទឹកដីរុស្ស៊ី ទៅកាន់តំបន់គ្រីមេ (Crimea) កាលពីចុងសប្តាហ៍កន្លងទៅ៕
