អាមេរិក​សន្យា​ផ្ដល់​ប្រព័ន្ធ​ការពារ​ដែនអាកាស​ដល់​អ៊ុយក្រែន បន្ទាប់​ពី​រង​ការ​វាយប្រហារ​ដោយ​មីស៊ីល​របស់​រុស្ស៊ី

លោកប្រធានាធិបតីអាមេរិក Joe Biden ជួបពិភាក្សាការងារជាមួយប្រធានាធិបតីអ៊ុយក្រែន លោក Volodymyr Zelensky នៅឯសេតវិមាន ក្នុងទីក្រុង Washington, DC ថ្ងៃទី០១ ខែកញ្ញា ឆ្នាំ២០២១។ (REUTERS/Jonathan Ernst)

ប្រធានាធិបតីអាមេរិក លោក ចូ បៃឌិន (Joe Biden) បានសន្យាចំពោះប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) កាលពីថ្ងៃចន្ទម្សិលមិញថា សហរដ្ឋអាមេរិកនឹងផ្ដល់ឱ្យអ៊ុយក្រែននូវប្រព័ន្ធការពារដែនអាកាសទំនើប បន្ទាប់ពីរងការវាយប្រហារដោយ​មីស៊ីលពីរុស្ស៊ី។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១១ ខែតុលា ឆ្នាំ២០២២នេះ។

លោក Biden បាននិយាយតាមទូរសព្ទជាមួយលោក Zelenskiy ដើម្បីធានាចំពោះការបន្តគាំទ្ររបស់អាមេរិកដល់អ៊ុយក្រែន និងថ្កោលទោសការវាយប្រហារពីប្រទេសរុស្ស៊ីលើជនស៊ីវិល។

យោងតាមសេចក្តីថ្លែងការណ៍របស់សេតវិមាន អំពីការសន្ទនាតាមទូរសព្ទនោះ បានឱ្យដឹងថា៖ «លោក Biden បានសន្យាថានឹងបន្តផ្ដល់ជំនួយដល់អ៊ុយក្រែន ដែលត្រូវការដើម្បីការពារខ្លួន រួមទាំងប្រព័ន្ធការពារដែន​អាកាសទំនើប»។

សេតវិមានបាននិយាយថា លោក Biden ក៏បានប្រាប់លោក Zelenskiy ថាសហរដ្ឋអាមេរិក និង​សម្ពន្ធមិត្ត និងដៃគូរបស់ខ្លួន នឹងបន្តដាក់សម្ពាធលើប្រទេសរុស្ស៊ី ដោយឱ្យរុស្ស៊ីទទួលខុសត្រូវចំពោះឧក្រិដ្ឋកម្មសង្គ្រាម និងអំពើឃោរឃៅរបស់ខ្លួន និងផ្តល់ឱ្យអ៊ុយក្រែននូវសន្តិសុខ សេដ្ឋកិច្ច និងជំនួយមនុស្សធម៌។

សហរដ្ឋអាមេរិកបានផ្តល់ជំនួយសន្តិសុខជាង១៦,៨​ពាន់​លាន​ដុល្លារ ចាប់​តាំង​ពីរុស្ស៊ីបានឈ្លាន​ពាន​អ៊ុយ​ក្រែន​កាលពីថ្ងៃទី២៤ ខែកុម្ភៈ ឆ្នាំ២០២២ និងបានដាក់ទណ្ឌកម្មសេដ្ឋកិច្ចលើទីក្រុងម៉ូស្គូចំពោះសកម្មភាពរបស់ខ្លួននៅអ៊ុយក្រែន។

គួរបញ្ជាក់ថា ទីក្រុងជាច្រើនរបស់អ៊ុយក្រែន ​រួមទាំង​រដ្ឋធានីកៀវ ត្រូវបានរាយការណ៍ថា រងការវាយប្រហារដោយគ្រាប់មីស៊ីលរបស់រុស្ស៊ី មួយថ្ងៃបន្ទាប់ពីរុស្ស៊ីចោទប្រកាន់ថា ​ហេតុការណ៍​ផ្ទុះ​លើ​ស្ពានគ្រីមេ គឺ​ជា​អំពើ​ភេរវកម្ម​ដែល​បង្ក​ឡើង​ដោយ​​អ៊ុយក្រែន៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered