អន្តរជាតិ

អ៊ុយក្រែនថ្កោលទោសរុស្ស៊ីថាជារដ្ឋភេរវករនៅក្នុងកិច្ចប្រជុំអង្គការសហប្រជាជាតិ

លោក លី សេងហន
| ១១ តុលា ២០២២
ម៉ោង ២១:១៤

រថយន្តត្រូវភ្លើងឆេះបន្ទាប់ពីការវាយប្រហារយោធាពីសំណាក់រុស្ស៊ី ខណៈការឈ្លានពានរបស់រុស្ស៊ីនៅអ៊ុយក្រែនបន្តនៅកណ្ដាលក្រុង Kyiv ប្រទេសអ៊ុយក្រែន ថ្ងៃទី១០ ខែតុលា ឆ្នាំ២០២២។ (REUTERS/Gleb Garanich)

អ៊ុយក្រែនបានថ្កោលទោសរុស្ស៊ីថាជា «រដ្ឋភេរវករ» ចំពោះការវាយប្រហារដោយមីស៊ីលលើទីក្រុងសំខាន់ៗ រួមទាំងរដ្ឋធានីកៀវ (Kyiv) នៅឯកិច្ចប្រជុំមហាសន្និបាតអង្គការសហប្រជាជាតិ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Al Jazeera នៅថ្ងៃទី១១ ខែតុលា ឆ្នាំ២០២២នេះ។

លោក សឺជី គីស្លីតស៊ីយ៉ា (Sergiy Kyslytsya) ឯកអគ្គរដ្ឋទូតអ៊ុយក្រែនប្រចាំនៅអង្គការសហប្រជាជាតិ បាននិយាយនៅក្នុងសុន្ទរកថាបើកកម្មវិធីថា៖ «រុស្ស៊ីបានបង្ហាញឱ្យឃើញជាថ្មីម្តងទៀតថា ខ្លួនជារដ្ឋភេរវករ និងត្រូវមានការរារាំងតាមគ្រប់មធ្យោបាយដែលម៉ឺងម៉ាត់បំផុត»។

លោកបន្ថែមថា គ្រួសាររបស់លោកក៏ជាជនរងគ្រោះក្នុងការវាយប្រហារនោះដែរ។

លោកបានបន្ថែមថា៖ «អ្នកស្ទើរតែមិនអាចទទួលបានសន្តិភាព ដរាបណាមានជនផ្តាច់ការនៅក្បែរខ្លួនអ្នក»។

ទោះយ៉ាងណា ជាការឆ្លើយតប លោក លោក វ៉ាស៊ីលី ណេប៉ែនហ្សៀរ (Vassily Nebenzia) ឯកអគ្គរដ្ឋទូតរុស្ស៊ីប្រចាំនៅអង្គការសហប្រជាជាតិ បាននិយាយការពារខ្លួនចំពោះការភ្ជាប់តំបន់ចំនួន៤របស់អ៊ុយក្រែនមកជាទឹកដីរុស្ស៊ីថា៖ «យើងរងការចោទប្រកាន់ ខណៈយើងកំពុងព្យាយាមការពារបងប្អូនប្រុសស្រីរបស់យើងនៅភាគខាងកើតអ៊ុយក្រែន»។

គួរបញ្ជាក់ថា រុស្ស៊ីបានបើកការវាយប្រហារទ្រង់ទ្រាយធំទៅលើអ៊ុយក្រែនមួយថ្ងៃ បន្ទាប់ពីចោទប្រកាន់ថា ហេតុការណ៍ផ្ទុះលើស្ពានគ្រីមេ គឺជាអំពើភេរវកម្មដែលបង្កឡើងដោយ
អ៊ុយក្រែន៕

រុស្ស៊ី, អង្គការសហប្រជាជាតិ, អ៊ុយក្រែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។