តុលាការកំពូល សម្រេចបង្វិលសំណុំរឿងយុវជន កាក់ សុវណ្ណច្ឆ័យ ដែលជាកូនប្រុសសកម្មជនគណបក្សសង្គ្រោះជាតិដែលតុលាការរំលាយ ឱ្យសាលាឧទ្ធរណ៍រាជធានីភ្នំពេញជំនុំជម្រះឡើងវិញ ដោយថា ដើម្បីផលប្រយោជន៍អនីតិជន។
ការប្រកាសសាលដីកានេះធ្វើឡើងបន្ទាប់ពីតុលាការកំពូលបានបើកសវនាការជំនុំជម្រះលើបណ្ដឹងសាទុក្ខរបស់មេធាវីការពារក្ដីឱ្យយុវជន កាក់ សុវណ្ណច្ឆ័យ កាលពីថ្ងៃទី៥ ខែតុលា ឆ្នាំ២០២២ ក្រោយពីសាលាឧទ្ធរណ៍រាជធានីភ្នំពេញ តម្កល់សេចក្ដីសម្រេចសាលាដំបូងរាជធានីភ្នំពេញ ដែលបានកាត់ទោសយុវជនវ័យ១៦ឆ្នាំរូបនេះដាក់ពន្ធនាគាររយៈពេល៨ខែ និងដាក់ឱ្យស្ថិតក្រោមការត្រួតពិនិត្យរបស់តុលាការរយៈពេល២ឆ្នាំ។
ប្រធានក្រុមប្រឹក្សាជំនុំជម្រះតុលាការកំពូល លោក គង់ ស្រ៊ីម នៅថ្ងៃពុធនេះ បានប្រកាសសាលដីកាដោយសម្រេចបង្វិលសំណុំរឿង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និង «ប្រមាថចំពោះអ្នករាជការសាធារណៈ» ទៅឱ្យសាលាឧទ្ធរណ៍ជម្រះឡើងវិញ។
លោកបន្តថា ការសម្រេចបង្វិលសំណុំរឿងនេះ ដោយចង់ឱ្យសាលាឧទ្ធរណ៍ពិចារណាចំពោះការផ្ដន្ទាទោស និងលក្ខខណ្ឌមួយចំនួន ព្រមទាំងការដាក់ឱ្យស្ថិតនៅក្រោមការតាមដានត្រួតពិនិត្យតាមផ្លូវតុលាការរយៈពេល២ឆ្នាំ ខណៈយុវជន កាក់ សុវណ្ណច្ឆ័យ ជាអនីតិជន។
មេធាវីការពារក្ដីឱ្យយុវជន កាក់ សុវណ្ណច្ឆ័យ គឺលោក សំ សុគង់ បង្ហាញការគាំទ្រចំពោះការសម្រេចរបស់តុលាការកំពូល ដោយថា កូនក្ដីរបស់លោកជាអនីតិជន បើសិនជាតុលាការថ្នាក់ក្រោមកាត់ទោសបែបនេះ បានធ្វើឱ្យប៉ះពាល់ដល់ផលប្រយោជន៍របស់កុមារផងដែរ។ ដូច្នេះ លោកថា តុលាការគួរតែយកច្បាប់មកអនុវត្ត ដោយបង្វិលពីការផ្ដន្ទាទោសមកដាក់ស្ថិតនៅក្រោមការអប់រំ និងស្ដារនីតិសម្បទាឡើងវិញ ដើម្បីកុំឱ្យមានឈ្មោះផ្ដន្ទាទោស និងថ្កោលទោសកុមារ។
លោកថា៖ «នៅក្នុងអង្គហេតុនៃការញុះញង់ហើយ បានន័យថា គាត់បានផុសសារ ផុសអីផ្សេងៗហើយ ឈានទៅដល់បទចោទប្រកាន់ញុះញង់ ប៉ុន្តែនៅក្នុងដំណាក់កាលបង្វិល [សំណុំរឿង] គឺតុលាការកំពូលឱ្យសាលាឧទ្ធរណ៍ពិចារណាកុំឱ្យមានឈ្មោះ “ផ្ដន្ទាទោស” បង្វិលទៅជា “ការអប់រំ “វិញ។ តម្កល់ហ្នឹង ចង់និយាយថា តម្កល់អង្គហេតុ វាមានអង្គហេតុហ្នឹង តែតុលាការកំពូលបង្វិលឱ្យសាលាឧទ្ធរណ៍ ដើម្បីឱ្យសាលាឧទ្ធរណ៍ពិនិត្យអំពីការផ្តន្ទាទោសដាក់ពន្ធនាគារហើយនឹងលក្ខខណ្ឌ»។
ទោះយ៉ាងណា អ្នកស្រី ព្រំ ចាន់ថា ដែលជាម្ដាយយុវជន កាក់ សុវណ្ណច្ឆ័យ ស្នើតុលាការកំពូលទម្លាក់បទចោទប្រកាន់ទាំងអស់ ដើម្បីឱ្យកូនប្រុសរបស់អ្នកស្រីមានសេរីភាពក្នុងការដើរហើរ និងមិនរងសម្ពាធពីមជ្ឈដ្ឋានជុំវិញ ខណៈកូនប្រុសគាត់កំពុងមានជំងឺផងនោះ។ អ្នកស្រីចាត់ទុកការមិនទម្លាក់បទចោទប្រកាន់ និងបន្តដាក់កូនរបស់អ្នកស្រីនៅក្រោមការត្រួតពិនិត្យតាមផ្លូវតុលាការរយៈពេល២ឆ្នាំ ថាជារឿងអយុត្តិធម៌។
អ្នកស្រីថា៖ «សម្រាប់ខ្ញុំ ទទួលយកអត់បានតាំងពីដើមមកម្ល៉េះ តាំងពីចាប់ប៉ារបស់គាត់ តាំងពីធ្វើបាបកូនរបស់ខ្ញុំ លើកទី១ និងទី២ ព្រមទាំងលើកទី៣ រហូតដល់ចាប់គាត់ដាក់ពន្ធនាគារ។ កាលពីគាត់ចូលយកទង់បក្សក៏អ៊ីចឹង ហើយគប់គាត់បែកក្បាលក៏អ៊ីចឹង ដល់ពេលនេះ វាចាប់គាត់ដាក់ពន្ធនាគារ គឺវាអយុត្តិធម៌សម្រាប់ក្រុមគ្រួសាររបស់ពួកខ្ញុំខ្លាំងតែម្ដង។ ខ្ញុំទទួលយកអត់បានទេ រឿងនេះ! គឺវាសម្ពាធខ្លាំងមែនទែនសម្រាប់ក្រុមគ្រួសាររបស់ខ្ញុំ»។
កាលពីថ្ងៃទី១៤ ខែមីនា ឆ្នាំ២០២២ សាលាឧទ្ធរណ៍រាជធានីភ្នំពេញ សម្រេចតម្កល់សាលក្រមសាសាដំបូងរាជធានីភ្នំពេញ ដែលបានកាត់ទោសយុវជន កាក់ សុវណ្ណច្ឆ័យ វ័យ១៦ឆ្នាំ ដាក់ពន្ធនាគាររយៈពេល៨ខែ និងដាក់ឱ្យស្ថិតក្រោមការត្រួតពិនិត្យរបស់តុលាការរយៈពេល២ឆ្នាំ។
យុវជន កាក់ សុវណ្ណច្ឆ័យ ត្រូវបានចៅក្រមសាលាដំបូងរាជធានីភ្នំពេញ ចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ»។ ប៉ុន្តែតុលាការបង្គាប់ឱ្យយុវជនរូបនេះអនុវត្តទោសក្នុងពន្ធនាគាររយៈពេល «៤ខែ និង១៥ថ្ងៃ» ចំណែកទោសដែលនៅសល់ត្រូវព្យួរសាកល្បងរយៈពេល២ឆ្នាំ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត យល់ថា យុវជន កាក់ សុវណ្ណច្ឆ័យ មិនគួរត្រូវបានតុលាការចោទប្រកាន់ និងកាត់ទោសតាំងពីដំណាក់កាលដំបូងមកម៉្លេះ ខណៈភស្តុតាងដែលយកមកចោទប្រកាន់នោះក៏ជាទំនាក់ទំនងឯកជនផងដែរ។
លោកកត់សម្គាល់ឃើញថា ការកាត់ទោសយុវជន កាក់ សុវណ្ណច្ឆ័យ បណ្ដាលមកពីយុវជនរូបនេះមានសកម្មភាពក្នុងការចេញតស៊ូមតិទាមទារឱ្យដោះលែងឪពុករបស់ខ្លួនដែលជាសកម្មជនគណបក្សប្រឆាំង។
លោកថា៖ «នៅតុលាការកំពូល ដែលប្រកាសសាលដីកាសម្រេចបង្វិលឱ្យសាលាឧទ្ធរណ៍កាត់ឡើងវិញ ពីព្រោះនីតិវិធី នៅពេលដែលប្ដឹងសាទុក្ខលើកទី១ តុលាការកំពូលអាចពិនិត្យមើលទៅលើអង្គច្បាប់។ អ៊ីចឹងករណីនេះ ដោយសារតែតុលាការកំពូលមើលទៅ វាឃើញមានភាពមិនប្រក្រតីមួយចំនួន អ៊ីចឹងបានសម្រេចបង្វិលឱ្យសាលាឧទ្ធរណ៍ធ្វើការជំនុំជម្រះឡើងវិញ។ យើងមើលទៅ យើងសង្ឃឹមថា សាលាឧទ្ធរណ៍ជំនុំជម្រះទម្លាក់បទចោទទៅលើកុមារ កាក់ សុវណ្ណច្ឆ័យ ហើយឱ្យមានសេរីភាពពេញលេញវិញ»។
យ៉ាងណាក៏ដោយ យុវជន កាក់ សុវណ្ណច្ឆ័យ ដែលជាកូនរបស់លោក កាក់ កុម្ភារ សកម្មជនគណបក្សសង្គ្រោះជាតិដែលតុលាការបានរំលាយ ក៏ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្ដងរួចមកហើយកាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែយុវជនរូបនេះត្រូវបានសមត្ថកិច្ចដោះលែងវិញ ក្រោយសាកសួរអស់រយៈពេល៤៨ម៉ោង។
ក្រោយពីសមត្ថកិច្ចដោះលែងរួច ប៉ុន្មានខែក្រោយមក យុវជន កាក់ សុវណ្ណច្ឆ័យ ត្រូវបានជនមិនស្គាល់មុខលួចវាយពីក្រោយ បណ្ដាលឱ្យបែកក្បាលដេរ ២០ថ្នេរ។ ប៉ុន្តែជាច្រើនខែមកហើយ សមត្ថកិច្ចនៅមិនទាន់រកឃើញមុខជនដៃដល់ ដើម្បីយកមកផ្ដន្ទាទោសនៅឡើយទេ៕
