សាលាដំបូងរាជធានីភ្នំពេញ បន្តសវនាការសំណុំរឿង «រួមគំនិតក្បត់» ដោយបង្ហាញភស្តុតាងដាក់បន្ទុក ដែលមេដឹកនាំ និងសកម្មជនគណបក្សសង្គ្រោះជាតិដែលតុលាការបានរំលាយ បានបង្ហោះសារលើបណ្ដាញសង្គម ពាក់ព័ន្ធនឹងដំណើរវិលត្រឡប់មកកម្ពុជារបស់លោកស្រី មូរ សុខហួរ។
ការបង្ហាញភស្តុតាងដែលមេដឹកនាំបក្សប្រឆាំង បានបង្ហោះនិងចែករំលែកលើបណ្ដាញសង្គម ធ្វើឡើងបន្ទាប់ពីតុលាការបានបញ្ចប់ការសួរដេញដោលជនជាប់ចោទចំនួន៣នាក់ដែលមានវត្តមានក្នុងបន្ទប់សវនាការរួច។
សវនាការនាព្រឹកថ្ងៃព្រហស្បតិ៍នេះ តំណាងអយ្យការ លោក សេង ហៀង បានបន្តសួរលោក វឿង សំណាង អំពីទំនាក់ទំនងជាមួយសកម្មជននៅកូរ៉េឈ្មោះ សុខ ស៊ីឡាក់។ លោកបន្តថា មូលហេតុដែលសួរលោក វឿង សំណាង បែបនេះ ដោយថា ឈ្មោះ សុខ ស៊ីឡាត់ ជាអ្នកបង្ហោះសារលើបណ្ដាញសង្គម ដើម្បីកៀរគរប្រជាពលរដ្ឋនៅក្រៅស្រុកនិងក្នុងស្រុក ចូលរួមអមដំណើរវិលត្រលប់លើកទី២ របស់ថ្នាក់ដឹកនាំបក្សសង្គ្រោះជាតិមកកម្ពុជាវិញ។
ក្រៅពីសួរពីទំនាក់ទំនងជាមួយឈ្មោះ សុខ ស៊ីឡាក់ ហើយ លោក សេង ហៀង ក៏បានសួរលោក វឿង សំណាង ពីទំនាក់ទំនងជាមួយឈ្មោះ ឡេង សុធារី និងការបង្ហោះសារកៀរគរប្រជាពលរដ្ឋទៅទទួលលោកស្រី មូរ សុខហួរ និងបានញុះញង់ឱ្យកម្លាំងប្រឆាំងនឹងរដ្ឋាភិបាលស្របច្បាប់ អំឡុងពេលថ្នាក់ដឹកនាំវិលត្រលប់មកកម្ពុជាវិញ ជាដើម។
ឈរក្នុងរង្វង់ក្រចកសេះ លោក វឿង សំណាង បានលើកឡើងថា ឈ្មោះដែលតំណាងអយ្យការបានសួរទាំង២នោះ រូបលោកមិនដែលស្គាល់ ហើយក៏គ្មានទំនាក់ទំនងជាមួយដែរ ខណៈសារដែលបុគ្គលរូបនោះបង្ហោះ ក៏រូបលោកមិនបានឃើញដែរ។
ក្រោយបញ្ចប់ការសួរដេញដោលលោក វឿង សំណាង ប្រធានក្រុមប្រឹក្សាជំនុំជម្រះ លោកស្រី អ៊ុក រ៉េតគន្ធា បានឱ្យក្រឡាបញ្ជីអានរបាយការណ៍សំយោគរបស់សមត្ថកិច្ច ដែលលោក សម រង្ស៊ី, លោក អេង ឆៃអ៊ាង, លោក ឡុង រី និងលោក អ៊ួ ច័ន្ទរិទ្ធ ព្រមទាំងសកម្មជនបក្សប្រឆាំង បានបង្ហោះលើបណ្ដាញសង្គមហ្វេសប៊ុក។
របាយការណ៍ដែលក្រឡាបញ្ជីអាននេះ សមត្ថកិច្ចបានស្រង់ចេញពីបណ្ដាញសង្គមហ្វេសប៊ុក ដែលអ្នកទាំងនោះបានបង្ហោះដោយអំពាវនាវឱ្យប្រជាពលរដ្ឋទាំងក្នុងស្រុកនិងក្រៅស្រុក ចូលរួមអមដំណើរនិងទទួលលោកស្រី មូរ សុខហួរ ដែលនឹងត្រលប់មកកម្ពុជា ដើម្បីតតាំងក្ដីនៅតុលាការនៅដើមខែមករា ឆ្នាំ២០២១។
ប៉ុន្តែបើតាមរបាយការណ៍ដែលក្រឡាបញ្ជីអានអំឡុងពេលសវនាការព្រឹកមិញនេះ បានចាត់ទុកគម្រោងការវិលត្រលប់របស់លោកស្រី មូរ សុខហួរ គ្រាន់តែជាលេស ដើម្បីចង់ផ្ដួលរំលំរដ្ឋាភិបាលស្របច្បាប់តែប៉ុណ្ណោះ។
យ៉ាងណា ក្រោយពីបើកសវនាការមួយព្រឹក ប្រធានក្រុមប្រឹក្សាជំនុំជម្រះ លោកស្រី អ៊ុក រ៉េតគន្ធា បានប្រកាសផ្អាក ដោយនឹងបន្តសវនាការនៅថ្ងៃទី២០ ខែតុលា ខាងមុខទៀត។
មន្រ្តីការពារសិទ្ធិមនុស្សនៃសមាគមអាដហុក លោក យី សុខសាន្ត ដែលឃ្លាំមើលពីដំណើរការសវនាការនេះ យល់ថា ការអំពាវនាវរបស់ថ្នាក់ដឹកនាំ និងសកម្មជនទាំងអស់ ជាសិទ្ធិបញ្ចេញមតិតែប៉ុណ្ណោះ។ មួយវិញទៀត លោកថា ការចោទប្រកាន់និងឃុំខ្លួនប្រជាពលរដ្ឋដែលគ្រាន់តែទៅឃ្លាំមើលនៅមុខសាលាដំបូងរាជធានីភ្នំពេញ កាលពីអំឡុងចុងឆ្នាំ២០២០ និងអ្នកផ្សេងទៀតដែលមិនពាក់ព័ន្ធ ខណៈពួកគេគ្រាន់តែជាអតីតសកម្មជនបក្សប្រឆាំង ថាជារឿងអយុត្តិធម៌សម្រាប់អ្នកទាំងនោះផងដែរ។
លោកថា៖ «យើងមើលខ្លឹមសារទាំងអស់នេះ ក្នុងនាមយើងធ្វើការសិទ្ធិមនុស្ស ដែលយើងប្រកាន់របបលទ្ធិប្រជាធិបតេយ្យសេរីពហុបក្ស គ្រាន់តែជាការអំពាវនាវឱ្យចូលស្រុក វាអត់មានពាក់ព័ន្ធនឹងអី វាអត់ទាន់មានព្យសនកម្មអី ដែលធ្វើឱ្យខូចខាតប៉ះពាល់ជាតិសាសន៍ ប្រទេសជាតិ! មើលទាំងអស់គ្នា វាអត់មានឃើញ។ អ៊ីចឹងហើយបានយើងស្នើសុំទទូចដល់រាជរដ្ឋាភិបាលគួរតែងាកមករកការចរចាវិញ ដើម្បីឱ្យប្រជាពលរដ្ឋយើងរស់នៅមានសេចក្ដីសុខ កុំឱ្យគាត់រត់ចំណាកស្រុកភៀសខ្លួនរហូតមកដល់ថ្ងៃហ្នឹង។ យើងស្រែកថាប្រទេសយើងមានសន្តិភាព ប៉ុន្តែតំណាងរាស្រ្តមួយចំនួនរត់ទៅនៅក្រៅស្រុក គេជឿជាក់យើង? អត់ចំណុចនេះ ដែលយើងឱ្យពិចារណា»។
សំណុំរឿង «រួមគំនិតក្បត់» ដែលមានជនជាប់ចោទ៣៩នាក់នេះ ត្រូវបានបំបែកជា២សំណុំរឿង ក្នុងនោះ សំណុំរឿងទី១ មានជនជាប់ចោទ លោក អៀ ចាន់ណា និងកញ្ញា សៅ ឧសភា ដែលកំពុងស្ថិតក្នុងដំណាក់កាលចៅក្រមស៊ើប ខណៈសំណុំរឿងមួយទៀតមានជនជាប់ចោទ ៣៧នាក់ ដែលតុលាការកំពុងដំណើរការសវនាការ។
ជនជាប់ចោទទាំង៣៧នាក់ ក្នុងនោះមានលោក សម រង្ស៊ី, លោក អេង ឆៃអ៊ាង, លោក ឡុង រី, លោកស្រី មូរ សុខហួរ ព្រមទាំងសកម្មជនផ្សេងទៀត ដែលបច្ចុប្បន្ន អ្នកទាំងអស់នេះកំពុងនិរទេសខ្លួននៅក្រៅប្រទេស ខណៈជនជាប់ចោទដែលមានវត្តមានក្នុងបន្ទប់សវនាការ មានតែ៣នាក់ប៉ុណ្ណោះ។ ជនជាប់ចោទទាំង៣នាក់នោះ មានលោក គង់ ម៉ាស់, លោក ខាន់ ប៊ុនផេង និងលោក វឿង សំណាង ដោយអ្នកទាំងនេះកំពុងជាប់នៅពន្ធនាគារព្រៃស៕
