មន្ត្រីជាន់ខ្ពស់ក្រសួងការងារ អះអាងជាថ្មីថា មន្ត្រីជំនាញរកពុំឃើញនូវការប្រើប្រាស់កម្លាំងពលកម្មកុមារ ឬកិច្ចសន្យាការងារជាមួយកុមារនៅតាមសិប្បកម្មផលិតឥដ្ឋនានាឡើយ ដោយគ្រាន់តែរកឃើញមានកុមាររស់នៅទីតាំងទាំងនោះ ប៉ុន្តែសង្គមស៊ីវិលថា បើទោះគ្មានកិច្ចសន្យាការងារ តែការណ៍ដែលម្ចាស់ទីតាំងអនុញ្ញាតឱ្យកម្មករអាចប្រើកុមារជួយការងារបាន នោះជារូបភាពប្រើប្រាស់កម្លាំងពលកម្មកុមាររួចទៅហើយ។
ការអះអាងនេះ ធ្វើឡើងក្នុងសន្និសីទសារព័ត៌មាន ស្ដីពី «សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងការងារ និងបណ្ដុះបណ្ដាលវិជ្ជាជីវៈ» នៅថ្ងៃទី១២ ខែតុលា ម្សិលមិញនេះ។
រដ្ឋលេខាធិការ និងជាអ្នកនាំពាក្យក្រសួងការងារ លោក ហេង សួរ ថ្លែងថា កន្លងមក ក្រសួងបានកត់សម្គាល់ឃើញថា កុមារបានជួបនូវហានិភ័យខ្ពស់ ដូចជា ករណីគ្រោះថ្នាក់បណ្តាលឱ្យពិការជាដើមនោះ គឺដោយសារកុមារទៅតាមឪពុកម្តាយធ្វើការនៅតាមឡឥដ្ឋ។
លោកបន្តថា ជារឿយៗ មន្ត្រីជំនាញបានចុះធ្វើអធិការកិច្ចនៅតាមទីតាំងឡឥដ្ឋនានា និងបានរកឃើញទីតាំងខ្លះមានកុមាររស់នៅទីនោះជាមួយឪពុកម្តាយរបស់ពួកគេ ប៉ុន្តែមិនបានរកឃើញនូវការប្រើប្រាស់កម្លាំងពលកម្មកុមារជាផ្លូវការ ឬកិច្ចសន្យាការងារជាមួយកុមារនៅតាមទីតាំងឡឥដ្ឋទាំងនោះឡើយ។
លោក ហេង សួរ បានគូសបញ្ជាក់ថា៖ «មែនទែនទៅ អ្វីដែលយើងបានចុះធ្វើអធិការកិច្ច គឺមិនមានឡឥដ្ឋណាមួយប្រើប្រាស់កុមារនោះទេ ប៉ុន្តែពិតជាមានកុមារដែលទៅតាមឪពុកម្តាយរស់នៅក្បែរទីតាំងឡឥដ្ឋហ្នឹង។ ប៉ុន្តែអ្វីដែលបង្កគ្រោះថ្នាក់កន្លងមកហ្នឹង គឺត្រង់ថានៅពេលដែលម៉ោងការងារហ្នឹង ឪពុកម្តាយ ឬមួយក៏កុមារហ្នឹង អាចចូលទៅកន្លែងទីតាំងផលិតកម្មហ្នឹង ហើយវាធ្វើឱ្យមានការគ្រោះថ្នាក់អីហ្នឹង។ ប៉ុន្តែបើនិយាយពីកិច្ចសន្យាការងារ រឿងមួយនេះតែម្តង យើងបានចុះទៅអង្កេតមើលហើយ គឺមិនមានការប្រើប្រាស់កម្លាំងពលកម្មកុមារជាផ្លូវការអីណាទេ ប៉ុន្តែមានការរកឃើញថា កុមាររស់នៅលើទីតាំងហ្នឹងមែន»។
មន្ត្រីជាន់ខ្ពស់ក្រសួងការងាររូបនេះបន្តថា កន្លងមក ក្រសួងក៏ធ្លាប់បានផ្លាស់ប្តូរពីការចុះទៅអធិការកិច្ច ដោយការចុះទៅពិនិត្យមើលសកម្មភាពនៅតាមឡឥដ្ឋ ដោយមិនបានជូនដំណឹងមុន ក្នុងន័យទប់ស្កាត់ការប្រើប្រាស់កម្លាំងកុមារនៅក្នុងឡឥដ្ឋ ដើម្បីធានាថា កុមារមិនទទួលរងផលប៉ះពាល់បន្តទៀត។ យ៉ាងណា លោកថា នៅតែពុំមានករណីប្រើប្រាស់កម្លាំងកុមារនៅក្នុងផលិតឡឥដ្ឋទាំងនោះឡើយ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត លើកឡើងថា ការប្រើប្រាស់កម្លាំងពលកម្មកុមារ គឺមិនមែនទាល់តែម្ចាស់ឡឥដ្ឋមានកិច្ចសន្យាការងារជាមួយកុមារទេ។
លោកថា រូបភាពថៅកែឡឥដ្ឋប្រើកុមារដោយផ្ទាល់ គឺអាចនឹងមិនមាននៅតាមទីតាំង តែរូបភាពថៅកែអនុញ្ញាតឱ្យកម្មករស្នាក់នៅទីតាំងអាចប្រើកុមារជួយការងារបាន នោះក៏ចាត់ទុកជារូបភាពប្រើប្រាស់កម្លាំងពលកម្មកុមារ និងប៉ះពាល់ដល់សិទ្ធិកុមារផងដែរ។
លោក អំ សំអាត ថ្លែងថា៖ «ការប្រើប្រាស់កម្លាំងកុមារដោយផ្ទាល់ គឺឡឥដ្ឋហ្នឹងប្រើប្រាស់កុមារ ដើម្បីផលប្រយោជន៍ឡឥដ្ឋដោយផ្ទាល់។ តែពលកម្មកុមារមួយទៀតគឺការប្រើប្រាស់កុមារ ប៉ុន្តែមិនមែនថៅកែឡឥដ្ឋប្រើដោយផ្ទាល់ទេ គឺឪពុកម្តាយជាអ្នកឱ្យកុមារ ឬកូនរបស់ខ្លួន ជួយទៅលើការធ្វើសង្វាក់ផលិតកម្មដូចជា ការជញ្ជូនឥដ្ឋ ការរៀបឥដ្ឋ រៀបអីចឹងទៅ។ អាហ្នឹងក៏យើងចាត់ទុកថាជាពលកម្មកុមារដែរ ដែលមិនត្រូវឱ្យមានការកើតឡើងទេ»។
លោក អំ សំអាត បន្តថា ការងារឡឥដ្ឋនេះ គឺជាការងារតាមរដូវ ហើយកម្មករទទួលកម្រៃច្រើនអាស្រ័យលើសង្វាក់ផលិតកម្មច្រើនដែរ ហេតុនេះហើយឪពុកម្តាយខ្លះបានប្រើកូនៗរបស់ពួកគេ ដើម្បីជួយធ្វើការ។ ករណីនេះ លោកចាត់ទុកថា ជាប្រើប្រាស់កម្លាំងពលកម្មកុមារ ដែលទាមទារឱ្យមានការពិនិត្យឱ្យបានម៉ត់ចត់។
លោក អំ សំអាត បន្តថា៖ «គួរតែដាក់ទណ្ឌកម្មចំពោះសិប្បកម្មឡឥដ្ឋណាដែលឃើញ ឬក៏អនុញ្ញាតឱ្យអ្នកធ្វើការឡឥដ្ឋហ្នឹងប្រើប្រាស់កូនរបស់គាត់ដើម្បីផលប្រយោជន៍ លុយកាក់ ឬក៏កម្រៃ ប៉ុន្តែជាផលប្រយោជន៍របស់ឡឥដ្ឋហ្នឹង»។
កាលពីឆ្នាំ២០១៦ អង្គការសិទ្ធិមនុស្សលីកាដូ បានចេញផ្សាយរបាយការណ៍មួយទាក់ទងពលកម្មកុមារក្នុងសិប្បកម្មឡផលិតឥដ្ឋនៅកម្ពុជា។ របាយការណ៍នោះ ពិពណ៌នាលម្អិតពីមធ្យោបាយ ដែលម្ចាស់សិប្បកម្មជ្រើសរើសកម្មករដោយការផ្តល់ប្រាក់កម្ចី និងការផ្តល់កន្លែងស្នាក់នៅដល់គ្រួសារទីទ័លក្រ។
អង្គការការពារសិទ្ធិមនុស្សដដែលនេះ បានលើកឡើងនៅក្នុងរបាយការណ៍នោះថា ការបញ្ចាំខ្លួនដើម្បីដោះបំណុល និងពលកម្មកុមារក្នុងសិប្បកម្មផលិតផលឥដ្ឋនៅកម្ពុជា បានបង្ហាញនូវទម្រង់ទាសភាពសម័យទំនើប៕
