អាជ្ញាធរជាតិអប្សរា បាននិយាយនៅសប្ដាហ៍នេះថា ផ្ទៃមុខអប្សរាដែលបានរបេះធ្លាក់នៅប្រាសាទតាព្រហ្ម ក្នុងឧទ្យានបុរាណអង្គរ នឹងត្រូវបិទឡើងវិញនៅពេលអាកាសធាតុអំណោយផល។
នៅព្រឹកថ្ងៃទី៣០ ខែកញ្ញា មន្រ្តីយាមប្រាសាទម្នាក់បានរាយការណ៍ថា ផ្ទៃមុខរូបចម្លាក់អប្សរាមួយអង្គបានរបេះធ្លាក់។ ប្រាសាទតាព្រហ្ម មានភាពល្បីល្បាញដោយសារមានដើមឈើធំៗ ឫសឈើដុះជុំវិញបរិវេណប្រាសាទ។
នៅលើគណនីហ្វេសប៊ុកមួយដែលត្រូវបានចែកចាយជាង៥ ០០០ដង មគ្គុទ្ទេសក៍ទេសចរណ៍ខេត្តសៀមរាបម្នាក់បានអំពាវនាវឱ្យនគរបាលពន្យល់ពីផ្ទៃមុខអប្សរាដែលជ្រុះចេញនោះ អមជាមួយនឹងរូបថតអប្សរាដែលបាត់ផ្ទៃមុខ ដោយសរសេរថា «តើវាបណ្ដាលមកពីអ្វី?»។
មន្រ្តីអាជ្ញាធរជាតិអប្សរា លោកស្រី នេត ស៊ីម៉ូន បាននិយាយនៅក្នុងសេចក្ដីថ្លែងការណ៍ កាលពីថ្ងៃអង្គារថា ផ្ទៃមុខអប្សរានោះមិនបាត់ឬមិនបាក់បែកឡើយ។
លោកស្រីបន្ថែមថា គឺមានកូនឫសឈើចាក់ចូល ហើយមានស្នាមប្រេះស្រាប់ផងនោះ ទើបឫសឈើវាបានផ្ទាត់រូបមុខអប្សរានោះឱ្យជ្រុះធ្លាក់។ យ៉ាងណា លោកស្រី នេត ស៊ីម៉ន បញ្ជាក់ថា ជាសំណាងល្អ ផ្ទាំងមុខអប្សរាបានជ្រុះទើរឫសឈើ បើមិនដូច្នោះទេ អាចឱ្យបែកដោយងាយ។
លោក ស្រ៊ាង គឹមស្រ៊ុន សាស្ត្រាចារ្យភូគព្ភសាស្ត្រ នៃវិទ្យាស្ថានគុកោសល្យរាជធានីភ្នំពេញ មានប្រសាសន៍ថា រូបចម្លាក់នៅប្រាសាទតាព្រហ្ម កម្រនឹងបែកបាក់ណាស់ ទាល់តែមានអ្វីមួយ ឬមនុស្សទៅប៉ះ។ ទោះយ៉ាងណា លោកថា ដោយសារអាយុកាល អាកាសធាតុ ទឹក ឬខ្យល់ ជួនកាលអាចបណ្ដាលឱ្យមានការរបេះធ្លាក់។
បន្ទាប់ពីពិនិត្យមើលផ្ទៃមុខអប្សរាដែលរបេះជ្រុះនោះ លោក ស្រ៊ាង គឹមស្រ៊ុន បាននិយាយថា ឫសឈើដែលដុះចូលផ្ទៃមុខអប្សរា ជាហេតុធ្វើឱ្យរបេះធ្លាក់។ លោកបានបន្ថែមថា មន្ត្រីជំនាញអាចបិទភ្ជិតផ្ទៃមុខអប្សរាដោយប្រើស៊ីម៉ងត៍បាន។
លោកបន្ថែមថា៖ «មិនមែនសុខៗ របេះធ្លាក់ឡើយ លុះត្រាតែមានអ្វីទៅប៉ះ»។
អាជ្ញាធរជាតិអប្សរា កំពុងរក្សាទុកផ្ទៃមុខអប្សរានោះនៅកន្លែងមានសុវត្ថិភាព រហូតដល់អាកាសធាតុអំណោយផល ទើបអាចបិទឡើងវិញបាន៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Apsara Authority to Restore Ta Prohm Statue’s Fallen Face
