សមត្ថកិច្ចស្រុកលើកដែក បញ្ជូនជនសង្ស័យចំនួន ៣នាក់ ទៅស្នងការដ្ឋាននគរបាលខេត្តកណ្តាល ដើម្បីបន្តសាកសួរពាក់ព័ន្ធសំណុំរឿងលិចទូកកាលពីថ្ងៃទី១៣ ខែតុលា ដែលបណ្តាលឱ្យកុមារចំនួន ១១នាក់ស្លាប់ ខណៈកុមារ៤នាក់ទៀតបានរួចផុតពីសេចក្តីស្លាប់នៃសោកនាដកម្មនេះ។
អធិការនគរបាលស្រុកលើកដែក ខេត្តកណ្តាល លោក អាំ ធូ បានប្រាប់វីអូឌីនៅថ្ងៃអាទិត្យថា សមត្ថកិច្ចបានឃាត់ខ្លួនជនសង្ស័យចំនួន ៣នាក់ ក្នុងនោះមានម្ចាស់ទូកចម្លង២នាក់ និងអ្នកបើកទូកម្នាក់ ដើម្បីសាកសួរពាក់ព័ន្ធនឹងសំណុំរឿងលិចទូកនៅស្រុកលើកដែក បណ្តាលឱ្យមនុស្ស១១នាក់ស្លាប់ និង៤នាក់ទៀតរួចផុតពីសេចក្តីស្លាប់ កាលពីថ្ងៃទី១៣ ខែតុលា ឆ្នាំ២០២២។
លោកបញ្ជាក់ថា ក្រោយពីសាកសួរនៅអធិការដ្ឋាននគរបាលស្រុកចប់ សមត្ថកិច្ចក៏បានបញ្ជូនសំណុំរឿងនេះបន្តទៅស្នងការដ្ឋាននគរបាលខេត្តកណ្តាលនៅថ្ងៃនេះ ដើម្បីចាត់វិធានការច្បាប់បន្តទៀត។
លោកបញ្ជាក់ថា៖ «យើងបញ្ជូនទៅស្នងការដ្ឋានរគរបាលខេត្តកណ្តាលចាត់វិធានការបន្តហើយ។ យើងស្រាវជ្រាវឃើញថាអ្នកពាក់ព័ន្ធមានតែ៣នាក់ហ្នឹងទេ ប៉ុន្តែអ្នកពាក់ព័ន្ធផ្សេងទៀតយើងអត់ឃើញមានទេ»។
វីអូឌីបានព្យាយាមទាក់ទងទៅស្នងការនគរបាលខេត្តកណ្តាល លោក ឈឿន សុចិត្ត ជាច្រើនសារ តែទូរសព្ទមិនអាចទាក់ទងបាននៅរសៀលថ្ងៃអាទិត្យនេះ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ប្រជាពលរដ្ឋស្លាប់ដោយសារលង់ទឹកស្លាប់នោះ អាជ្ញាធរត្រូវស្រាវជ្រាវឱ្យបានគ្រប់ជ្រុងជ្រោយមុននឹងធ្វើការចោទប្រកាន់លើអ្នកដែលប្រព្រឹត្តខុស ដើម្បីផ្តល់យុត្តិធម៌ដល់ជនរងគ្រោះ។
លោកផ្តល់ជាអនុសាសន៍ថា៖«គួរតែធ្វើការស៊ើបអង្កេតនិងផ្តល់តម្លាភាពដល់ជនរងគ្រោះ។ តាមផ្លូវច្បាប់កាលណាមានបទល្មើសមួយកើតឡើង យើងត្រូវរកអ្នកដែលទទួលខុសត្រូវ។ អ៊ីចឹងការអនុវត្តច្បាប់អត់មានការរើសអើងទេ អនុវត្តត្រូវមានតម្លាភាព»។
យ៉ាងណា លោក អំា ធូ អះអាថា ក្រុមការងារជំនាញមិនទាន់ចោទប្រកាន់ទៅលើជនសង្ស័យនោះទេ ដោយទុកឱ្យស្នងការដ្ឋាននគរបាលខេត្តជាអ្នកធ្វើការបន្ត ហើយតុលាការជាអ្នកសម្រេចចោទប្រកាន់នៅពេលក្រោយទៀត។
ឧបទ្ទវហេតុលិចទូកចម្លងនៅភូមិកោះចំរើន ឃុំកំពង់ភ្នំ ស្រុកលើកដែក បានកើតឡើងនៅម៉ោងជិត៧យប់ ថ្ងៃទី១៣ ខែតុលា ឆ្នាំ២០២២ ដែលបណ្ដាលឱ្យសិស្សសាលាចំនួន ១៥នាក់ មានអាយុចន្លោះពី១២ឆ្នាំ ទៅ១៤ឆ្នាំ បានបាត់ខ្លួន។ ក្រោយមកសមត្ថកិច្ច និងក្រុមជួយសង្គ្រោះបានរកឃើញកុមារចំនួន១១នាក់ ស្លាប់បាត់បង់ជីវិត ខណៈកុមារ៤នាក់ទៀតបានរួចផុតជីវិតពីហេតុការអាក្រក់នេះ។
ហេតុការណ៍នេះ បានកើតឡើងដោយសមត្ថកិច្ចបញ្ជាក់ថា បណ្ដាលមកពីម្ចាស់ទូកដាក់លើសចំណុះ ធ្វេសប្រហែស និងមិនមានការប្រុងប្រយ័ត្ន ដោយគ្មានអាវពោងសម្រាប់ការពារ៕
