សមត្ថកិច្ចខេត្តកណ្ដាល សម្រេចដោះលែងម្ចាស់ទូកដចំនួន២នាក់ និងអ្នកបើកទូកម្នាក់ ឱ្យនៅក្រៅឃុំ ប៉ុន្តែសំណុំរឿងលិចទូកដែលបណ្ដាលឱ្យកុមារចំនួន១១នាក់ស្លាប់នោះនៅបន្តតាមនីតិវិធីតុលាការដដែល។
កាលពីថ្ងៃទី១៥ ខែតុលា សមត្ថកិច្ចបានឃាត់ខ្លួនជនសង្ស័យចំនួន៣នាក់ ដើម្បីសាកសួរ ក្រោយមានឧបទ្ទវហេតុលិចទូកចម្លង នៅឃុំកំពង់ភ្នំ ស្រុកលើកដែក។
ស្នងការរងនគរបាលខេត្តកណ្តាល ផ្នែកព្រហ្មទណ្ឌ លោក ឡាក់ ម៉េងធី បានប្រាប់វីអូឌីនៅថ្ងៃចន្ទនេះថា ក្រោយពីឃាត់ខ្លួននិងសួរចម្លើយស្ត្រីជាជនសង្ស័យ២នាក់ ឈ្មោះ ឆឹង ស្រីនាង អាយុ៦៣ឆ្នាំ និងឈ្មោះ ឆឹង វណ្ណា អាយុ៥២ឆ្នាំ ដែលជាម្ចាស់ទូកដ និងក្មេងប្រុសអ្នកបើកទូក ឈ្មោះ ថេត គន្ធី អាយុ១៥ឆ្នាំ រួចមក សមត្ថកិច្ចបានសម្រេចដោះលែងពួកគាត់វិញ តាមការបញ្ជារបស់ព្រះរាជអាជ្ញាអមសាលាដំបូងខេត្តកណ្ដាល លោក លាវ ស្រេង ខណៈសំណុំរឿងនេះនឹងត្រូវបញ្ជូនទៅតុលាការចាត់វិធានការច្បាប់បន្ត។
លោកមានប្រសាសន៍ថា៖ «យើងបញ្ជូនទាំង៣នាក់ទៅស្នងការដ្ឋាននគរបាល ហើយអ្នកពាក់ព័ន្ធមានតែប៉ុណ្ណឹង ព្រោះយើងគ្មានអ្នកពាក់ព័ន្ធទៀតទេ»។
ព្រះរាជអាជ្ញាអមសាលាដំបូងខេត្តកណ្ដាល លោក លាវ ស្រេង ដែលកាន់សំណុំរឿងនេះ បានប្រាប់វីអូឌីយ៉ាងខ្លីថា ដើមចមដែលតុលាការសម្រេចដោះលែងពួកគេវិញនោះ ដោយសារសមត្ថកិច្ចបានសួរចម្លើយ និងធ្វើកំណត់ហេតុស្របតាមច្បាប់រួចហើយ។ យ៉ាងណា លោកថា សំណុំរឿងនេះនៅតែបន្តតាមនីតិវិធីច្បាប់នៅតុលាការដដែល។
លោកមានប្រសាសន៍ថា៖ «នៅក្នុងនេះ យើងគ្រាន់តែហៅគាត់មកសាកសួរ។ ឥលូវនេះ យើងអនុញ្ញាតឱ្យគាត់ត្រលប់ទៅលំនៅឋានវិញ ឯរឿងអ្វីផ្សេងទៀត ចាំយើងពិនិត្យនៅពេលក្រោយ»។
យ៉ាងណា សមត្ថកិច្ច និងព្រះរាជអាជ្ញា មិនទាន់ចោទប្រកាន់ទៅលើជនសង្ស័យនោះទេ ខណៈសំណុំរឿងនេះនឹងបញ្ជូនទៅតុលាការនាពេលឆាប់ៗខាងមុខនេះ។
លោក សុខ ចាន់ ដែលត្រូវជាឪពុករបស់កុមារ ចាន់ សុខជីម និងសាច់ញាតិកុមារដែលលិចទូកផ្សេងទៀត បានលើកឡើងប្រហាក់ប្រហែលគ្នាថា ពួកគេសុំមិនធ្វើការអត្ថាធិប្បាយជុំវិញការដោះលែងម្ចាស់ទូកដ និងអ្នកបើកទូកនោះទេ ដោយសារពួកគាត់ជាប់រវល់រៀបចំពិធីបុណ្យសពនៅមិនទាន់ចប់នៅឡើយ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ការសម្រេចដោះលែងឬមិនដោះលែងជាឆន្ទានុសិទ្ធិរបស់តុលាការ ប៉ុន្តែលោកជំរុញទៅតុលាការធ្វើការស្រាវជ្រាវរកអ្នកទទួលខុសត្រូវលើបញ្ហានេះ ដើម្បីផ្តល់យុត្តិធម៌ដល់ជនរងគ្រោះ និងជាគំរូកុំឱ្យមានអំពើល្មើសបែបនេះកើតឡើងបន្តទៀត។
លោកមានប្រសាសន៍ថា៖ «ករណីនេះ វាជាករណីសិក្សាមួយ ដើម្បីជាគំរូសម្រាប់លើកក្រោយ កុំឱ្យមានរឿងហ្នឹងកើតឡើងបន្តទៀត ដែលករណីនេះបង្ហាញឱ្យមានតម្លាភាព ហើយចាត់វិធានការ រកយន្តការ យុទ្ធសាស្ត្រយ៉ាងម៉េច[ជាដើមនោះ] អ្នកស្ថាប័នដែលផ្ដល់អាជ្ញាបណ្ណគ្រប់គ្រងផ្ទាល់ ត្រូវតែមានការទទួលខុសត្រូវ ការត្រួតពិនិត្យ និងការគ្រប់គ្រងនោះ»។
ឧបទ្ទវហេតុលិចទូកចម្លងនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល បានកើតឡើងនៅម៉ោងជិត៧យប់ ថ្ងៃទី១៣ ខែតុលា ឆ្នាំ២០២២ ដែលបណ្ដាលឱ្យសិស្សសាលាចំនួន១៥នាក់ មានអាយុចន្លោះពី១២ឆ្នាំ ទៅ១៤ឆ្នាំ បានបាត់ខ្លួន។ ក្រោយមក សមត្ថកិច្ច និងក្រុមជួយសង្គ្រោះ បានរកឃើញកុមារចំនួន១១នាក់ស្លាប់បាត់បង់ជីវិត ខណៈកុមារ៤នាក់ទៀតបានរួចផុតជីវិតពីហេតុការណ៍ដ៏អាក្រក់នេះ។
ហេតុការណ៍នេះបានកើតឡើង ដោយសមត្ថកិច្ចបញ្ជាក់ថា បណ្ដាលមកពីម្ចាស់ទូកដាក់លើសចំណុះ ធ្វេសប្រហែស និងមិនមានការប្រុងប្រយ័ត្ន ដោយគ្មានអាវពោងសម្រាប់ការពារ៕
