លោកនាយករដ្ឋមន្ដ្រី ហ៊ុន សែន អំពាវនាវដល់គ្រឹះស្ថានហិរញ្ញវត្ថុទាំងអស់ យោគយល់ និងអនុគ្រោះដល់ប្រជាពលរដ្ឋដែលរងគ្រោះដោយទឹកជំនន់ តាមរយៈការពន្យារពេល ឬបន្ធូរបន្ថយអត្រាការប្រាក់។
ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យជាតិគ្រប់គ្រង (NUM) នៅរាជធានីភ្នំពេញ នាព្រឹកថ្ងៃទី១៧ ខែតុលា ឆ្នាំ២០២២នេះ លោកនាយករដ្ឋមន្ត្រី ហ៊ុន សែន ថ្លែងថា ក្នុងគ្រាដែលពលរដ្ឋមួយចំនួនកំពុងជួបការលំបាកដោយសារគ្រោះទឹកជំនន់ លោកអំពាវនាវដល់គ្រប់គ្រឹះស្ថានហិរញ្ញវត្ថុទាំងអស់ផ្ដល់ការអនុគ្រោះដល់អ្នកខ្ចីឥណទានដែលរងផលប៉ះពាល់ផ្ទាល់ តាមរយៈការពន្យារពេលសង បន្ធូរបន្ថយអត្រាការប្រាក់ និងការរៀបចំឥណទានឡើងវិញ ដោយកុំទៅរឹបអូសផ្ទះសម្បែងរបស់ពួកគាត់។
លោកថា៖ «ខ្ញុំសូមអំពាវនាវចំពោះមីក្រូហិរញ្ញវត្ថុ ផ្នែកធនាគារ និងមីក្រូហិរញ្ញវត្ថុ ផ្ដល់នូវលទ្ធភាពផ្ដល់ការអនុគ្រោះសម្រាប់អ្នកដែលទទួលផលប៉ះពាល់ពីគ្រោះទឹកជំនន់ តាមរយៈនៃការពន្យារពេលសម្រាប់ការសង បន្ធូរបន្ថយការប្រាក់ ឬតាមរយៈការរៀបចំឥណទានឡើងវិញ។ សូមយោគយល់ចំពោះការលំបាករបស់ប្រជាពលរដ្ឋដែលលិចលង់ហើយ យើងទៅរឹបអូសផ្ទះសម្បែងដីធ្លីរបស់គាត់តាមកិច្ចសន្យាដើម វាអត់ត្រូវទេ»។
ជាមួយគ្នានេះដែរ លោកក៏បានណែនាំទៅធនាគារជាតិនៃកម្ពុជា ប្រជុំជាមួយនឹងម្ចាស់គ្រឹះស្ថានហិរញ្ញវត្ថុផងដែរ ដើម្បីសម្របសម្រួលលើបញ្ហានេះ។
ក្រៅពីនោះ លោកនាយករដ្ឋមន្ត្រី ហ៊ុន សែន ក៏បានផ្តាំទៅមន្ត្រីកសិកម្មទាំងអស់ រួមទាំងអាជ្ញាធរដែនដី ត្រូវចុះទៅពិនិត្យ វាយតម្លៃផលប៉ះពាល់ទឹកជំនន់ និងស្ថិតិពលរដ្ឋដែលរងគ្រោះ ព្រមទាំងដោះស្រាយបញ្ហាភ្លាមៗជូនប្រជាពលរដ្ឋនៅមូលដ្ឋាន ដោយមិនត្រូវអនុវត្តសកម្មភាពការងារតាមបែប «ជិះសេះមើលផ្កា» នោះទេ៕