លោក ហ៊ុន សែន ប្រកាស​ស្វាគមន៍​លោក សម រង្ស៊ី វិល​មក​កម្ពុជា​វិញ​ដោយ​ការ​ចាប់​បញ្ចូល​ក្នុង​ពន្ធនាគារ

(រូបឆ្វេង) លោកនាយករដ្ឋមន្រ្តី ហ៊ុន សែន និង​លោក សម រង្ស៊ី មេដឹកនាំអតីត​បក្សប្រឆាំង​នៅកម្ពុជា (រូបស្តាំ)

​​លោកនា​យ​ក​​​​​រដ្ឋ​ម​ន្ត្រី​ ​ហ៊ុ​ន​ សែន បញ្ជាក់ជំហរ​​ថា នឹង​មិ​នរារាំងជើ​ងហោះ​ហើ​រ​ដែលដឹកលោក សម រង្ស៊ី ត្រលប់​មក​កម្ពុជា​​ដូច​ការ​លើក​ឡើង​នោះ​ទេ ប៉ុន្តែលោក​ថា​បានត្រៀមកម្លាំងដើម្បីចាប់ដៃគូប្រកួត​មាន​​សក្ដានុពល​រូបនេះឱ្យអនុវត្តទោសក្នុងពន្ធនាគារតាម​ការផ្ដន្ទាទោសរបស់តុលាការ។

ការថ្លែងរបស់​នាយករដ្ឋមន្ត្រីនេះធ្វើឡើងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យជាតិគ្រប់គ្រ​​ង ក្នុងរាជធានីភ្នំពេញ នាព្រឹកថ្ងៃចន្ទនេះ។

លោ​កនាយករដ្ឋមន្ត្រី​ ហ៊ុន សែន ថ្លែងបែបឌឺ​ដងទៅលោក សម រង្ស៊ី ទាំង​​មិនបញ្ចេញឈ្មោះ ដោយប្រើពាក្យ​ធ្ងន់ៗថា «ត្រកូលក្បត់ជាតិ៣ជំនាន់» ឮថាចង់មកកម្ពុជាវិញទៀតហើយ តែបានអះអាងថា បញ្ហានេះ​ ដោយ​សារ​តែ​​​រដ្ឋាភិ​បា​លកម្ពុជាមិនព្រមដកបម្រាមជើងហោះហើរ ដើម្បីបើកផ្លូវឱ្យគាត់អាចចូលមកបាន។

បញ្ហា​នេះ លោក ហ៊ុន សែន គូសបញ្ជាក់ថា មិនដែលរារាំងទេ តែផ្ទុយទៅវិញ លោកចង់ឱ្យលោក សម រង្ស៊ី វិល​មកកម្ពុជាឱ្យបានឆាប់ ដើម្បីលោកមានឱកាសប្រើវិធានការច្បាប់លើលោក សម រង្ស៊ី។

លោកថា៖ «រួចថា​ខ្ញុំ​ទៅ​ហាមឃាត់​ជាមួយ​នឹង​យន្ត​ហោះ​បរទេស មិន​ឱ្យដឹ​ក ខ្ញុំសូមបញ្ជាក់ថា ខ្ញុំមិនដែលហា​មឃាត់ទេ នរណាចង់ដឹកអីដឹកទៅ! សូមបញ្ជាក់ ដឹកមក សូមអញ្ជើញដឹកមក បញ្ជាក់ឡើងវិញ គេថាសុំឱ្យ​លោ​ក ហ៊ុន សែន ដកបម្រាម ខ្ញុំមិនដែលបញ្ជាឯណា! ប៉ុន្តែអ្វីដែលខ្ញុំបញ្ជាក់តែប៉ុណ្ណេះទេ មកដល់គឺស្វា​គមន៍ដោយខ្នោះ តែប៉ុណ្ណឹងទេ! ព្រោះទោសអ្នកឯងប៉ុន្មានទៅ? អត់រួចខ្លួនទេអាពៅ! ហើយកុំសង្ឃឹមលើ ហ៊ុន សែន ចុះហត្ថលេខាលើកលែងទោសឱ្យហ្អែងឱ្យសោះ»។

បន្ថែម​ពី​នេះ លោកក៏បាន​ព្រមានចា​ត់វិធានការ​តាម​ច្បាប់​​​ ចំពោះអ្នកដែលគាំទ្រលោក សម រង្ស៊ី ផងដែរ ដោយលោក​​សម្អាង​ថា ដើម្បីកម្ចាត់ចោល​នូ​វ​អ្វីដែល​​ជា​​មនោគម​វិជ្ជា​ជ្រុល​និយម ចាប់តាំងពីជិត១៩ឆ្នាំមុន ដែល​ថា «មានសែន អត់ស៊ី ឬមានស៊ី អត់សែន»

លោកថា៖ «បក្សនយោបាយនានាសាកហ៊ានភ្ជាប់ខ្លួនជាមួយអាហ្នឹង [លោក សម រង្ស៊ី ] មើល៍! បើមិនឈានទៅ​ក្នុង​ការរំលាយគណបក្សហ្នឹងជាបន្តទៀត។ មើល​ច្បាប់​ស្តីពីគណបក្សនយោបាយមើល៍! សាកលមើល​មើល៍! អាហ្នឹងនិយាយគ្នាឱ្យច្បាស់»។

VOD មិនអាចទាក់ទងលោក សម រង្ស៊ី ដើម្បីឆ្លើយតបជុំវិញសារលោកនាយករដ្ឋមន្ត្រីនេះបានទេ។

ប៉ុន្តែកាលពីខែកញ្ញា ឆ្នាំ២០២២ លោក សម រង្ស៊ី បានប្រកាសនៅលើហ្វេសប៊ុករបស់លោកថា លោកនឹងមក​ចូ​​ល​​​​​មក​ប្រទេស​កម្ពុជា ដើម្បីចូលរួមសវនាការតាមដីកាកោះរបស់តុលាការកម្ពុជា តែបានដាក់លក្ខ​ខណ្ឌឱ្យរដ្ឋាភិបាលលុបចោលបម្រាមរារាំងជើងហោះហើរ និងវិធានការមួយចំនួនទៀត សម្រាប់ឆ្លងកាត់ប្រទេសថៃដូចពេលកន្លងទៅ។

លោក សម រង្ស៊ី បានបញ្ជាក់នៅពេលនោះថា បើលោក ហ៊ុន សែន មិនលុបបម្រាមនេះ ដើម្បីបើកផ្លូវឱ្យលោ​ក​​បា​​នចូលមកកម្ពុជា បង្ហាញថាលោក ហ៊ុន សែន ខ្វះភាពក្លាហាន។

លោក សម រង្ស៊ី ថា៖ «ខ្ញុំសង្ឃឹមថាលោក ហ៊ុន សែន នឹងមិនបង្ហាញពីភាពកំសាករបស់គាត់ទៀតទេ ដោ​យ​​​​ហ៊ា​នលើកបម្រាម […] ដើម្បីបើកផ្លូវឱ្យខ្ញុំវិលត្រលប់មកប្រទេសកម្ពុជាវិញ ដោយសន្តិវិធី តាមដីកាកោះរ​ប​​​ស់​​តុលាការ និងស្របតាមឆន្ទៈរបស់ប្រជារាស្ត្រខ្មែរយ៉ាងច្រើនលើសលុប»។

លោក សម រង្ស៊ី ធ្លាប់បានប្រកាសប្ដេជ្ញាវិលចូលកម្ពុជាវិញ នៅថ្ងៃទី៩ ខែវិច្ឆិកា ឆ្នាំ២០១៩ ប៉ុន្តែផែនការ «៩​វិច្ឆិកា» នោះត្រូវបានបរាជ័យទាំងស្រុង។

ការបរាជ័យពេលនោះ លោក សម រង្ស៊ី សម្អាងថា បក្សកាន់អំណាចបានហា​​មក្រុមហ៊ុនអាកាសចរណ៍ជាតិ និងអន្តរជាតិ មិនឱ្យដឹកលោក​មកកម្ពុជា ការដាក់កម្លាំងប្រដាប់អាវុធសន្ធឹកស​ន្ធា​ប់តាមព្រំដែនកម្ពុជា-ថៃ ដើម្បីរារាំងគម្រោងវិលត្រលប់តាមផ្លូវគោក។

លោក សម រង្ស៊ី ដែលឡោមព័ទ្ធដោយបណ្ដឹងពីបក្សកាន់អំណាច ត្រូវបាន​តុលាការ​ចេញសាលក្រមផ្ដន្ទាទោស​កំបាំង​មុខ អំឡុងខែ​មីនា ឆ្នាំ២០២១ ឱ្យ​ជាប់​ពន្ធនាគារ​២៥​ឆ្នាំ និង​មន្ត្រី​ស្និទ្ធ​ចំនួន៨​រូប​ទៀត មាន​លោកស្រី មូរ សុខហួរ, លោក អេង ឆៃអ៊ាង និងលោក ម៉ែន សុថាវរិន្ទ្រ ជាដើម ដាក់ព​ន្ធនាគារច​ន្លោះពី២០ ទៅ២២​ឆ្នាំ ដោយ​ចោទ​ពី​បទ «ឧបឃាត» ដែលជាបទឧក្រិដ្ឋធ្ងន់ធ្ងរពាក់ព័ន្ធនឹងការផ្តួលរំលំរដ្ឋាភិបាល។

ក្រៅពីផ្ដន្ទាទោស តុលាការក៏បានដកហូត​សិទិ្ធ​បោះឆ្នោត សិទ្ធិ​ឈរឈ្មោះ​បោះឆ្នោត និង​សិទ្ធិ​បំពេញការងារ​ក្នុង​ក្របខណ្ឌ​រដ្ឋ ពីជនជាប់ចោទទាំងនោះផងដែរ។

មន្ត្រីស្និទ្ធនឹង​លោក សម រង្ស៊ី គឺលោក មែន សុថាវរិន្ទ្រ បាន​ឱ្យ VOD ​ដឹង​ពីប្រទេស​បារាំង​មក​ថា សារ​របស់លោក ហ៊ុន សែន មិនមានអ្វីប្លែក​ទេ តែថាគម្រោង​វិលត្រលប់របស់លោក សម រង្ស៊ី និងក្រុម​ការងារ មកកម្ពុ​​ជា ​នឹងត្រូវបានបង្ហាញ​​យ៉ាង​យូរ​នៅ​ចុង​ឆ្នាំនេះ។

លោកថា៖ «ចាំមើលទៅ ប្រហែលជាដាច់ខែក្រោយ ឬមួយចុងឆ្នាំ នឹងឃើញលទ្ធផលស្អីមួយ​ហើយ»។

សាស្ត្រាចារ្យវិទ្យាសាស្ត្រនយោបាយ ​លោក ឯម សុវណ្ណរ៉ា យល់ថា សារនយោបាយបើកផ្លូវរបស់នា​យ​ក​រដ្ឋមន្ត្រីហាក់បានបង្កប់​នូវភាពភ័យខ្លាច ទៅលើចលនាគាំទ្រលោក សម រង្ស៊ី ដែលបញ្ហានេះ គម្រោងវិលត្រលប់របស់ក្រុមអ្នកនយោបាយប្រឆាំងដែលនិរទេស អាចនៅតែជាឧ​ប​​​សគ្គ។

មួយវិញទៀត លោកមើលឃើញថា ភ្លើងខៀវរបស់មេដឹក​នាំ​បក្ស​កាន់​អំណាច​នេះ អាចជាការកើតចេញពីការ​មិន​សប្បាយ​ចិត្ត រឿង​ក្តីក្តាំ​នៅ​តុលាការ​បារំាង ដែល​លោក ហ៊ុន សែន ទាមទារប្រាក់​ជំងឺ​ចិត្ត​ចំនួន​១អឺរ៉ូ ពី​លោក សម រង្ស៊ី មិនបាន។ ប៉ុន្តែលោកគិតថា សារ​នេះ​នឹង​អាច​សម្លាប់​ជីវិត​នយោបាយ​មេដឹកនាំ​ក្រុមប្រឆាំ​ង​ដែល​កំពុង​និរទេស បើពួកគេ​មិ​នរកឱកាសចូលកម្ពុជាដូចការអះអាងទេនោះ។

លោកថា៖ «ខ្ញុំជឿជាក់ដែរ ព្រោះឃើញគាត់[លោក សម រង្ស៊ី ]ព្យាយាមច្រើនសាដែរ ហើយគាត់ប្រកាសជា​សាធារណៈ​ច្រើនលើកដែរ ប្រសិនបើគាត់មិនមកលើកនេះទៀត បានន័យថា គាត់អាចចប់ហើយជីវិតន​យោ​​បាយ គាត់អាចនៅក្រៅរហូត»។

ប៉ុន្តែលោកគិតថា បើវិបត្តិនយោបាយមិនត្រូវបានដោះស្រាយទេ នោះ​នឹងជំរុញឱ្យកម្ពុជាខាតបង់ច្រើន ទាំង​ផ្នែកជំរុញការអភិវឌ្ឍជាតិ បង្កើនការប្រះស្រាំខាងគំនុំនយោ​បា​យកាន់តែខ្លាំង និង​ធ្វើឱ្យសង្គមកម្ពុជាពិបា​​ករ​​កការឯកភាពជាតិ ដែល​ជាបញ្ហាប្រឈមដល់ការបាត់បង់បូរណភាពទឹកដី​ទៅ​ប្រទេស​ជិត​ខាង។

អ្នក​​រាយ​ការណ៍​​ពិសេស​របស់អង្គការសហប្រជាជាតិ លោក វីទីត មុនតាប៊ន (Vitit Muntarbhorn) កាលពីថ្ងៃទី៦ ខែតុលា ឆ្នាំ២០២២ បានលើក​ឡើងនៅកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រ​ជា​ជា​តិ ថាការរំលាយគណបក្សសង្គ្រោះជាតិ កាលពីឆ្នាំ២០១៧ បាន​ធ្វើឡើងដោយ​អ​​​​​យុត្តិធម៌។ លោកគូសបញ្ជាក់ថា បញ្ហានេះជំរុញឱ្យបរិបទនយោបាយនៅកម្ពុជាមានការ​គាប​សង្កត់​ផ្នែក​នយោបាយ ជំរុ​ញឱ្យមាន​ការ​កាត់ទោស​ទ្រង់ទ្រាយធំ​លើក្រុម​បក្សប្រឆាំង ដោយសារភាពមិនឯករាជ្យរបស់តុលាការ។

អ្នករាយការណ៍ពិសេសរូបនេះបាន​ជំរុញឱ្យរដ្ឋាភិបាលកម្ពុជាទម្លាក់​ការ​ចោទប្រកាន់នានា និងបញ្ចប់ការគំរាម​កំហែង ដើម្បី​ឱ្យ​​ពួកគេបានចូលរួ​ម​ជីវភាពនយោបាយ និង​ធានា​ឱ្យ​ការ​បោះឆ្នោតមាន​លក្ខ​ណៈ​សេរី ត្រឹម​ត្រូវ និងយុត្តិធម៌ តាមយ​ន្តការប្រជាធិបតេយ្យឡើងវិញ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ