កូដករចំនួន ៤រូប ដាក់លិខិតស្នើសុំពន្យារពេលចូលឆ្លើយបំភ្លឺ នៅសាលាដំបូងរាជធានីភ្នំពេញ ពាក់ព័ន្ធករណីថៅកែក្រុមហ៊ុនណាហ្គាវើលដ៍ប្តឹងពួកគេ ពីបទ «រំលោភលើលំនៅឋាន» ដោយអះអាងថា ពួកគេទើបតែទទួលបានដីកាកោះ និងត្រូវការពឹងពាក់មេធាវី ដើម្បីការពារសិទ្ធិនៅតុលាការ។
ការដាក់លិខិតពន្យារពេលនេះ ធ្វើឡើងបន្ទាប់ពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក ឆាយ ហុង តាមរយៈដីកាចុះថ្ងៃទី៣០ ខែកញ្ញា ឆ្នាំ២០២២ បានហៅកូដករណាហ្គា ៤រូបឱ្យចូលឆ្លើយបំភ្លឺនៅសាលាដំបូងរាជធានីភ្នំពេញ នៅថ្ងៃទី១៧ ទី១៨ និងទី១៩ ខែតុលា ឆ្នាំ២០២២នេះ។
សកម្មជនសហជីព និងជាកូដករណាហ្គាវើលដ៍ម្នាក់ក្នុងចំណោម៤នាក់ ដែលទទួលបានដីកាពីតុលាការ កញ្ញា សៀក បញ្ញា ប្រាប់វីឌូអីនៅពីមុខសាលាដំបូងរាជធានីភ្នំពេញថា ក្រុមហ៊ុនណាហ្គាវើលដ៍ បានប្តឹងពួកគាត់ ពីបទ «រំលោភលើលំនៅឋាន ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់»។
កញ្ញាបន្តថា ពួកគាត់បានស្នើទៅសាលាដំបូងរាជធានីភ្នំពេញ ដើម្បីសុំពន្យាពេលចូលបំភ្លឺ ដោយសារពួកគាត់ទើបបានទទួលដីកាកោះហៅនោះ កាលពីថ្ងៃទី១៥ ខែតុលា និងតម្រូវឱ្យចូលឆ្លើយបំភ្លឺនៅថ្ងៃទី១៧ ខែតុលា ដែលពេលវេលាឆាប់បែបនេះ ធ្វើឱ្យរូបគាត់មិនអាចរៀបចំឯកសារ និងស្វែងរកមេធាវីការពារសិទ្ធិបានភ្លាមៗនោះទេ។
កញ្ញា សៀក បញ្ញា ថា៖ «ច្បាប់នៃការធ្វើកូដកម្មគឺមានចែងថា ការធ្វើកូដកម្មពួកខ្ញុំត្រូវឈរនៅត្រង់ណា។ កុំថាឡើយធ្វើឱ្យខូចខាត ពួកខ្ញុំរាល់ថ្ងៃទៅឈរៗតែត្រឹមប៉ារ៉ាសដែលគេដាក់ហ្នឹង។ ពេលទទួលបានដីកា មានអារម្មណ៍ថាភ្ញាក់ផ្អើលខ្លាំងមែនទែន។ គ្រាន់តែវិវាទការងារសោះ ត្រូវបានខាងតុលាការដំបូងប្រចាំប្រទេសកម្ពុជាចេញសាលដីកា [ក៏ដូចជា]ទទួលពាក្យបណ្តឹងពីថៅកែណាហ្គាវើលដ៍ដែលគេកំពុងរំលោភបំពានសិទ្ធិការងារកម្មករខ្មែរ និងកំពុងតែមិនគោរពច្បាប់ប្រទេសកម្ពុជា។ បែរជាអ្នករំលោភសិទ្ធិ អ្នករំលោភច្បាប់ប្រទេស មកប្តឹងពួកខ្ញុំដែលជាកម្មករ»។
សម្រាប់កូដកររូបនេះ ការគម្រាមកំហែងមិនមែនជាដំណោះស្រាយទេ ពោលដំណោះស្រាយគឺការតម្រូវឱ្យថៅកែណាហ្គាវើលដ៍គោរពច្បាប់ស្តីពីការងារនៅកម្ពុជា និងគោរពសិទ្ធិសេរីភាពសហជីព ព្រមទាំងទទួលថ្នាក់ដឹកនាំសហជីពឱ្យចូលធ្វើការវិញ។
បើតាម កញ្ញា សៀក បញ្ញា មន្ត្រីសាលាដំបូងដែលទទួលលិខិតពីពួកគាត់មិនបានឆ្លើយតបយ៉ាងណានៅឡើយ ខណៈគ្រាន់តែវាយត្រាកាលបរិច្ឆេទប៉ុណ្ណោះ។
កូដករទាំង៤រូប ដែលរងបណ្តឹងនៅតុលាការនោះ រួមមានឈ្មោះ សៀក បញ្ញា និង ជួប សោភ័ណ្ឌ បានទទួលដីកាកោះនៅថ្ងៃទី១៥ ខែតុលា និងតម្រូវឱ្យចូលខ្លួនទៅបំភ្លឺនៅថ្ងៃទី១៧ ខែតុលា ខណៈឈ្មោះ សុខ ថាវុធ បានទទួលដីកាកោះ នៅថ្ងៃទី ១០ ខែតុលា និងតម្រូវឱ្យចូលខ្លួនទៅបំភ្លឺនៅថ្ងៃទី១៨ ខែតុលា និងឈ្មោះ នេត ចរិយា បានទទួលដីកាកោះនៅថ្ងៃទី៨ ខែតុលា និងតម្រូវឱ្យចូលខ្លួនទៅបំភ្លឺនៅថ្ងៃទី១៩ ខែតុលា។ នេះបើតាមការបញ្ជាក់របស់កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍។
វីឌូអី មិនទាន់អាចសុំការឆ្លើយតបពីអ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល បានទេនៅថ្ងៃចន្ទនេះ ដោយលោកបញ្ជាក់យ៉ាងខ្លីថា នឹងសួរព័ត៌មាននេះពីមន្ត្រីពាក់ព័ន្ធ។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ យល់ថា ការដាក់លិខិតសុំពន្យារពេលចូលឆ្លើយបំភ្លឺរបស់កូដករនោះ ជារឿងសមស្រប ខណៈពួកគេត្រូវការជំនួយផ្នែកស្មារតី និងផ្លូវច្បាប់ពីមេធាវី ដើម្បីការពារសិទ្ធពួកគេនៅតុលាការ។
អ្នកស្រី យ៉ាង សុភ័ណ្ឌ បន្តថា៖ «យើងមើល បើសិនណាក្នុងករណីចោទគាត់ថា គាត់រំលោភសិទ្ធិលំនៅឋានហ្នឹង សួរថាគាត់រំលោភនៅកន្លែងណា? កុំភ្លេចណាថាគាត់ជាកូដករក្រុមហ៊ុនណាហ្គាវើលដ៍ គាត់ត្រូវធ្វើកូដកម្មនៅក្នុងក្រុមហ៊ុនទៅទៀត មុខបរិវេណក្រុមហ៊ុនហ្នឹងឯង។ បើអត់ឱ្យគាត់ធ្វើនៅហ្នឹង តើឱ្យគាត់ទៅធ្វើនៅឯណា? ហើយច្បាប់យើងមានសរសេរច្បាស់តើ។ ចោទប្រកាន់ កុំអាងតែខ្លួនឯងមានលុយ មានអំណាច មានអ្នកនៅពីក្រោយខ្នងធំ ចង់ចោទគេបានតាមតែអំពើចិត្ត។ គេមានភ្នែកជាច្រើន សហគមន៍ មនុស្សជុំវិញពិភពលោកកំពុងផ្តោតអារម្មណ៍ទៅលើរឿងនេះ»។
ពាក់ព័ន្ធនឹងករណីវិវាទនៅក្រុមហ៊ុនណាហ្គាវើលដ៍នេះដែរ កាលពីខែមករាដើមឆ្នាំ២០២២នេះ ថ្នាក់ដឹកនាំ និងសកម្មជនសហជីពចំនួន ១១នាក់ ដែលជាតំណាងរបស់ក្រុមកូដករណាហ្គាវើលដ៏ ត្រូវបានតុលាការចោទប្រកាន់ និងឃុំខ្លួនជាបណ្តោះអាសន្ន ក្រោមការចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងបទ «រារាំងការអនុវត្តវិធានការទប់ស្កាត់ការរាលដាលជំងឺកូវីដ-១៩»។ តែយ៉ាងណា ក្រោយជាប់ឃុំជិត៣ខែ ពួកគាត់ត្រូវបានតុលាការសម្រេចឱ្យដោះលែងនៅក្រៅឃុំវិញ ដើម្បីចូលរួមការចរចារកដំណោះស្រាយស្រាយវិវាទការងាររួម ដែលអូសបន្លាយជាច្រើនខែមកនេះ។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះ បានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។ យ៉ាងណា បុគ្គលិកដែលចេញធ្វើកូដកម្មជិត១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕