សមាគមចំនួន២ ដែលធ្វើការពាក់ព័ន្ធនឹងគ្រឹះស្ថានធនាគារ និងហិរញ្ញវត្ថុកម្ចី អះអាងថា សមាជិករបស់ខ្លួននឹងផ្ដល់ការយោគយល់និងអនុគ្រោះចំពោះអតិថិជនដែលរងផលប៉ះពាល់ជាក់ស្ដែងដោយសារទឹកជំនន់ធ្ងន់ធ្ងរ ខណៈនឹងពិនិត្យលទ្ធភាពបន្ធូរបន្ថយការប្រាក់ លើកលែងការផាកពិន័យ និងចៀសវាងការរឹបអូសទ្រព្យធានារបស់អតិថិជន។
ការអះអាងនេះធ្វើឡើងតាមរយៈសេចក្ដីថ្លែងការណ៍រួមចុះថ្ងៃទី១៩ ខែតុលា របស់សមាគមធនាគារនៅកម្ពុជា និងសហគមមីក្រូហិរញ្ញវត្ថុកម្ពុជា ស្តីពី ការផ្តល់ការយោគយល់ និងអនុគ្រោះដល់អតិថិជនដែលរងផលប៉ះពាល់ដោយសារទឹកជំនន់។
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា អះអាងថា គ្រឹះស្ថានធនាគារនិងហិរញ្ញវត្ថុដែលជាសមាជិករបស់ខ្លួន នឹងផ្តល់ការយោគយល់និងអនុគ្រោះចំពោះអតិថិជនដែលរងផលប៉ះពាល់ជាក់ស្ដែងដោយសារទឹកជំនន់ធ្ងន់ធ្ងរ តាមការអំពាវនាវរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី១៧ ខែតុលា និងតបតាមសេចក្តីជូនដំណឹងរបស់ធនាគារជាតិនៃកម្ពុជា។
បើតាមសមាគមទាំង២ គ្រឹះស្ថានធនាគារ និងហិរញ្ញវត្ថុ ដែលជាសមាជិករបស់ពួកគេ នឹងផ្តល់កិច្ចសហការក្នុងក្របខណ្ឌកិច្ចការពារអតិថិជន និងបន្តការអនុគ្រោះតាមរយៈការរៀបចំឥណទានឡើងវិញ តាមលក្ខខណ្ឌដែលបានកំណត់ដោយធនាគារជាតិ។
សេចក្តីថ្លែងការណ៍រួមរបស់សមាគមទាំង២ បញ្ជាក់ថា៖ «គ្រឹះស្ថានធនាគារ និងហិរញ្ញវត្ថុ ជាសមាជិកសមាគមទាំងពីរ នឹងពិនិត្យលទ្ធភាពផងដែរ ក្នុងការបន្ធូរបន្ថយអត្រាការប្រាក់ និងកម្រៃផ្សេងៗ ពាក់ព័ន្ធនឹងឥណទាន និង/ឬ លើកលែងការផាកពិន័យ និងចៀសវាងការរឹបអូសទ្រព្យធានារបស់អតិថិជន ប្រកបដោយការយោគយល់និងអធ្យាស្រ័យខ្ពស់ ស្របតាមស្ថានភាពជាក់ស្ដែងរបស់អតិថិជន»។
សេចក្តីជូនដំណឹងចុះថ្ងៃទី១៨ ខែតុលា ធនាគារជាតិនៃកម្ពុជាបានស្នើគ្រឹះស្ថានធនាគារនិងហិរញ្ញវត្ថុ បន្តចូលរួមសហការក្នុងក្របខណ្ឌកិច្ចការពារអតិថិជន និងបន្តការអនុគ្រោះ តាមរយៈការរៀបចំឥណទានឡើងវិញតាមលក្ខខណ្ឌមួយចំនួន។
តាមសេចក្តីជូនដំណឹង ការផ្តល់ការយោគយល់និងអនុគ្រោះនោះមានដូចជា ការកាត់បន្ថយចំនួនប្រាក់ដើមឥណទាន ឬចំនួនដែលត្រូវសងនៅឥណប្រតិទាន, ការបន្ថយអត្រាការប្រាក់ទាបជាងលក្ខខណ្ឌនៃកិច្ចសន្យាដើម, ការពន្យារពេលទូទាត់សងប្រាក់ដើម ឬការប្រាក់ ឬការធ្វើមូលធនកម្មការប្រាក់, ការពន្យារឥណប្រតិទាន, ការបន្ថែម និង/ឬ ការផ្លាស់ប្ដូរអ្នករួមខ្ចី និង/ឬ អ្នកធានា ប្រសិនបើមាន និងការផ្លាស់ប្តូរពីឥណទានមានការទូទាត់សងតាមការបង់រម្លស់ ទៅជាការទូទាត់តែការប្រាក់ ហើយទូទាត់សងប្រាក់ដើមទាំងអស់នៅឥណប្រតិទាន (Bullet Loan)។
ក្រៅពីនោះ ធនាគារជាតិនៃកម្ពុជា ក៏បានណែនាំឱ្យមានការលើកលែង ឬបន្ថយទ្រព្យធានា, ការបន្ថយលក្ខខណ្ឌកិច្ចសន្យា និង/ឬ ការផ្តល់រយៈពេលអនុគ្រោះដោយគ្មានការទូទាត់សង (Grace period) ដែលអាចមានរយៈពេលរហូតដល់៦ខែ គិតចាប់ពីថ្ងៃប្រសិទ្ធភាពនៃកិច្ចសន្យាថ្មី។
ធនាគារជាតិនៃកម្ពុជាថា៖ «ដើម្បីរួមចំណែកសម្រាលបន្ទុក ក៏ដូចជាជួយស្តារជីវភាពរបស់អ្នកខ្ចីប្រាក់ គ្រឹះស្ថានត្រូវពិចារណាផ្តល់ការអនុគ្រោះ ដូចជា ការបន្ធូរបន្ថយការប្រាក់និងកម្រៃផ្សេងៗពាក់ព័ន្ធនឹងឥណទាន និង/ឬ លើកលែងការផាកពិន័យ និងចៀសវាងការរឹបអូសទ្រព្យធានារបស់អ្នកខ្ចីប្រាក់ ជាដើម»។
ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យជាតិគ្រប់គ្រង (NUM) នៅរាជធានីភ្នំពេញ នាព្រឹកថ្ងៃទី១៧ ខែតុលា ឆ្នាំ២០២២នេះ លោកនាយករដ្ឋមន្ត្រី ហ៊ុន សែន ថ្លែងថា ក្នុងគ្រាដែលពលរដ្ឋមួយចំនួនកំពុងជួបការលំបាកដោយសារគ្រោះទឹកជំនន់ លោកអំពាវនាវដល់គ្រប់គ្រឹះស្ថានហិរញ្ញវត្ថុទាំងអស់ ផ្តល់ការអនុគ្រោះដល់អ្នកខ្ចីឥណទានដែលរងផលប៉ះពាល់ផ្ទាល់ តាមរយៈការពន្យារពេលសង បន្ធូរបន្ថយអត្រាការប្រាក់ និងការរៀបចំឥណទានឡើងវិញ ដោយកុំទៅរឹបអូសផ្ទះសម្បែងរបស់ពួកគាត់។
ក្រៅពីនោះ លោកនាយករដ្ឋមន្ត្រី ហ៊ុន សែន ក៏បានផ្តាំទៅមន្ត្រីកសិកម្មទាំងអស់ រួមទាំងអាជ្ញាធរដែនដី ត្រូវចុះទៅពិនិត្យវាយតម្លៃផលប៉ះពាល់ទឹកជំនន់ និងស្ថិតិពលរដ្ឋដែលរងគ្រោះ ព្រមទាំងដោះស្រាយបញ្ហាភ្លាមៗជូនប្រជាពលរដ្ឋនៅមូលដ្ឋាន ដោយមិនត្រូវអនុវត្តសកម្មភាពការងារតាមបែប «ជិះសេះមើលផ្កា» នោះទេ៕