មន្ត្រីជាន់ខ្ពស់អ៊ីរ៉ង់ បាននិយាយថា អ៊ីរ៉ង់បានសន្យាថានឹងផ្ដល់ឱ្យរុស្ស៊ីនូវមីស៊ីល SSM បន្ថែមទៅលើយន្តហោះគ្មានមនុស្សបើក ដែលជាចំណាត់ការមួយទំនងជាធ្វើឱ្យសហរដ្ឋអាមេរិក និងមហាអំណាចលោកខាងលិច មានការខឹងសម្បា។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៩ ខែតុលា ឆ្នាំ២០២២នេះ។
កិច្ចព្រមព្រៀងមួយត្រូវបានធ្វើឡើងកាលពីថ្ងៃទី៦ ខែតុលា ឆ្នាំ២០២២ នៅពេលដែលអនុប្រធានាធិបតីទី១របស់អ៊ីរ៉ង់ លោក ម៉ូហាម៉ាត់ ម៉ូប៊ឺ (Mohammad Mokhber) មន្ត្រីជាន់ខ្ពស់ពីររូបមកពីកងឆ្មាំបដិវត្តន៍ដ៏មានឥទ្ធិពលរបស់អ៊ីរ៉ង់ និងមន្ត្រីម្នាក់មកពីក្រុមប្រឹក្សាសន្តិសុខជាតិកំពូល បានទៅទស្សនកិច្ចនៅទីក្រុងមូស្គូ ដើម្បីពិភាក្សាជាមួយរុស្ស៊ីអំពីការដឹកជញ្ជូនអាវុធ។
អ្នកការទូតអ៊ីរ៉ង់ម្នាក់បាននិយាយថា៖ «រុស្ស៊ីបានស្នើសុំយន្តហោះគ្មានមនុស្សបើក និងមីស៊ីលផ្លោងបន្ថែមទៀតពីអ៊ឺរ៉ង់ ជាពិសេសហ្វូងមីស៊ីល Fateh និង Zolfaghar»។
មន្ត្រីបស្ចិមប្រទេសម្នាក់បាននិយាយថា មានកិច្ចព្រមព្រៀងមួយរវាងអ៊ីរ៉ង់ និងរុស្ស៊ី ក្នុងការផ្តល់មីស៊ីលផ្លោងរយៈចម្ងាយខ្លី SSM រួមទាំងម៉ីសីល Zolfaghar ផងដែរ។
យន្តហោះគ្មានមនុស្សបើកមួយប្រភេទ ក្នុងចំណោមយន្តហោះគ្មានមនុស្សបើក ដែលអ៊ីរ៉ង់យល់ព្រមផ្តល់ឱ្យរុស្ស៊ីគឺ Shahed-136។ យន្តហោះប្រភេទនេះផ្ទុកក្បាលគ្រាប់តូចមួយដែលផ្ទុះនៅពេលប៉ះ។
Fateh-110 និង Zolfaghar គឺជាមីស៊ីលផ្លោងរយៈចម្ងាយខ្លី SSM របស់អ៊ីរ៉ង់ ដែលមានសមត្ថភាពវាយប្រហារគោលដៅនៅចម្ងាយពី៣០០គីឡូម៉ែត្រ ទៅ៧០០គីឡូម៉ែត្រ (១៨៦ និង ៤៣៥ ម៉ាយល៍)។
អ្នកការទូតអ៊ីរ៉ង់ បានច្រានចោលការអះអាងរបស់មន្ត្រីលោកខាងលិច ដែលថា ការផ្តល់អាវុធរបស់អ៊ីរ៉ង់ដល់រុស្ស៊ី បំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ឆ្នាំ២០១៥។
អ្នកការទូតរូបនោះបន្ថែមទៀតថា៖ «ក្នុងករណីដែលអាវុធទាំងនោះត្រូវបានប្រើប្រាស់ វាមិនមែនពាក់ព័ន្ធនឹងអ្នកលក់ឡើយ។ យើងមិនពាក់ព័ន្ធក្នុងវិបត្តិនៅអ៊ុយក្រែនដូចលោកខាងលិចឡើយ។ យើងចង់បញ្ចប់វិបត្តិតាមរយៈមធ្យោបាយការទូត»។
អ៊ុយក្រែន បានរាយការណ៍ពីការវាយប្រហាររបស់រុស្ស៊ីដោយប្រើដ្រូនប្រភេទ Shahed-136 ផលិតដោយអ៊ីរ៉ង់ ក្នុងប៉ុន្មានសប្តាហ៍ថ្មីៗនេះ។ ក្រសួងការបរទេសអ៊ីរ៉ង់ កាលពីថ្ងៃអង្គារ បានច្រានចោលរបាយការណ៍នោះថាជារបាយការណ៍គ្មានមូលដ្ឋាន ដែលថា អ៊ីរ៉ង់ផ្គត់ផ្គង់យន្តហោះគ្មានមនុស្សបើក និងអាវុធផ្សេងទៀតដល់រុស្ស៊ី សម្រាប់ប្រើប្រាស់ក្នុងសង្រ្គាមនៅអ៊ុយក្រែន ខណៈវិមានក្រឹមឡាំងបានបដិសេធថា កងកម្លាំងរបស់ខ្លួនមិនបានប្រើប្រាស់យន្តហោះគ្មានមនុស្សបើករបស់អ៊ីរ៉ង់ ដើម្បីវាយប្រហារអ៊ុយក្រែនឡើយ។
នៅពេលសួរថាតើរុស្ស៊ីបានប្រើប្រាស់យន្តហោះគ្មានមនុស្សបើករបស់អ៊ីរ៉ង់ នៅក្នុងប្រតិបត្តិការរបស់ខ្លួនក្នុងប្រទេសអ៊ុយក្រែនដែរឬទេ? អ្នកនាំពាក្យវិមានក្រឹមឡាំង លោក ឌីមីទ្រី ពេស្កូវ (Dmitry Peskov) បាននិយាយថា វិមានក្រឹមឡាំងមិនបានទទួលព័ត៌មានអំពីការប្រើប្រាស់អាវុធទាំងនោះឡើយ។
លោកបានបន្តថា៖ «អាវុធរបស់រុស្ស៊ីដែលមានស្លាកសញ្ញារបស់ប្រទេសរុស្ស៊ី ត្រូវបានប្រើប្រាស់»។
លោកថា រាល់សំណួរបន្ថែមគួរសួរទៅក្រសួងការពារជាតិ ប៉ុន្តែក្រសួងនេះមិនបានឆ្លើយតបចំពោះសំណើសុំការធិប្បាយឡើយ។
ការកើនឡើងនៃមីស៊ីលរបស់អ៊ីរ៉ង់បន្ថែមពីលើយន្តហោះគ្មានមនុស្សបើក នៅក្នុងឃ្លាំងអាវុធរបស់ទីក្រុងម៉ូស្គូ ក្នុងសង្គ្រាមជាមួយអ៊ុយក្រែន នឹងបង្កើនភាពតានតឹងរវាងអ៊ីរ៉ង់ និងសហរដ្ឋអាមេរិក និងមហាអំណាចលោកខាងលិចផ្សេងទៀត៕
