អ្នកនាំពាក្យរដ្ឋបាលខេត្តស្ទឹងត្រែងមួយរូបបានថ្លែងការពារករណីប្រើប្រាស់ហិង្សាក្នុងការចាប់ខ្លួនជនសង្ស័យមួយរូបដែលលួចរថយន្តមន្ត្រីអាវុធហត្ថខេត្ត កាលពីដើមខែកន្លងទៅ បន្ទាប់ពីវីដេអូនៃការប្រើប្រាស់អំពើហិង្សានេះត្រូវបានចែករំលែក និងរងនូវការរិះគន់ជាច្រើននៅលើបណ្ដាញសង្គម។
យោងតាមវីដេអូឃ្លីបមួយដែលត្រូវបានបង្ហោះនៅលើបណ្ដាញសង្គមហ្វេសប៊ុក (Facebook) ក្នុងនោះ គេសង្កេតឃើញមន្រ្តីសមត្ថកិច្ចបាននាំគ្នាស្ទាក់ឃាត់រថយន្តមួយគ្រឿង និងចាប់បុរសម្នាក់ជាអ្នកបើកបរ ដោយមានការប្រើប្រាស់អំពើហិង្សា (ទាត់ធាក់) ខណៈពួកគេព្យាយាមដាក់ខ្នោះបុរសរូបនោះ។
តាមរយៈវីដេអូឃ្លីបនោះ គេក៏សង្កេតឃើញមានក្មេងតូចមួយរូបនៅក្នុងហេតុការណ៍នោះផងដែរ ខណៈបុរសដែលជាអ្នកបើកបររូបនេះបានស្រែកខ្លាំងៗថា៖ «សូមកុំវាយខ្ញុំ។ កុំវាយខ្ញុំ។ ខ្ញុំមិនបានលួចអ្វីនោះទេ។ សូមឱ្យកូនមកខ្ញុំវិញមក»។
វីដេអូដែលត្រូវបានបង្ហោះលើបណ្ដាញសង្គមនេះ ត្រូវបានចែករំលែក (share) ជាង២ម៉ឺនដង ទទួលបានប្រតិកម្ម (reaction) ជាង៤ម៉ឺន និងការផ្ដល់មតិយោបល់ (comment) ជាង៦ពាន់ ដែលក្នុងនោះ សាធារណជនភាគច្រើនបានរិះគន់លើសកម្មភាពរបស់មន្រ្តីសមត្ថកិច្ច។
អ្នកប្រើប្រាស់បណ្ដាញសង្គមមួយរូបបានលើកឡើងជាមតិយោបល់ថា៖ «[មន្រ្តីសមត្ថកិច្ច] មិនគួរមានការវាយដំ ឬធ្វើទារុណកម្មឡើយ។ ប្រទេសយើងមិនមែនជាប្រទេសកុម្មុយនីស្តនោះទេ»។
ជាការឆ្លើយតប ស្នងការដ្ឋាននគរបាលខេត្តស្ទឹងត្រែង បានចេញសេចក្តីថ្លែងការណ៍មួយ ដោយបានស្នើឱ្យសាធារណជន និងអ្នកលេងបណ្ដាញសង្គមហ្វេសប៊ុក សូមកុំឱ្យមានការភ័ន្តច្រឡំពាក់ព័ន្ធករណីនេះ ដោយថា កាលពីថ្ងៃទី០៤ ខែតុលា ឆ្នាំ២០២២ វេលាម៉ោងប្រហែល១២និង២០នាទី ជនសង្ស័យអាយុ៣២ឆ្នាំរូបនោះ បានធ្វើសកម្មភាពលួចរថយន្តរបស់មន្រ្តីកងរាជអាវុធហត្ថមួយរូប ក្នុងសង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង។
សេចក្តីថ្លែងការណ៍ដដែលបន្ថែមថា៖ «សេចក្ដីដូចបានជម្រាបជូនខាងលើនេះ សូមសាធារណជន និងអ្នកលេងបណ្ដាញសង្គមហ្វេសប៊ុក សូមកុំឱ្យមានការភ័ន្តច្រឡំ ដោយករណីខាងលើពិតជាករណីចោរកម្មលួចរថយន្តពិតប្រាកដមែន។ យើងខ្ញុំរង់ចាំទទួលស្វាគមន៍ជានិច្ចនូវការចូលរួមកែលម្អក្នុងន័យស្ថាបនា ដោយស្មារតីទទួលខុសត្រូវខ្ពស់»។
ជាមួយគ្នានេះ អ្នកនាំពាក្យរដ្ឋបាលខេត្តស្ទឹងត្រែង លោក ម៉ែន គង់ នៅថ្ងៃចន្ទម្សិលមិញ ក៏បានបញ្ជាក់បន្ថែមពីករណីនេះថា បុរសអាយុ៣២ឆ្នាំ ដែលជាអ្នកបើកបររថយន្តរូបនោះ គឺជាកម្មករក្រុមហ៊ុនចម្ការចេក ហើយបានយកម៉ូតូគ្មានស្លាកលេខមួយគ្រឿងមកទុកជិតទីបញ្ជាការកងរាជអាវុធហត្ថខេត្ត រួចក៏បើករថយន្តមួយគ្រឿងចេញទៅបាត់។ តែលោកមិនដឹងថាតើបុរសរូបនេះលួចបើករថយន្តគេចដោយរបៀបណានោះទេ។
ឆ្លើយតបនឹងករណីប្រើប្រាស់អំពើហិង្សាលើជនសង្ស័យរូបនេះ អ្នកនាំពាក្យរដ្ឋបាលខេត្តបានឱ្យដឹងថា វាគឺជាការអនុវត្តមួយនៅពេលដែលជនសង្ស័យត្រូវបានចាប់ខ្លួនក្នុងការប្រព្រឹត្តបទល្មើសណាមួយ។
លោកថា៖ «កងកម្លាំងអនុវត្តច្បាប់មានការយល់ដឹងយ៉ាងច្បាស់ក្នុងការអនុវត្ត សម្រាប់ប្រតិបត្តិការឧក្រិដ្ឋកម្មទាំងឡាយ»។
គួរបញ្ជាក់ថា នាយនគរបាលប៉ុស្តិ៍ឃុំមួយក្នុងខេត្តកំពង់ស្ពឺ កាលពីពេលកន្លងទៅ ក៏ធ្លាប់បានលើកឡើងថា ការប្រើទារុណកម្មដើម្បីសួរចម្លើយក្នុងករណីប្លន់ឬឃាតកម្ម គឺជារឿងសមស្របផងដែរ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Stung Treng Authorities Defend Violent Arrest Methods