សាលាដំបូងរាជធានីភ្នំពេញ បន្តសវនាការសំណុំរឿង «រួមគំនិតក្បត់» ដោយតុលាការបានអានរបាយការណ៍ដាក់បន្ទុក ដែលសមត្ថកិច្ចស្រង់ពីលើបណ្ដាញសង្គមរបស់ថ្នាក់ដឹកនាំ និងសកម្មជនបក្សសង្គ្រោះជាតិដែលត្រូវរំលាយ ពាក់ព័ន្ធដំណើរវិលត្រលប់លើកទី២របស់លោកស្រី មូរ សុខហួរ។
សវនាការលើកទី៥ នៅថ្ងៃទី២០ ខែតុលានេះ ប្រធានក្រុមប្រឹក្សាជំនុំជម្រះ លោកស្រី អ៊ុក រ៉េតគន្ធា បានបង្គាប់ឱ្យក្រឡាបញ្ជីអានរបាយការណ៍ដែលសមត្ថកិច្ចស្រង់ចេញពីបណ្ដាញសង្គមរបស់ថ្នាក់ដឹកនាំគណបក្សប្រឆាំង និងសកម្មជនចំនួន១៨នាក់ ក្នុងនោះមានលោក ហូ វ៉ាន់, លោក មែន សុថាវរិន្ទ្រ, លោក នុត រំដួល, លោក សោ ចាន់ដេត និងលោក អូន ពៅ ជាដើម។
របាយការណ៍ដែលសមត្ថកិច្ចបានស្រង់ធ្វើភស្ដុតាងដាក់បន្ទុកនោះ គឺទាក់ទងនឹងការបង្ហោះសារលើបណ្ដាញសង្គមហ្វេសប៊ុកកាលពីអំឡុងចុងឆ្នាំ២០២០ ដោយការអំពាវនាវឱ្យអ្នកគាំទ្រចូលរួមអមដំណើរលោកស្រី មូរ សុខហួរ វិលត្រលប់មកកម្ពុជានៅថ្ងៃទី៤ ខែមករា ឆ្នាំ២០២១ ដើម្បីមកតតាំងក្ដីនៅតុលាការកម្ពុជា។
សកម្មជនគណបក្សសង្គ្រោះជាតិដែលត្រូវតុលាការរំលាយ លោក អូ ពៅ ត្រូវបានសមត្ថកិច្ចដកស្រង់សារដែលបានបង្ហោះបណ្ដាញសង្គមហ្វេសប៊ុក កាលពីអំឡុងខែវិច្ឆិកា និងធ្នូ ឆ្នាំ២០២០ ដោយក្នុងសារនោះ លោកបានអំពាវនាវដល់ប្រជាពលរដ្ឋដែលគាំទ្របក្សប្រឆាំង ទាំងក្នុងប្រទេស និងក្រៅប្រទេស ឱ្យចូលរួមអមដំណើរ និងទទួលលោកស្រី មូរ សុខហួរ វិលចូលកម្ពុជា ដើម្បីតវ៉ាក្ដី និងផ្លាស់ប្ដូររបបដែលដឹកនាំដោយលោកនាយករដ្ឋមន្ត្រី ហ៊ុន សែន។
លោកថា៖ «សូមបងប្អូនខ្មែរនៅទូទាំង២៥រាជធានីខេត្ត-ក្រុង ត្រៀមខ្លួនអមដំណើរលោក សម រង្ស៊ី។ អំពាវនាវឱ្យយុវជនអមដំណើរមាតុភូមិនិវត្តន៍លោកស្រី មូរ សុខហួរ»។
ក្រោយពីក្រឡាបញ្ជីបានអានរបាយការណ៍ទាំងនោះហើយ ប្រធានក្រុមប្រឹក្សាជំនុំជម្រះ លោកស្រី អ៊ុក រ៉េតគន្ធា បានប្រកាសផ្អាកសវនាការ ហើយគ្រោងនឹងបន្តសវនាការលើសំណុំរឿងនេះទៀត នៅថ្ងៃទី៣ ខែវិច្ឆិកា ឆ្នាំ២០២២។
សំណុំរឿង «រួមគំនិតក្បត់» ដែលមានជនជាប់ចោទ៣៩នាក់នេះ ត្រូវបានបំបែកជា២សំណុំរឿង ក្នុងនោះ សំណុំរឿងទី១ មានជនជាប់ចោទ លោក អៀ ចាន់ណា និងកញ្ញា សៅ ឧសភា ដែលកំពុងស្ថិតក្នុងដំណាក់កាលចៅក្រមស៊ើប ខណៈសំណុំរឿងមួយទៀតមានជនជាប់ចោទ៣៧នាក់ ដែលតុលាការកំពុងដំណើរការសវនាការ។
ជនជាប់ចោទទាំង៣៧នាក់ ក្នុងនោះមានលោក សម រង្ស៊ី, លោក អេង ឆៃអ៊ាង, លោក ឡុង រី, លោកស្រី មូរ សុខហួរ ព្រមទាំងសកម្មជនផ្សេងទៀត ដែលបច្ចុប្បន្ន អ្នកទាំងអស់នេះកំពុងនិរទេសខ្លួននៅក្រៅប្រទេស ខណៈជនជាប់ចោទដែលមានវត្តមានក្នុងបន្ទប់សវនាការ មានតែ៣នាក់ប៉ុណ្ណោះ។ ជនជាប់ចោទទាំង៣នាក់នោះមានលោក គង់ ម៉ាស់, លោក ខាន់ ប៊ុនផេង និងលោក វឿង សំណាង ដោយអ្នកទាំងនេះកំពុងជាប់នៅពន្ធនាគារព្រៃស៕